Taeao manuia i le alafa’i mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai i lenei aso, ae alo maia, o le a toe fa’aauau atu la tatou tala e pei ona masani ai.

I le masina o Fepuali 1990, na fai ai se su’esu’ega a se ali’i foma’i manu o le kamupani a le Hazelton, o le a fa’aioga lea ali’i i a John Coleus. Ua ave’ese e le ali’i ma ma o le manuki, ai ona o le naunau o le ali’i i lona fia mautinoa po’o le a le mea lea e tupu i manuki, o lea na se se ai lana tipi, ma lavea ai lona lima.

Ua a’afia le lima o le ali’i i le toto o le manuki, o lona uiga ua tele lava le afaina o lenei ali’i. Fai mai, o le toto na i le ma ma o le manuki ma le toto o le tino o le manuki ua alu nei i totonu o le manu’a o le ali’i lenei. Ona o le nofoaga lea e fiafia tele le virusi o le Ebola e nofonofo ai.

O le vaega la o le manuki lea na ave’ese e le ali’i lenei, ua ave fa’avavevave nei i le nofoaga a le Ami, USAMRIID e su’esu’e ai. O le ali’i o Tom Geisbert na feagai ma le galuega lea. Fai mai, na maofa le ali’i o Tom i le va’ai atu, ua matua’i fa’atama’ia lava ma ma o le manuki i le virusi.  O lea ua fa’amatala nei e le ali’i foma’i o Peter Jahrling i le ali’i tusi tala o Richard Preston le mea na tupu i lea aso.

Fai mai, na i ai le manatu o tagata uma o lo’o i totonu o le nofoaga a le Ami, o le a maliu le ali’i o John i le virusi o le Ebola. Peita’i, sa i ai le manatu o le vaega a le C.D.C, e le tu’ua John i totonu o se falema’i, ma na alu ai loa le tafaoga a John i totonu o pa pia, o fale fa’afiafia ma inu ai. Ae sa le tatau i le Vaega a le C.D.C ona faia lea tulaga, ona o se virusi mata’utia lenei virusi. Peita’i, ua le taofiofi le ali’i o John ae ua alu tafao fa’atasi ma ana uo, e foliga mai e leai se mea o tupu ia te ia.

O le tulaga ua o’o i ai le fale na i ai manuki ia na toe avane mai Filipaina, ua mamate uma, e le i toe faia i ai se galuega a le Vaega a le Ami a le Malo Tele ma le C.D.C ona ua tu’u pea se i va’ai po’o le a le tulaga e o’o i ai i le virusi o le Ebola.

Ae o i latou uma na i ai le manatu ua a’afia, e i ai le au faigaluega a le ali’i foma’i manu o Dan Dalgard, fa’apea ma ali’i foma’i e to’alua o le Ami, o Peter ma Tom, e leai se tasi na tigaina pe na a’afia i le virusi o le Ebola. Ua tau sa’o ai le manava a le ali’i foma’i o Peter Jahrling, ona o ia lava lea sa tulimata’ia o la toto ma le ali’i o Tom Gisbert, lea na fai ai ana su’esu’ega.

Ina ua maua le feiloa’iga a le ali’i tusi tala o Richard Preston ma le ali’i foma’i o C.J. Peters, na fa’ailoa ane ai e le ali’i foma’i e fa’apea, o ia sa matua’i fefe lava ma popole i lenei virusi o le Ebola. O uiga fo’i o le Ebola lea na maua ai tagata faigaluega nei, e foliga mai ua na o se ma’i fu lu, (flu), ma le ma’i fiva, a’o nisi tulaga ogaoga e pei ona maua ai nai isi tagata ma maliliu i totonu o Aferika, e le i a’afia ai.

Atonu, ua na o sina vaega o le virusi lea na o’o ane i talane o Uosinitone, lea na a’afia ai i latou nei. Ae e le fa’atusatusalia le mata’utia o lenei virusi lea na a’afia ma maliliu ai le tele o tagata i totonu o Aferika, fa’apea ma Siamani i tausaga ua tu’ana’i.

E faia pea…

Fa’alilu: Akenese Ilalio Zec