Na ogatotonu le saunoaga a le afioga i le ali’i Komesina o le Matagaluega o Leoleo ia William E. Haleck i le taimi o le tauaaoina atu o fa’ailoga taualoa mo ni isi o ali’i ma tama’ita’i leoleo i le taeao o le aso Gafua, i lona fautuaina lea o leoleo sa auai i lenei fa’amoemoe, ina ia finau pea e tautua le atunu’u ma fa’amalosi le tulafono, tusa lava po o a faitioga e avatu ia te i latou.

O le sauniga na faamanuiaina ai ali’i ma tama’ita’i leoleo mai lala eseese o le Matagaluega i ni fa’ailoga taualoga, ina ua filifilia i latou e avea ma “Leoleo o le Kuata” po o “Leoleo fo’i o le Tausaga 2014”.

Na fa’afetaia e Haleck le tulaga maualuga ma le mataina ua mafai ona ausia e ni isi o leoleo i le fa’atinoina o a latou tiute i totonu o le matagaluega, atoa ai ma le tautuaina o le atunu’u.

“Ua ou lagona le mitamita i la outou tautua matavela i so o se taimi, ua lagona fo’i le agaga fa’afetai i lo outou tula’i mai e fa’atino la outou pito laau o le fa’amalosia lea o le tulafono ma puipui le saogalemu o le atunu’u lautele, o la’u tatalo, ia fa’aauau pea a outou galuega lelei mo le atunu’u, tusa lava pe faitioina outou e tagata”, o se vaega lea o le saunoaga a Haleck.

Sa ia taua fo’i e fa’apea, e ui i fa’asea ma faitioaga fa’asaga i leoleo, ae maualuga lona talitonuga o lo o fa’atinoina e leoleo le mea sili atoa ai ma lo latou faia o mea lelei mo le atunuu lautele.

Saunoa le susuga ia Captain Muagututia John Cendrowski e fa’apea, o le sauniga mo le fa’apineina o leoleo mo lenei kuata, o se polokalame o lo o fa’aauau pea e le matagaluega i kuata taitasi, e sailia ai le leoleo o lo o galue malosi ma finau pea mo mea lelei i le matagaluega ma le atunu’u.

O ni isi o leoleo sa mafai ona aloaia faapitoa la latou tautua, o le susuga i le ali’i leoleo ia Motu Tafaovale mai le Ofisa o Leoleo i Leone, lea na filifilia e avea ma “Leoleo o le Kuata 4, 2014” mo le Ofisa leoleo i Leone, ma ua tula’i mai ai, o le fa ai lenei o kuata sosoo o filifilia o ia na te tauaveina lea tulaga.

Na fa’afetaia e le Komesina ma Ta’ita’i Leoleo le susuga a Tafaovale, i lona galue malosi ma le le fa’alogologo tiga i le fa’atinoina o ona tiute tauave.

O le isi ali’i leoleo sa taualoa fo’i lana tautua, o le ali’i leoleo su’esu’e ia Det. Filemoni Amituana’i, lea na filifilia e avea ma “Leoleo o le Tausaga” o le tausaga mo le Vaega o Leoleo Su’esu’e.

O i latou la nei sa fa’amanuiaina i fa’ailoga taualoa o le “Police Officer of the Quarter - 2014”, lea sa mafai ona tauaaoina atu e le Matagaluega o le Puipuiga o le Saogalemu Lautele.

1. LEONE SUB STATION, PSO. Motu Tafaovale.

2. CID, Det. Wells ma Det. Gaui Seanoa.

3. PATROL DIVISION, PSO. Godinet Mamea

4. TRAFFIC DIVISION, PSO. Nancy Soloafa

5. FAGAITUA SUBSTATION, PSO. Genevive Manutulila.

O i laua e to’alua na fa’amanuiaina i fa’ailoga o le “Police Officer of the Year - 2014”, ua fa’amanuiaina ia Det. Filemoni Amituana’i mai le vaega a le CID, ma PSO. Siaosi Siulua mai le vaega a le Traffice Division.

O lenei faamoemoe sa molimauina e uo ma aiga o ni isi alii ma tamaitai leoleo sa faamanuiaina i pine ma faailoga taualoa.