Pago Pago, AMERIKA SAMOA - O le tulaga siisii ua maitauina i le gataifale i le taimi nei, ua fa’aalia ai e ni isi o le Falelima i Sasa’e o latou lagona popole ma le atuatuvale, ona ua tulaga ese le maualuluga o galu ua molimauina i lenei vaitaimi, lea e aofia ai ma lenei vaiaso. 

O le tula’i mai ai o tulaga faaletonu i le gataifale i le taimi nei, ua tu’u fesili ai manatu o nisi o le atunu’u, poo le mea ea o nei suiga i le gataifale e mafua mai ona o tulaga lava faalenatura, poo le mea ea ua aga’i atu ina taunu’u faailoga o loo valoia e le Tusi Paia, o isi ia faailoga e iloa ai taimi o le iuga o le lalolagi ua lata mai.

Na maua le avanoa e faasoa mai ai e nisi o afioga i le Falelima i Sasa’e e aofia ai Aua, Lauli’i ma Amouli o latou lagona atuatuvale ma le popole e fa’atatau i lenei mataupu, ma ua amata ai fo’i ona oo mai lagona popole ma le atuatuvale.

Na taua e le susuga a Tanielu Filiki o Aua e fa’apea, e fou suiga ua maitauina i le sami i le taimi nei. E le gata ua vaaia le siisii o le suavai ae ua matua malolosi fo’i galu pe a oo ina fafati.

Na taua e Filiki i le Samoa News e fa’apea, e le i maua se mapu a lona aiga i le po o le aso Sa ma faasolo atu ai i le aso Gafua atoa na te’a nei, ina ua maitauina tulaga siisii o galu i totonu o le afioaga.

Sa ia taua e faapea, na gata lona vaaia o ituaiga galu tetele nei i le taimi o le afa o Gita na mae’a atu i le tausaga e 2018, peita’i na faateia o ia ma lona aiga ina ua latou molimauina tulaga mata’utia sa i ai le sami. O le suasami na matua oo atu lava i tafatafa o le latou fale, e oo fo’i i luga o le alatele na fola solo ai lapisi na la’u atu e galu i le taimi na fafati malolosi ai.

Sa maitauina e le Samoa News luma o le maota o Filiki o lo o to’a ai ni vaega laiti o le sua sami na oo atu i ai i le taimi na malolosi ai le fafati i galu.

Ina ua fesiligia le susuga a Filiki i sona finagalo i lenei vaaiga fou ua molimauina i le afioaga, sa ia taua ai e fa’apea, na pau lava le auala e mafai ona foia ai lenei faafitauli o le fausia lea o se taligalu mautu ma malosi na te puipuia le saogalemu o tagata atoa ai ma le tafea atu i tai o le palapala pe a oo ina fati malolosi mai uta ia galu.

“Ua mae’a ona tuuina atu la matou talosaga i le afioga i le ali’i Faipule o le matou nu’u, ina ia alofagia se taligalu mo le isi itu o Aua. Afai o le tulaga lea e fa’aauau ai pea ona siisii le gataifale, e oo atu i le isi 3 tausaga o loo lumana’i ua tulaga faaletonu le vaega o loo tu ai lo matou fale i le taimi nei,” o le saunoaga lea a Filiki.

O lagona fo’i ia na saunoa i ai le afioga a Maposua Puni ina ua maua le avanoa e fesiligia ai e le Samoa News e tusa ai o suiga faafuase’i ua i ai le gataifale i lenei vaitaimi o le olaga. A o tapunia ai le malo ona o puipuiga i le faama’i oti o le COVID-19, na taua ai e le susuga a Puni le tatau lea ona silasila toto’a ta’ita’i o le malo i se auala faanatinati e fausia ai ni taligalu mo le Falelima i Sasa’e, ina ia mautinoa e vave fausia ni taligalu e puipuia ai le atunu’u mai le aafia.

Na molimau fo’i le afioga a Puni i le tulaga mata’utia sa i ai le malosi o le fafati o galu i le po o le aso Sa ma le aso Gafua na te’a nei, lea fo’i na le maua ai se to’a i lona aiga ona o le popole ina nei umi se taimi o faia pea uiga le alofa o le natura o mea na faia e le Atua.

Na taua e Puni e fa’apea, o nofoaga sa masani ona le oo i ai le sami pe a oo ina sui tutu’i, ua mafai ona oo atu i ai le sami i le taimi nei, tusa lava pe faapea o loo pe le tai. Ae a oo loa la ina sua tutu’i le tai, ona faigata loa lea ona toe alu se isi i tai e taele pe fagota.

“O nisi taimi e sese lo ta mafaufau faapea ai o se galu lolo ua toe oo mai, ona o le malolosi o le fafati mai o galu atoa ai mamao o le nofoaga ua oo atu i ai,” o le saunoaga lea a le Tina matua ia Telesia Finauga.

Na taua e Finauga e faapea, ua silia i le 50 tausaga talu ona nonofo lo latou aiga i le fale ma le fanua lea, o le fanua a matua o lona to’alua ua leva ona malaga atu i atunuu i fafo, ae o i latou lea ua taatia atu i ai le tausiga o le aiga atoa ai ma le vaaiga o meatotino.

Sa ia taua lona lagolagoina o le talosaga ua tuuina atu i le Faipule ma le faigamalo, mo se vaega tupe e fesoasoani ai i le fausiaina o se taligalu mo Aua atoa ai ma isi afioaga o le Falelima i Sasa’e o loo aafia fo’i i latou i le malolosi o galu pe a oo ina sua oo oo le tai.

O le Tama ia Talai Konelio o Fagaitua na mafai fo’i ona fesiligia e le Samoa News e tusa ai o lenei mataupu. Na taua e Konelio lona popolega o loo i ai i le suiga fou ua i ai le gataifale i le taimi nei.

I lona talitonuga, ua tatau ona ave le faamuamua a le malo i le fausiaina o ni taligalu mo nuu o le Falelima i Sasa’e.

O se tasi o faafitauli ua maitauina i le suiga ua i ai le tau, ua tele ina aia ai le palapala ma tafea atu ai se vaega tele o eleele i le sami. O lenei faafitauli e pei ona taua e le susuga a konelio, e ono avea ma faafitauli mo nisi o afioaga i le lumana’i. 

Saunoa le susuga i le ali’i Faifeau ia Pr. Uatisone Amituana’i o le Ekalesia Kerisiano i Tafuna e fa’apea, e le mafai ona pepelo le molimau a le Tusi Paia e fa’atatau i mea eseese o le a tutupu i aso o le iuga. O ni isi o ia suiga e aofia ai taua ma faama’i, o oge ma mafui’e, atoa ai ma suiga i le natura o mea na faia e le Atua e pei o le siisii o le suasami.

“E le tatau i soo se tagata ona faateia o ia i suiga o le natura o mea na faia e le Atua, a tatou vaaia suiga nei i lo tatou siosiomaga, fai mai le molimau a le Tusi Paia, o faailoga ia e ta’u mai ai i le tagata ua lata lata ona po e oo mai ai le mutaaga o mea uma o lenei olaga. O ona uiga, ua tatau i le tagata ona tapena lona olaga ua i faitoto’a lo tatou Fa’aola,” o le saunoaga lea a le ali’i Faifeau.

E fia faamanatu atu e le Samoa News,e tele i’ugafono sa faaulu ma pasia e ni isi o afioga i Faipule mai itumalo eseese o le Falelima i Sasae na mafai ona talanoaina i luma o le Maota o Sui ma pasia ai i ni isi o Nofoaiga a le Fono Faitulafono ua mavae atu. E ui i le tele o uigafono ua pasia, e laiti lava iugafono ua mafai ona faatino, ae o nisi lava o iugafono e le o mafai ona faatino ma faatupe, ona o le tulaga tau faasoasoa o le itu tau tupe a le malo.

O ni isi o afioaga ua mae’a ona fausia a latou taligalu e aofia ai Vatia, Fagaitua, Leloaloa, faapea ai ma se vaega o Aua.