Faamalo le onosai i le mamalu o le aufaitau, ae sosoo ane loa lau faitau i le toe faaauauina lenei o le tatou tala faasolo i le tama o le CIA o Eteuati.

Na tei le tama o Eteuati ina ua alu atu se van lanu uliuli o loo o atu ai tagata e fai a latou mata pulepule ma ave faamalosi o ia. E toafa alii na o atu i le van, na ona latou maua atu lava o le tama faapulou i se ie uliuli ma latou aveina loa o ia, sa sauni foi aupega a le au alii ia mo se tagata e ono faalavelave atu i a latou gaioiga faatupu faalavelave.

Ua le iloa e le tama poo fea lea ua ave i ai o ia, o lea na ia fesili atu ai i le au alii ia, "Se faamolemole poo fea lea ua outou aveina ai au, ae o ai foi outou faamolemole,?" o le fesili lea a le tama. "E fia se tupe ou te tuu atu ia te outou ae toe tatala au faamolemole, afai foi o ni faamatalaga tou te fia iloaina, tou te le mauaina atu na tala ia te au."

Na fiu Sera e faatali Eteuati i le faleaiga e pei ona la tuutala, ma ua savali atu nei i le lua vaiaso talu ona ave faamalosi e le vaega leaga le tama, ma ua ave nei ma tuu i se falepuipui faapitoa e leai se isi na te iloaina, pau le mea sa lelei lava ona tausi ma fafaga o ia e le vaega lea. O le fiu o Sera e faatali Eteuati na mafua ai loa ona alu i lona ofisa ma fesili i lana failautusi pe na te iloa le mea o i ai o ia, peitai o le tali na tuu ane, e leai se isi na te iloaina, na oo lava foi i ana fonotaga ma nisi o tagata sa faatulaga, ua toe sui uma aso o ia fonotaga.

Ua polona uma mea talu ona le faigaluega e aso e lua Eteuati, ua le le fa'ao'oina le tele o fono na tu'u nei e fai e Eteuati. O le mea tonu lava na manana'o ai tagata ia na ave fa'amalosia le tama o Eteuati, ia iloa e le latou au-faigaluega ua le o'o atu le tama e faigaluega.

O le isi mea na mautinoa ai, ona na vaai ai le ta'avale i le pakaga o la e paka ai, ma le tusi lea na tu'u ai i totonu o le ta'avale le tupe e mana'omia e $5 miliona, Banking Coopperation o le soso'o ai.

E au fo'i nei vili mai, ae na o le fa'atali mai o le toeaina o Selefuti i le vili atu o le vaega lea, e aua ne'i tautala mai na o le fa'alogo mai i le taimi e vili atu ai. Aua ne'i i ai Leoleo, a i ai loa Leoleo ua uma le tatou talitonu le isi vaega i le isi vaega. O le PLO.

O le teine o Sera, ua alu atu nei i lona tama na fai atu i ai, "O le a sou mafaufau i lenei mea ua tula'i mai ?, o a'u oute mana'o lava e fai lenei mea ua tusi mai, ma vaai lea i le leaga tele o tou mea na fai o le tou nofo ma fa'atupe ia isi vaega lena e pei e to te ta'aalo i ai."

O le toeaina lenei o Selefuti, ua le iloa se mea e fa'aalu ai nei ona tupe ia e maua, nonofo loa ma isi toeai'ina Billionea sa fa'atupe ia 'au vaega tete'e i malo tau Arapi e faia solo tete'e.