E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea ua aga’i atu ai Kati i isi potu o le fale talimalo lea o lo o nofo ai, e saili po o fea tonu le potu o lo o faamautu ai le vaega faatupu faalavelave.

Na pei o le emo o le mata gaioiga a le tama i le taimi lea, i lona fia mauaina o le nofoaga tonu lea o lo o i ai le vaega faatupu faalavelave. E fetaui lava le taunuu atu o Kati i le isi vaega o le fale, ae ona vaaia loa ni tamaitai se to’alua o lo o savavali mai i le hall way e tofu ma le ipu uaina o lo o uu mai. Na lafi Kati i tua o se pou sima tele lava i lona fia iloa po o fea le potu lea e aga’i i ai tamaitai ia, e lei umi ae ona vaaia loa le tatala e tamaitai o le faitoto’a o se potu ma la ulufale ai loa i totonu, na faalatalata atu Kati ma ia iloa ai, o le potu #12 lea ua ulufale i ai tamaitai, o le numera foi lea o le potu sa avea ma ofisa autu a le tamaloa leaga o Tomasi lea na ia fasiotia i Enelagi.

E lei ulufale lelei tamaitai ia i totonu o le potu ae tete’i i le toe tatala atu o le faitoto’a ina ua ulufale atu i ai Kati, ma ia vaaia ai se ali’i e soo atoa lona tino i pe’a o lo o taoto telenoa (tulou) i lug o le moega, e tuai gaioiga a le alii lea ae ua vave le taunuu atu o Kati i totonu o le potu ma ana fana, loka ma le faitoto’a, ona ia fa’atonu lea o le ali’i lea e siilima, ae ona tuuina atu hand cuff i tamaitai e to’alua ia faatoa ulufale i totonu o le potu, ma ia faatonuina loa tamaitai ia e loka lima o le alii aga’i i le pou u’amea o le potu ina ia aua ai nei mafai ona sola ese, ma sa usitaia e tamaitai faatonuga uma a le tama ma le loto fiafia, aua o lea ua maua le faaolataga mo i laua.

Na ona mae’a lava ona loka e tamaitai o lima o le alii lea, tu’i fesili loa e Kati ma tamaitai poo ai laua ao fea fo’i e o mai ai, ae na faailoa i ai e tamaitai nei, o laua na o ni tamaitai foma’i e malaga mai i Europa ma nonofo ai i le fale talimalo mo le lua vaiaso, ae na faafuasei ona ulufale atu le alii lea ua loka lima ma faamalosi laua i totonu o le potu, ma ua silia ma le lua masina o taofia faapagota ai i laua i totonu o le potu ma le faaupuga, o le taimi lava e sosola ese ai e fasiotia ai i laua e isi sui o le vaega o lo o nonofo i isi potu o le fale. Na logo e Kati leoleo e tusa ai o tamaitai, e lei umi ae taunuu leoleo ma aveese loa tamaitai ia e to’alua, ae faaauau suesuega e uiga i le alii lea ua taofia faapagota atoa ai ma isi alii e to’atolu na maua mulimuli ane o lo o nonofo i isi potu o le fale talimalo ma ni tamaitai sa latolu ave faamalosi. Na faateia Kati ina ua ia maua faamatalaga mai alii e toafa lea ua latou taofia faapagota, o latou uma o sui o le vaega a le tamaloa leaga o Tomasi mai Enelagi, na auina mai i latou e saili le tagata e igoa ia Kati ina ia fasiotia, ona o le tagata tonu lena ua faamaonia na ia fasiotia le latou taitai o Tomasi i totonu o lona fale talimalo i Enelagi.