I le tatala aloaia ai i le taeao ananafi o le ulua’i fonotaga a le Vaega o lo o galulue i le sailia o auala e fa’aleleia ma atina’e atili ai pisinisi i le va o Samoa e lua, na saunoa ai le Sui Palemia sa ta’ita’ia maia le au usufono mai Samoa, e matua lagolagoina e le malo o Samoa taumafaiga ina ia atina’e ia ola lelei pisinisi tua i le va o Samoa e lua.

Na tatala aloaia ai le fonotaga a le ‘Task Force’ mo mataupu tau i pisinisi, i le potu fono a le fale talimalo a le Tradewinds i Ottoville.

O le afioga i le Sui Palemia ia Fonotoe Pierre Lauofo na ta’ita’ia maia le au malaga mai Samoa, lea o lo o aofia ai sui o ofisa a le malo i tulaga tau pisinisi, ae o le Komesina o Palotaga a le malo, le tofa a Tuaolo M. Fruean na fai ma sui o le Sui Kovana e saunoa e talia aloaia ai le toai taunuu mai o le faiga malaga.

O le fonotaga e lua aso lea ua faamoemoe e mae’a i le taeao nei, e le gata o lo o talanoaina ai mataupu e faatatau i auala e faaleleia ai le tautua a pisinisi, ae faapea fo’i mataupu i tulaga tau fefa’atauaiga i le va o Samoa e lua (Trade Talks).

Na taua e Fonotoe le lagolagoina malosi e le malo o Samoa o taumafaiga ina ia faaleleia le sao o pisinisi tua i le va o Samoa e lua.

“Ou te fa’amoemoe o le a mafai ona faaleleia le tautua a pisinisi tua i le va o Samoa e lua, pe afai e mae’a lenei fonotaga, ou te talitonu fo’i, o le a faamanuiaina malo e lua ona o le auaunaga faaauau pea a pisinisi tumaoti,”o se vaega lea o le saunoaga a Fonotoe.

Sa ia taua fo’i le tatau i sui o malo e lua ona galulue soosoo tauau ma pisinisi tua, mo le fa’atulagaina o ta’iala e mafai ai ona siitia ma faaleleia atili le tautua a pisinisi mo le fa’aleleia o le tamaoaiga o malo e lua.

 Saunoa Fonotoe e fa’apea, o le a ofo mai e le malo o Samoa lana lagolago i soo se auala, e mafai ai ona fa’aleleia le itu tau fefaatauaiga ma pisinisi i le va o Samoa e lua.

“O le tulaga lelei o le galulue faatasi o le matou malo ma pisinisi tua, ua mafua ai ona maua e pisinisi le avanoa latou te lagolago malosi ai i le faaleleia o le tamaoaiga o le malo o Samoa, lea fo’i ua manuia ai ma tagata lautele o le atunuu,” o le saunoaga lea a Fonotoe.

I le tulaga o oloa gaosi i totonu o Samoa e lua e pei ona saunoa Fonotoe, o le a mafai ona faaleleia atili tulaga o fefaatauaiga i oloa nei pe a mautu ta’iala e fa’atula’i e le Vaega Faapitoa ua tofia e galulue mo le fa’aleleia o pisinisi.