Vaega: 84

Fa’afeiloa’i atu i le alafa’i mai o le atunu’u i lenei taeao fo’u, taeao toto’a, taeao manuia i le alofa ma le agalelei o le Atua. E ao ai ona o tatou fa’apea ifo, “Le Atua mamanae e, o le vi’iga ma loto maualalo matou te fa’afo’i atu i Lau Afio, ona o mea silisili E te faia pea mo o matou tagata, ia vi’ia lava Oe e fa’avavau, Amene.”

Ua amata nei le fonotaga a i latou o lo’o maua tofi maualuluga i totonu o le nofoaga fa’apitoa lenei a le Ami a le Malo Tele, o lea o lo’o au ai ma Nancy Jaxx, ona ua maualuga lona tulaga i totonu o le vaega a le Ami. Ua lagona le popole o Philip Russell, ona ua va’ai atu nei o mea masei mea nei ua tutupu mai. Ua na o le pupula to’a nei i ata ma su’esu’ega, ae sa toe fesili lava, po’o ai na pu’eiina ata, na tali Peter Jahrling o Tom Geisbert.

Na toe fesili Philip Russell, pe o le a le mea ua mautinoa ai o le Ebola, e le taumate o le Malburg fo’i lea. Ae na fa’amalamalama e Peter Jahrling lona manatu e le o le Malburg, ona o le toto o Mayinga lea na a’afia ma maliu i le virusi o le Ebola Zaire, e fa’alua ona faia i ai ana su’esu’ega o lea ua ia mautinoa ai.

A’o faia le tautalaga a le ali’i foma’i o Peter Jahrling sa taumafai lava ina ia fa’ailoa i le fonotaga, e tali tutusa lava ma le Ebola, ma e aiga ma le Ebola pe tali tutusa fo’i, e le taumate o se isi ituaiga virusi fou, e ‘ese mai le Ebola.

Ina ua ma’ea le fa’amalamalamaga a le ali’i foma’i o Peter Jahrling, na fa’apea ane nei Commander Russell, “Ua o tatou i ai nei i tulaga tau fa’alavelave fa’afuase’i, o lona uiga o se mataupu ua sili atu ona ogaoga ua o’o nei i ai le Vaega a le C.D.C ma Vaega a le Ami a le Malo Tele.

Na fa’asolo le tilotilo a Commander Russell i le vaega o lo’o latou fetufa’ai nei, ma fesili loa, “O le a la le mea o le a fai nei?” Na toe fesili, pe ua i ai ni fa’amaumauga mautu e iloa ai o le virusi e mafai ona fa’aaogaina le ea, e fealua’i solo ai ma a’afia ai tagata. O le tali, ioe, ua i ai fa’amaumauga, e mata’utia, ae e le i fa’amae’aina, o le Ebola atonu e mafai ona fealua’i i le ea.

Na fa’amatalatala nei e Nancy Jaxx i luma o ta’ita’i nei, ia manuki e lua sa ola lelei lava, ae fa’ate’ia o ia, ina ua mama’i ma mamate ai lava i le virusi o le Ebola. O le mea lea na tupu i le tausaga 1983 ina ua mavae le pepesi o le virusi ma maliliu ai tagata i totonu o Aferika.

E tele lava isi fa’amaumauga ma mea na tutupu, e iloa ai, e mafai e le Ebola ona fa’aaoga le ea, e fealua’i ma sosolo ai, ma a’afia ai le tagata soifua fa’apea ma manu. Ua toe fa’amatala nei e Nancy i le au uso fono a le Ami, le isi a la su’esu’ega na fai ma le ali’i foma’i o Eugene Johnson i le tausaga 1986. Fai mai na fai ai e le ali’i foma’i lana su’esu’ega, ina ia manava e manuki le ea o lo’o i ai le virusi o le Ebola ma le Malburg ma alu sa’o i o latou ma ma.

O manuki uma lava sa i ai, na mamate uma, ae tasi lava le manuki na ola mai ai, mai le virusi o le Malburg.

E faia pe ...

Fa’aliliu: Akenese Ilalio Zec