Pago Pago - AMERIKA SAMOA

E tusa ai ma fa’amaumauga a le malo, o le aoauli o Ianuari 14, 2025 na valaau atu ai se tamaitai i le ofisa a leoleo i Tafuna e ripotia le sauaina o lona tuagane e le susuga ia Darius Seagai, lea ua molia i le tulafono.

Sa agai atu leoleo i le nofoaga na tupu ai le faalavelave ma fa’atalanoaina le tamaitai na valaau mai i le ofisa a leoleo ma na ia ta’ua e faapea, sa iai o ia i totonu o le fale, ae ona va’aia le agai atu o Seagai i le latou umu i tua o le latou fale, ma valaau lona tuagane.

Ma sa ta’ua e le tamaitai lona molimauina o le po ina e Seagai o lona tuagane ma fa’aauau ona ia ‘e’e i lona tuagane, ae na te le o malamalama i faamatalaga a Seagai o lo’o fai i lona tuagane.

Sa ta’ua e le tamaitai na valaau i leoleo, ia lona tamo’e mai ma tuli ese Seagai ma ia valaauina loa leoleo.

Ae na fa’amatalaina e le na a’afia, i leoleo, na o la talatalanoa ma Seagai i le latou umu, ae talanoa atu Seagai e tusa ai ma se faafitauli na tupu i le tausaga ua mavae, ma na fa’ate’ia o ia, ina ua po o ia e Seagai.

Sa ta’ua e le alii na a’afia, na ia tu i luga ma solomuli.  Ma e foliga mai na tagofia e Seagai ia se ‘ava malosi.

Na fa’asino e le alii na a’afia, i leoleo, ia le fale a Seagai.  Ma na maua atu o ia e leoleo, i le latou umu ma lokaina mai ai o ia ma aveina atu i le ofisa a leoleo mo le fa’aauauina o su’esu’ega.

E tusa ai ma le fa’amatalaga a Seagai i leoleo, sa ia po ina ia le alii na a’afia, ona o se tulaga na ia faia i sona (Seagai) aunty, e pei o se tuafafine ia te ia.  Na ta’ua e Seagai ia lona mauaina o le na a’afia, o mataaitu i lona ‘aunty’.

O moliaga na faia faasaga ia Seagai, na aofia ai le Faatupu Vevesi i totonu o aiga ma le Fa’ao’olima i lona tulaga e tolu.

O nei moliaga, o ni vaega ‘C’ i solitulafono mama, lea e mafai ona nofosala ai i le falepuipui mo aso e 15, po o se sala tupe i le va o le $150 ma le $300; po o faasalaga uma e lua.

E $500 se vaegatupe na fa’atulagaina mo le tatalaina o le ua molia, e faatalitali ai lona faamasinoga.