I le taimi nei ua atoa le 11 o gasegase ua fa’amaonia mai suesuega na avatu i Hawai’i ua maua i le misela. O le sui mulimuli lava lea sa mautinoa ua fa’amaonia na maua i le misela fa’ato’a fa’ao’o ane i le falemai i le aso Kerisimasi, o le pepe e lua tausaga le matua, peita’i na va’aia le foma’i ae ua mae’a ona te’a i tua i lona aiga i le taimi nei.

Ua fa’ailoa mai e i ai le isi fo’i na masalomia e le’i to’ai taunu’u mai a latou suesuega na avatu i fafo e fa’amaonia mai ai.

I se lipoti fou ua taua’aoina mai nei e ao ina fa’asalalauina atu i le mamalu lautele o le atunu’u, ua fa’ailoa ai, o lo ua fa’aauau nei le toe fa’amalosia pea o tulafono uma mo i latou e ulufale i le teritori mai atunu’u o lo’o a’afia i le misela lea ua aofia ai Samoa, Fiti, Tonga, Niu Sila ma Ausetalia.

I le talosagaina fo’i o “ok-board” e talia ai le ulufale mai o nisi mai Niu Sila ma Ausetalia, ua matua tele feuiuia’iga ua fa’auia ai i latou e fia malaga mai, ae mua’i talosagaina na avanoa ma totogia e o latou aiga i Amerika Samoa nei.

O pepa tui sa faia i Niu Sila mo nisi e malaga mai ai i Samoa, ua le toe taliaina lea e mafai ona ulufale mai ai se tasi mai Niu Sila ma Ausetalia i Pago Pago nei, ua faia pea le isi tui i Samoa, ona ulufale mai ai lea. E ao ina taua’aoina e i latou pepa tui e fa’amaonia ai ua faia latou tui MMR fa’ato’a fa’ataga atu iinei e le Ofisa o le Loia Sili e malaga mai ai i latou.

E pau le suiga ua i ai nei i le taofiga a le Malo sa mua’i faia mai le amataga o le pesia ai o i tatou i le Misela, ona o lea ua fa’ataga e a’e a’oga i le nei vaiaso. O le vasega o Day Care ua toe tolopoina ona tatala mo le tautuaina o fanauiti a le Mamalu lautele o le atunu’u. Ua fa’atulaga e fa’ato’a tatala day Care i le aso Gafua a sau nei, Ianuari 13, 2020.

“Ua mafua lea suiga ona o le fanau e le’i atoa le 6 masina le matutua, lea e le mafai ona faia se tui Misela se’i vagana ua atoa le 6 masina,” o se fa’aaliga lea a le ali’i foma’i o Saipale Fuimaono.

Ona o le vasega lea o fanau fo’i e tatau lava ona faia o latou tui muamua o le MMR i le 6masina ma le 4 tausaga.

I le tulaga o pemita OKBoard, ua fa’ailoa atu ai e le matagaluega o le soifua Maloloina, “O le usita’ia lava o le taofiga o i ai nei e taua tele mo i tatou iinei, ua le tatau ai ona fa’amalosia mai e aiga o tagata iinei i Amerika Samoa e solituina latou aiaiga ua fa’atulaga mo le saogalemu lautele o tagata Amerika Samoa.”

O lea saunoaga e fa’ailoa ai le aiaiga ua fa’atulaga ai le talosagaina e aiga iinei ona talia le ulufale mai o nisi o latou aiga e malaga mai Niu Sila ma Ausetalia. Peita’i o le tele o aiaiga ua le tamau ma fa’ailoa patino i tagata malaga mai.

“Ua mana’omia mai le pepa pasese o va’alele, e mafai ai ona faia le talosaga, totogi lea ae uma ane ua toe mana’omia se isi pepa tui mai Samoa, ua le toe talia le na’o le pepa tui mai Niu Sila, ae taofia lea tui mai Samoa se’ia mae’a pasia mai e le DOH a Amerika Samoa. E o’o atu i le taimi lea, ua toe fa’atali le tagata malaga mai mo le isi 14 aso fa’ato’a mafai ona malaga mai i Amerika Samoa, ae o le aso patino e toe taliu ai i Niu Sila e o’o i ai ae le’i uma le 14 aso lea.”

O nei mea uma e afua ona fa’aletonu, e taofiofi e le tatou DOH fa’amaoniga e ao ina fa’amatu’u ina ia mafai ona talosagaina e le tagata fia malaga mai aiaiga o le tatou OK Board. O ai la e totogia le lusi o tagata malaga lea ua le mafai ona malaga mai ona o nei aiaiga?

O se mea e tiga ai tagata e to’atele, ua tatau la ona faia le fa’aiuga ia le totogia ai pasese o nai tagata ma fa’ailoa i ai e le mafai lava ona malaga mai i le amataga o le tapenaga.

E ui i nei mau mea e tapenapena, ua fa’ailoa e tagata uma lo latou fa’anoanoa aua o mea sa mafai ua le toe mafai, ae o nisi ua latou fa’ailoa mai, “O a na taofiga o lea lava e malaga mai aiga o nei tagata na OK Board mai e le DOH ma le Ofisa o le Loia Sili?”

Afai e moni nei tala, ia malo lava outou, e tali lava le Atua i nei mea e fai nei, afai o fa’amaoni lelei, ae afai o pi’opi’o, ia tali lava le omiga o lagona o le atunu’u ma e i ai fo’i fa’ailoga e iloa ai nei ituaiga o fa’aletonu.

O le aso ananafi na fa’alauiloa mai ai e le Kovana ua toe soso’o nei se’ia o’o ia Fepuari 06, 2020 le tulaga o lo’o i ai le poloaiga fa’alauaitele ona o le misela. Ua toe tatala ai fo’i ma avanoa e fa’aleleia ai pepa o i latou o lo’o ovasteia i Amerika Samoa mo le isi 30 aso, lea ua tau ai ia Fepuari 06, 2020.

O le mana’oga sili lea ua i ai nei o le afioga le Kovana Sili, ia mae’a lea fa’asalafa o tulafono ma aiaiga o e o lo’o ova aso e nonofo ai i Amerika Samoa nai lo aso na fa’ataga ai e pemita, a uma loa ona fa’amalosia loa lea ona usita’ia e tagata uma lava aiaiga o le nofo mau ai i Amerika Samoa.

O so’o se mea lava ua talosagaina i Amerika Samoa nei, e amata mai i pepa talafua ai mea’ai a le ASNAP, se’ia o’o i WIC a le fanauiti ma tina ma’iga, se’ia o’o mai i le fa’afouga o pepa e nonofo mau ai i Amerika Samoa, ma pemita fo’i e talosagaina e malaga mai ai nisi i le atunu’u, ua mana’omia lava le fa’aalia ua mae’a faia ou tui MMR o le misela.

I nei fo’i nofoaga uma ua mataulia lava le uumi o laina o lo’o fa’asolo ai a latou tautua, ona o lo’o ua fa’ailoa mai, ua fa’aopoopo isi pepa mana’omia e aofia ai ma le pepa tui Misela e ao ina mua’i taua’aoina.

O lo’o tatala pea lava nofoaga uma mo le faia o tui MMR o le misela, lea ua tatala Tafuna Health Center mo le fanau e 6 masina le matutua se’ia o’o i le 19 tausaga le matutua, ua fa’apena fo’i le Well Baby Clinic i Fagaalu mai le 8am seia o’o i le 4:00pm.

Ua tatala fo’i Haleck Professional Building Tafuna, o lo’o i ai fo’i ma le avanoa e faia ai tui i le Matagaluega o Alamanuia mo le mamalu lautele i Utulei atoa ai ma le Falema’i fa’aitumalo i Leone ma Amouli.