O le fa’aauau pea ona maua o fualaau fa’asaina e pei o mariuana ma le aisa i totonu o afioaga eseese i le atunu’u, aemaise ai o le umia o a’upega mamafa lea lava ua i’u ina manu’a ai se ali’i leoleo i le fa’alavelave lea na tula’i mai i le tausaga na te’a nei i Lepuapua, ua fesiligia ai e le Kovana Falelima I Sisifo galuega a pulenu’u ma leoleo nu’u o lo o fai i totonu o nu’u.

“Ua tele fa’alavelave mata’utia ua tutupu i le atunu’u i le taim nei, ua tafana leoleo, ave i le falema’i, toto mariuana, tele le aisa, a o fea o i ai pulenu’u ma leoleo nu’u na tofia e galulue e puipui ma fa’amalosia tulafono a nu’u”, o le saunoaga lea a Lualemaga E. Faoa.

Na taua e se tasi o matai mai se tasi o afioaga i le Falelima i le taimi o le fonotaga e fa’apea, o lo o matua malosi ma mamalu pea lava pulega a le latou nu’u talu mai le 6 tausaga talu ai, o le mafua’aga fo’i lena e leai ai ni fa’alavelave e tutupu i totonu o le latou nu’u.

Ae na fa’auilavea Lualemaga ma saunoa e fa’apea, “e fa’afefea la ona tupu le mea lea i la outou afioaga, e mautu ma malu puipuia a outou leoleoga i afiafi ae maua e leoleo mariuana i totonu o fale o aiga o le nu’u?”.

Saunoa Lualemaga e fa’apea, e mafua ona tutupu fa’alavelave ma a’afia ai le saogalemu o le nu’u, e le o faia galuega a pulenu’u ma leoleo nu’u, o le ripoti o mea fa’aletonu latou te vaaia i le pulega a ali’i ma faipule o le nu’u.

“Afai e iloa e oe le pulenu’u ma le leoleo nu’u se tagata o lo o toto mariuana ma fa’atau le aisa, ta’u i ali’i ma faipule tagata na, ona fai lea i ai o le fa’asalaga fa’a nu’u, ae le o le solomua ia oe le Pulenu’u ma le Leoleo nu’u le fiafia e kifa kifa ai ma le au vaega ula mariuana ma le aisa”, o le isi lea fautuaga fa’ata’ita’i a Lualemaga i le fonotaga a le Falelima.

Sa ia fautuaina fo’i sui o le Falelima e fa’apea, afai fo’i latou te silafia ni leoleo a le malo o lo o aofia ai i le fa’aaogaina o mariuana ma le aisa, e tatau fo’i ona logo pulega a ali’i ma faipule ina ia fai i ai se fa’aiuga ma foia ai ni isi fa’afitauli e ono tutupu mai ai.

“Ua mana’omia lo tatou galulue fa’atasi ma le malo e puipuia ma taofia le toe tutupu mai o fa’alavelave matuia nei i le atunu’u”, o le saunoaga lea a Lualemaga.

Na taua e se tasi o matai o le Falelima e fa’apea, o le isi fa’ata’ita’iga lelei o lo o faia e lona nu’u i le taimi nei i taimi o leoleoga i le afiafi, e le gata e leoleo taulele’a ae fa’apena fo’i ona auai ma Tamali’i o le nu’u, ina ia mautinoa e malosi ma mamalu pulega i taimi o afiafi ma aso uma o le olaga.

O le to’atele o tamali’i ma sui o le Falelima na maua le avanoa e tulei saunoa ai i le taimi o le fonotaga, e le gata sa latou lagolagoina le tatau lea ona galulue fa’atasi nu’u ma le malo, ae sa latou lagolagoina fo’i le tatau lea ona mautu tulafono i totonu o nu’u, ina ia mafai ai ona puipuia gaioiga a tagata o le nu’u.

Na fautua le afioga i le Fofoga Fetalai ia Savali Talavou Ale i sui o le Falelima, e taua le fa’amalosi ma fausia tulafono a nu’u ta’itasi e puipuia ma lima taitaiina ai amioga i totonu o le nu’u, a ia manatua, e le tatau ona fete’ena’i tulafono a afioaga ma tulafono a le malo o lo o i ai.

Ua taoto atu nei le mamafa o le galuega i pulega a ali’i ma faipule, aemaise lava fo’i i ali’i mautofi o afioaga taitasi, ina ia galulue e fa’amalosia tulafono i totonu o nu’u ma taofia ai le toe tula’i mai o ni isi solitulafono matuia i le atunu’u.