O le taumafai ina ia taofia fa’afitauli o loo masani ona alia’e mai i taimi o ta’aloga a fanau aoga, o le femisaa’i ma le taua’imisa, a ia maua e fanau aoga le agaga o le fealofani ma fefa’auoa’i, o le mafua’aga autu lea na faia ai se ta’aloga fefa’auoa’i a ‘au Football a le Aoga Maualuga a Leone ma Tafuna i le taeao ananafi, ina ia mautinoa e lava tapena fanau mo lea lu’itau a’o lumana’i ai le ta’amilosaga Football o lenei tausaga.

Na taua faiaoga a ‘au e lua ia Aaron Samoa mai le aoga a Leone ma Auckland Salave’a mai Tafuna le taua tele o le mafutaga a fanau aoga, ua mafai ai ona fa’amasani ‘au ta’aalo ina ia amata fausia se mafutaga mafanafana i fafo o le malae, a’o le’i oo atu i le taimi e fa’atinoina ai le ta’aloga.

“E ui e taua le taalo ina ia manumalo, peita’i ua ese fo’i se lagona ia i matou o faiaoga i lenei vaitau, ua tatau ona vaavaai i ni auala e foia ai le tutupu soo mai o misa ma fusuaga i taimi o ta’aloga a fanau aoga,” o le saunoaga lea a Salave’a i le Samoa News.

“E le gata la ua matou galulue e fausia se si’osi’omaga fou mo fanau aoga ina ia maua le fealofani, ta’aalo fa’atasi ma fa’amasani, a ia mafai fo’i ona maua le avanoa e atia’e ma fa’aleleia ai le taleni, aua o isi nei auala ua manuia ai aiga i le atunuu ma Amerika, o le ta’algoa Football,” o le saunoaga lea a Salave’a.

Na matua fa’atumulia le malae a le aoga maualuga a Leone i matua, uo ma aiga o ‘au ta’aalo e lua, na lolofi atu e molimauina lenei fa’amoemoe taua.

E oo foi i le pito laau a faiaoga ma ‘au ta’aalo, sa vaaia le lava tapena o ‘au e lua mo le ta’aloga fefa’auoa’i, lea na amata i le itula e 11:00 ae mae’a ina ua te’a le itula e 1:00 i le aoauli, ma maua ai loa le avanoa e fefa’asoaa’i ai faiaoga ma fanau i le taua o le mafutaga sa faia.

Na fa’amalulu le susuga a Samoa i le mamalu o matua faapea ai uo ma aiga sa lolofi atu e molimauina lenei ta’aloga fefa’auo, ona o ni isi o gaioiga sa latou molimauia i le taimi o le ta’aloga i le va o ali’i ta’aalo.

“O le agaga atoa o faiaoga, ia toto i loto o fanau le agaga o le ta’aloga, e le o le faamisa poo le manumalo, ae o le fealofani ma ia maua le agaga o le ta’alo fiafia ma le isi uo,” o le saunoaga lea a Samoa i ‘au e lua faapea ai le aofia sa molimauina fa’ai’u o leei fa’amoemoe.

“O le isi taua o le ta’aloga fa’amasani i lenei aso, ua iloa ai vaega e moomia ona fa’aleleia i ‘au uma e lua, ua iloa ai le tagata e tatau ona muamua ma le tagata e sosoo atu ai, e le gata i lea, ua mafai ai fo’i ona tatou iloa poo ausia uma vaega sa tatou a’oa’oina i vaiaso e tele sa tatou koleni ma fa’amasani mai ai,” o le saunoaga lea a le susuga a Samoa.

I lana lu’i mo ali’i ta’aalo, sa ia fautuaina ai i latou ina ia fa’ataua le avea o le ‘au ma siamupini i le fa’aiuga o le ta’amilosaga.

“E le o tatou lea e siamupini i le taimi nei, e le o Leone poo Tafuna, o Fagaitua lea o loo siamupini, o le itu i Sasa’e, lona uiga, o le manulauti la lena o le ta’amilosaga atoa lenei, taumafai ia manumalo ia Fagaitua ma toe fa’afo’i mai iinei le siamupini,” o le lu’i lea a Samoa i ‘au e lua.

Na taua e Samoa i le Samoa News, e i ai vaega e moomia ona toe fa’aleleia mo lana ‘au a’o le’i amata le ta’amilosaga, ina ia mautinoa e tulaga manuia lana ‘au i le ta’amilosaga o lenei tausaga.

Ina ua fesiligia e le Samoa News le ali’i faiaoga pe ua sauni lana ‘au e toe aveese mai le siamupini ai ia Fagaitua, na soisoi le susuga a Samoa ma saunoa e fa’apea, “O le agaga maualuga lena, ia manumalo i le fa’aiuga o le ta’amilosaga, ae o le a vaavaai atu lava i ai.”

Sa faafetaia fo’i e Salave’a ma Samoa le fesoasoani a le Fa’atonusili o le Matagaluega o Tupulaga Talavou, Tina ma Tama’ita’i ia Jonathan Fanene e tusa ai o meataalo ua mafai ona maua e ‘au ta’aalo mo lenei tausaga.

Ina ua fesiligia le susuga a Fanene e tusa ai o lenei foa’i, sa ia taua ai e fa’apea, o le agaga maualuga i le latou Matagaluega, ia mafai ona fesoasoani i soo se auala e atia’e ma fa’aleleia ai ta’aloga mo fanau aoga.

Saunoa atili Fanene e fa’aoea, o meataalo ua mae’a ona tufatufa atu i ‘au ta’alo, o ni fesoasoani sa mafai ona tu’u fa’atasia ina ua malaga atu i fafo i ni isi o uo ma alo o le atunu’u sa latou ta’aalo fa’atasi i le NFL i tausaga ua mavae, ma talosagaina ai la latou fesoasoani mo ni meataalo, lea la na maua mai ai loa meataalo e pei ona tufatufa atu i ‘au ta’aalo.

“O le agaga maualuga fo’i lea i le ali’i kovana ia Lolo Matalasi Moliga, ia mafai fo’i ona fesoasoani atu la matou matagaluega i le pito laau o loo tauave e le Matagaluega o Aoga i le atina’eina o ta’aloga a fanau aoga, atoa ai ma le fesoasoani o loo maua mai e le susuga a Troy Polamalu i tausaga ta’itasi, ina ia mafai ai pea ona fesoasoani atu i le atina’eina o taleni a fanau,” o le saunoaga lea a Fanene.