Ua fautuaina e le Ofisa o Aoga ia faiaoga uma i le atunu’u ina ia amata fa’aaoga tusi aoga (e-textbooks) ia o lo o maua i luga o fesootaiga tau initaneti e pei ona ta’atele i ona po nei, ina ia fesoasoani ai i le a’oa’oina o fanau aoga, nai lo le tagi mai i le malo e fa’atau atu tusi aoga e a’oa’o ai fanau aoga, a o lea fo’i e feagai le malo ma fa’afitauli tau tupe i le taimi nei.

I se fonotaga ma tusitala i le vaiaso na te’a nei, na fa’amanino ai e le afioga i le Fa’atonusili o Aoga a le malo ia Vaitinasa Dr. Salu Hunkin Finau le mae’a lea ona taoto atu o lenei fautuaga i faiaoga, ina ia fesoasoani ai i le tulaga moomia o tusi aoga mo le a’oa’oina o fanau aoga.

Saunoa Vaitinasa e fa’apea, e taugofie atu le fa’aalu e le ofisa o aoga o le tupe e fa’atau mai ai le computer e tasi, ona fa’aaoga lea o le computer lea e saili mai ai tusi aoga mai luga o le initaneti (e-textbooks) e fa’aaoga e fanau aoga, nai lo le fa’atau mai o tusi aoga e tofu ai le tamaititi ma le tusi aoga e tasi.

“E le o taitai gafatia e le paketi a le ofisa o aoga manaoga o lo o tagi mai ai faiaoga ma aoga ta’itasi, e ui o se galuega e tatau ona fa’atinoina e le ofisa o aoga, peita’i a fuafua atu i le paketi o lo o maua mai i le malo lea e na o le 20% o le paketi e fa’atupe mai i tupe lotoifale, ae o le 80% e fa’atupe mai i tupe feterale, ona manatu ai loa lea, e le taitai gafatia e le malo ona fa’atupe manaoga tau i tusi aoga o lo o tagi mai ai faiaoga,” o le saunoaga lea a Vaitinasa.

“E leai lava se isi auala e mafai ona fesoasoani atu ai le malo i le tulaga o tusi aoga, e pei o le fautuaga lea ua tu’u atu i faiaoga, e fa’aaoga ‘e-textbooks’ e a’oa’o ai fanau aoga e taugofie, nai lo le tagi mai i tusi aoga ae le gafatia e le malo ona fa’atupe”.

Na fa’atepa e Vaitinasa le tulaga televave ua i ai le atamai o fanau aoga i ona po nei, fa’atusatusa i tupulaga ua mavae atu, ma ia taua ai le televave o le poto ua maua e fanau aoga o lo o aooga i aoga tulaga lua i le taimi nei, e ala lea i gaioiga ua mafai ona molimauina i totonu o aiga.

Na taua e le tama’ita’i fa’atonusili le to’atele o fanau aoga o lo o aooga i aoga tulaga muamua i le taimi nei, ua mafai ona latou fa’aaogaina masini computer i totonu o aiga ma aoga, e oo lava fo’i i ituaiga telefoni ma isi masini e pei o le “iPad” lea ua a’e mai i ona po nei, toeitiiti leai se tamaititi aoga e le iloa fa’aaoga.

Na teena e Vaitinasa manatu o lo o manatu i ai ni isi o matua fai mai, o le teena e le malo o le talosaga mo le fa’atauina o ni tusi aoga e a’oa’o ai fanau aoga, ua atagia mai ai le le manatu mamafa o le malo i le a’oa’oina o fanau aoga.

“O ‘e-textbooks’ ia o lo o maua i luga o initaneti, o lo o maua uma ai lava mataupu o lo o moomia mo le a’oa’oina o fanau aoga, e sili atu ona faigofie le fa’aaoga o ituaiga tusi aoga ia nai lo le tufa atu i fanau aoga o tusi aoga mafiafia mai mataupu ta’itasi, lona uiga e gau le tamaititi i le tau amoina o lana ato aoga o lo o tumu i le mau tusi aoga mamafa, ae emo ane le ata ua leiloa ona toe alu fo’i lea o isi tupe a le malo e toe fa’atau ai isi tusi aoga fou,” o le saunoaga lea a Vaitinasa.

O le isi fa’afitauli i le fa’aaogaina o tupe fesoasoani mai fafo e pei ona saunoa Vaitinasa, e i ai ta’iala e lima ta’ita’iina ai le malo i le fa’aaogaina o tupe fesoasoani nei.

O tupe fesoasoani mai le feterale lea e maua e le ofisa o aoga, e le fa’atagaina ai ona fa’atau ni tusi aoga, se’i vagana ai le fesoasoani e fa’atau isi mea faigaluega (materials) e fesoasoani i le a’oa’oina o fanau aoga, e le mafai fo’i ona fa’aaoga e fa’atau ai ni nofoa ma ni kesi mo fanau aoga.

“Na pau le tupe o lo o mafai ona fa’aaoga e le ofisa o aoga e fa’atau ai tusi aoga, kesi ma nofoa mo fanau aoga, o tupe fa’alotoifale o lo o maua mai i le malo i tausaga tupe ta’itasi, peita’i o le fa’afitauli o tupe lotoifale o lo o maua mai i le malo, o le 90% o lea vaega tupe e alu i totogi o faiaoga, ae o le 10% e totoe ai, tusa lea o le $1 miliona e alu i le fa’atinoina o isi manaoga e aofia ai le fa’atauina o mea e fa’atino ai galuega a faiaoga (materials), e fa’aaoga fo’i e fa’atau ai tusi aoga, nofoa ma kesi, ma o lea tupe e le taitai ona lava e fa’atino ai manaoga mo aoga uma i le atunu’u e aofia ai aoga a le malo ma aoga tua”, o le saunoaga lea a le tama’ita’i fa’atonusili.