Aloa’ia fanau aoga e to’a 187 ua fa’au’u mai i le aoga maualuga a Samoana
Pago Pago - AMERIKA SAMOA
O le aso Lulu, Iuni 12, 2024 na aofia potopoto ai taitai o le malo, taitai o ekalesia, faapea matua, uo ma aiga, i le fale ta’alo a le aoga maualuga a Samoana, i Utulei, aua le sauniga fa’amavae, ae o le fa’au’uga foi, a alo ma fanau e to’a 187, mai i le vasega 12 a le laumua i le Malie.
O le manulauti o le aso fiafia a le fanau, o se toe faamanatu ia i latou, ina ia o latou toe tepa i lo latou fa’avae ma ni manatu fou, e saunia ai mo lumana’i eseese.
Sa amataina le sauniga i le saunoaga ma tima’iga fa’aleagaga mai i le susuga i le Faafeagaiga ia Viliamu Leilua, o le Ekalesia Faapotopotoga Kerisiano a Amerika Samoa, i Aua.
Ona soso’o mai ai lea ma le saunoaga a le afioga i le Kovana Lemanu P. S. Mauga.
Sa fautuaina e le afioga i le Fa’aao o le malo ia alo fa’au’u ina ia o latou fa’amavae atu i lo latou a’oga ma o latou olaga masani ma manatu fou ma loto matala e opogi le tele o avanoa i le lumana’i.
Sa ia toe fa’amanatu atu i alo ma fanau fa’au’u, le mae’a ona o a latou a’oa’oga, fa’amaa’i o a latou taleni ma fausia so’otaga e manaomia, e faamautu ai o latou faavae, aua leisi la’asaga o le a la’asia.
Saunoa le afioga i le kovana, o le lumana’i e le o se tulaga le mailoa, ma e ao ona o latou tatalaina i latou lava, mo ni tulaga fou, pe afai e latou te tu’ua o latou olaga tuai ma taga’i i le lumana’i ma se va’aiga fou. Sa ia ta’ua le amataina ona o latou va’ai atu i lalolagi, i se malamalama fou ma mautinoa ai le leai o se gata’aga o mea e mafai ona o latou ausia.
Sa ia saunoa foi, e amata ona e moemiti, miti sili atu ma ia fa’atetele ma fa’au’umi au la’a, ina ia tino mai au miti. O le tu’ua o a latou faavae ma ni manatu fou, o le a tula’i mai ai foi ni fa’afitauli, ae sa fautuaina e le afioga i le kovana, ia le vasega fa’au’u, ina ia loto tetele, ma aua le fefefe e la’a atu i fafo ma mea ua o latou masani ai.
Na fa’ailoa atu foi e le afioga Lemanu i le fanau fa’au’u, o se avanoa e tuputupu ai, a’oa’o ma ausia tulaga fou…o lona uiga, avea suia ma avanoa e tuputupu ai, ae aua le avea ma tulaga e ono a’afia ai lo latou puipuiga.
Sa tima’i foi le afioga i le kovana, ina ia o latou manatua, e le faapea o i’uga manuia, e muta ai le lalolagi, ae o se avanoa e toe a’oa’o atili ma tuputupu ai. Aemaise ai, ia matala o latou mafaufau, ina ia mafai ona talia a’oa’oga mai i isi. Sa ia fautuaina foi i latou ina ia loto su’esu’e, aua ne’i tu’u i o latou lava malamala’aga, ae ia fa’aauau pea ona a’oa’o ma tuputupu a’e.
Ma le mulimuli, sa ia fautuaina foi i latou ina ia lava lo latou onosa’i ia i latou lava aemaise ai le fa’agasologa o o latou olaga.
Sa ia u’una’ia le fanau fa’au’u ina ia lototetele pe a o latou tu’ua la latou a’oga. Ma po’o fea e o’o iai o latu olaga, ma le umi, pe sefulu tausaga pe sili atu foi, ia toe fo’i mai, aua o i latou o Samoa ma o le latou faasinomaga lenei. O le mea o iai o latou matua, aiga ma o latou tagata.
Ma lana toe upu, ia manatua e tatalo i aso uma ma o le a puipuia i latou e le Atua, ta’ita’i i latou ma si’i i latou ina ia mafai ona ausia a latou tausinioga.
Sa taliaina e le afioga i le Faatonusili a Aoga, ia Talauega Dr. Samasoni Asaeli, ma faamaonia le vasega fa’au’u e 187 mo le taua’aoina o a latou fa’ailoga (diploma), e le afioga i le kovana ma le Faletua faapea le sui Faipule i le Konekeresi, le afioga Uifa’atali Aumua Amata.
Sa tofutofusia foi le vasega fa’au’u ma fa’ailoga e aloaia ai i latou, mai i le afioga Uifa’atali.
E to’afa i latou mai i le vasega fa’au’u sa mafai ona ausia le tulaga muamua (co-Valedictorians), na aofia ai Aukuso Fruean, Carlos Sanchez, Jr., J-La Vaelapa Afi’a, Mataio Suluai ma le tamaitai o Joevy Dela Cruz. O le tulaga lua (Salutatorian) sa ausia e le tamaitai o Hannora Toimoana.
O le alii o Aukuso Fruean, o se alo e faasino ia Fotualii Aukuso Fruean ma le faletua ia Trixie Scanlan-Fruean mai i le afioaga o Fagatogo ma Pago Pago. O ia o se totino o le ekalesia Katoliko (St. Joseph the Worker) i Fagatogo. O ona matua fa’aleagaga o le susuga i le Patele Ioane Anitelea ma Michael Vito. O matua o ona matua, o Sesele Tuni Fruean ma le faletua ia Epenesa Vaelepa Fruean mai i le Pago Pago, faapea ma le susuga ia Fotualii Andrew Scanlan ma Eliza Grace Reid o Fagatogo.
O Carolos M. Fouvale Sanchez, o se alo e faasino ia Carlos Sanchez ma Christina Lutu-Sanchez aemaise ai le afioga i le Aloalii ia Afoa Leulumoe Lutu ma le faletua ia Etenauga Lutu, lea ua fai’ilagi folauga. Mai i le afioaga o Utulei.
O J-La Vaelapa Afia, o le alo o Vaaoloviti Mulivai Afi’a ma le faletua ia Rene Alaelua-Afi’a, ma se uso faapelepele ia Ben, Inayna, Princess ma Viti Jr. O lenei fa’ailoga ua faapea ona ia aloaia ai nai ona tina matua ia Nana Luisa ma Grandma Tulua faapea ona ‘Aunties’ o Queen ma Honey. O J-La e mai i le afioaga o Vatia.
O Mataio Sipu Talamoa Suluai, o le alo o le susuga ia Savaauli ma le faletua ia M. Suluai. Ma sa ia aloaia lona aiga i lona ausiaina o lenei fa’ailoga. O Mataio e malaga mai i le afioaga o Pago Pago.
Ma le tamaitai o Joevy Dela Cruz, o se alo e fa’asino ia Joe ma Rosalie Dela Cruz mai i Filipaina. Ae o lo’o fa’amautu nei i Fagatogo.
Ae o le tamaitai o El-Hannora Agnes Toimoana, o le alo o le susug ia Tamate Peniamina Toimoana ma le faletua ia Diana Kelly Seufale Toimoana. Sa ia aloaia lona tama matua, lea ua fa’ilagi le folauga, le susuga i le Fa’afeagaiga ia Si’umo’o Toimoana faapea si ona tina matua ia Olive Toimoana. O ona matua faaleagaga o Rev. Toomalatai Fuimaono Lalagofa’atasi ma le faletua ia Sipaea Sanonu Lalagofaatasi mai i le ekalesia a le Assembly of God, i Faleniu. E malaga mai lenei tamaitai mai i afioaga o Pago Pago, Nu’uuli, Faleatiu, Solosolo, Foaluga, Manono ma Apia.
Sa faaleoina e le sui mai i le komiti faafoe o Sikolasipi a Amerika Samoa, ia Lisa Gebauer, i latou ua faamanuiaina i sikolasipi mai i le malo, na aofia ai le alii o Carlos Sanchez lea o le a malaga atu mo le fa’aauauina o ana a’oa’oga i le Iunivesite a Davis i Kalefonia; o Mataio Suluai lea o le a fa’aauauina ana aoaoga i le Iunivesite i Delaware; o David Faumuina lea o le a fa’aauauina ana a’oa’oga i le Iunivesite fa’aloia i Uasigitone.
O le tamaitai o El Hannora Toimoana o le a fa’aauauina ana a’oa’oga i le Kolisi a Amerika Samoa.