E silia i le 50 poloketi o galuega fa’atino o le Tala Fa’asolopito o so’o se tasi iloga o le Lalolagi e o’o lava i Samoa nei, ua mae’a tusia ma fa’aalia e le fanau a’oga a Malisi ma Fa’asao ma ua fa’amasinoina nei, ina ia maua ni galuega e fai ma o latou sao i le tauvaga Talafa’asolopito i le teritory. Peita’i, a mae’a lea, o le a fili fa’apitoa mai ai fo’i ni poloketi a le tatou territori e fa’aofi atu mo le tauvaga a le Iunaite Setete, e faia i le Iunivesite o Maryland, i Amerika.

O le manulauti sa saili i ai ni galuega fa’atino a le fanau e ‘au’au lea i ni “Ta’ita’i Iloga, latou Tautua ma latou Galuega na fa’atino a’o avea ma Ta’ita’i.” O lea ulutala, sa saunia mai fo’i e le Iunivesite o Maryland mo lenei tausaga ma lona tauvaga. Na mafuli le fanau a’oga mai le vasega 9 se’ia pa’ia le vasega 12, e fili mai ta’ita’i o le lalolagi, i so’o se matata, e o’o lava i ta’aloga, ua fa’atasia i lea fa’aaliga taua.

Mai le ituvai o tama’ita’i iloga, sa tula’i mai ai le tama’ita’i o Amelia Libra, vasega 12, ma fa’ailoa mai le aoga tele o le tautua a le Tina o Tiresa po’o “Mother Theresa.”  Ua tolaulau uma mai le amataga o le olaga o Tiresa se’ia o’o ina toe alu e a’oga fa’afoma’i ina ia a’otauina o ia e mafai ai ona ia galue fa’atausima’i i le to’atele o fitafita fa’amanu’alia i le taua i ona vaitau.

E le gata i lea, o i latou e mana’i, a totogia o ia, e toe fa’aaoga e ia ana ia tupe e fa’atau ai vaifofo mo togafitiga o e gasegase.

E to’alua taulele’a sa la’ua filifili e la te tau’avea le mau a le ali’i o Nelson Mandela mai Aferika i Saute. O i la’ua nei o Denmore Inductivo ma Laufoe Atonio o le vasega 12. Ua lauiloa Mandela i le tele o lana galuega fa’atino mo tagata nu’u o lona malo, ina ia aia tutusa ma papalagi i a latou upufai fa’atasi ai ma lona taumafai e atina’e ona tagata, e tele taimi sa fa’afalepuipuia ai o ia, ae le’i fa’afiti ai lona tula’i pea e tau’ave lana mau mo ona tagata.

E le o fa’avaivai fanau a’oga e tau’ave o tatou ta’ita’i, ua i ai le galuega fa’atino sa fa’aautu mo Kovana Uifa’atali Peter Coleman, sa saunia lea e le tama’ita’i o Katielynn Hopkinson mai le vasega 12. O Uifaatali o le ulua’i Samoa, na avea ma kovana o le teritori.

O le galuega fa’atino a Celeste Nicole Lim o se tama’ita’i e tupuga mai i Filipaina le latou aiga, sa ia fa’aalia le ulua’i tama’ita’i na avea ma peresetene o Filipaina, Corazon Aquinos, ma o le ulua’i o’o fo’i lea o le fa’a-Temokalasi i totonu o lea malo, ma sa fa’ato’ilaloina e ia le faigamalo a le ali’i sa tele ma logologoa lona tala’aga fa’aletonu o Ferdinand Marsos, ona o tupe a lea malo sa ia natia ma fa’aaoga mo ia i ana teugatupe i Amerika.

I le tulimanu lanu mumu o le fa’aaliga, sa tutula’i mai ai le tala’aga ta’uta’ua o se tagata na ia taumafai e liliu le lalolagi, ma sa toeititi lava a mafai, le ali’i o Adolf Hitler, e fa lelei ona tala’aga. O le sui sa ia fa’atinoa lea poloketi o Jummas Vigas Level 10 ma ana soa e to’atolu.

Le Tala i A’ai e Lua, ma le tama’ita’i sa tula’i mai ai i ona vaitaimi e nei fevesia’iga, “Joan of Arc” na avea ma poloketi fa’atino o le tala fa’asolopito a Bonita T. Smith o le vasega 12. Ua toe tepa i le vaitausaga e 1412 se’ia o’o i le 1431.

Le peresetene sili ona alofagia e Amerika i lona tula’i mai, John F Kennedy, sa avea ma ta’ita’i e talatala mai e Josephine Orianna Iose o le vasega 12 ma sa ia fa’amamafa lava le fuaitau iloga a lea ta’ita’i, “Aua e te fesiligia se mea e faia e lou malo mo oe, ae o se mea e te faia mo lou malo.”

I le fa’asologa o galuega a le vasega 10 ma le vasega 9, ua fa’atauaina ai le tele o alo o Amerika Samoa ma ta’ita’i fo’i o Samoa na lua. Ua i ai se galuega sa tusia ma talatala mo “Tony Solaita” ulua’i alo na ta’uta’ua ai Samoa i lana ta’aloga o le Baseball.

Na i ai le tala’aga o Junior Se’au sa ta’uta’ua fo’i o ia ile ta’aloga o le Football mo le San Diego Chargers. Ua i ai fo’i le galuega ua fa’aali ai galuega na fitaituga ai le afioga le Kovana Tauese Pita F. Sunia, ae o lo’o i ai fo’i le galuega matagofie mo Kovana A.P. Lutali o Amerika Samoa, ma ana fo’i matati’a sa soifua ma galue ai mo ona tagatanu’u ma lona malo. O le galuega lea sa fa’atino e Faleatua Afoa o le vasega 12.

O lo’o i ai le galuega fa’atino mo Tupua Tamasese Taisi Tufuga Tupuola Efi na saunia lea e Isa-Lei Falaniko. Ua aotelega fo’i i ai galuega fa’atino a lea ta’ita’i i le otootoga ma le talatalaga ua mae’a tusia. O se tasi o galuega e ‘auga i le vaitau o le tau tapenapena o le Mau a Samoa Tuto’atasi sa fa’atinoa lea e Vidya Singh o le vasega 12. O le tala’aga lea o Lauati Namulauulu Mamoe, o se tasi sa agaga tele ia aua nei solo le falute i tu ma aga a Samoa ae maise i ana upufai o malo, i le vaitausaga 1908-1909.