Vaega: 112

Taeao manuia i le alafa’i mai o le atunu’u i fanuga lelei o lenei aso fou, i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Ali’i e, o ai ea o le a o matou o i ai, o lo’o i a te Oe, upu o le ola e fa’avavau, ia e alofa ma fa’atasi mai ma i matou i lenei aso e taunu’u ai i le manuia a matou fuafuaga uma, a’o le vi’iga ma le fa’afetai matou te fa’afo’i atu i Lau Afio e fa’avavau, Amene.”

Na muta mai la tatou tala ina ua tau fa’ai’ui’u le talatalanoaga a le aiga o Paulo, lea ua lafo manatu ai nei, e tusa ma se manatu o le toeaina i le fasi fanua e fa’amatu’u atu atu mo le aiga sa o latou fa’amasino, e tau ina fai ai ni a latou fa’atoaga e ola ai. O lea la ua le taunu’u le manatu o le toeaina, ona ua fulisia finagalo o le aiga, e tu’u, ona o le manatu i nisi tulaga e ono tutupu mai i se taimi oi luma.

O lea la ua o’o nei i le taimi o le saunoaga a Salamasina, e fa’ailoa sona manatu e tusa ai ma le mataupu e pei ona talanoa ane ai Paulo i luma o le aiga.

“Fa’afetai tele mo manatu ma finagalo ua fa’aalia i lenei aso,e tusa ai ma la tatou mataupu, o le mea muamua lava, tatou fa’afetai i le Atua, ina ua i’u manuia lo tatou fa’amoemoe e pei ona tatou alo atu i ai i lenei aso. O lea fo’i la ua o tatou toe lafolafo manatu i se mataupu ma fa’atula’i mai e le tuagane matua o Paulo.

Paulo, ia malie maia lou fiangalo, o le a fo’i se tofa sa i’ina, o mea lelei lava mea uma, ae ou te tu’u atu se tu’ualalo ma se fautuaga i a te oe le tuagane matua, taga’i fo’i oe, o matou o lo’o nonofo solo atu, a’o oe, o lo’o e feagai ma mea uma o le aiga. Atonu ua e manatu i nisi itu, ae maise fo’i o lo outou va ma si la fo’i aiga, ae, o mea fa’apenei, e fa’amatu’u atu loa se vaega o le ‘ele’ele lea, tatou te le toe maua, aisea, leaga e ‘ese’ese alofa, o le isi e alofa toe fa’alata, o le isi e alofa, ae alofa e mana’o i sona taui. O ituaiga alofa la na e le lelei, ma e toe fiu fo’i e toe fai, ae ua le mafai, ia e taga’i toto’a i itu ia Paulo, malie maia lou finagalo.”

E fa’apea uma lava tulaga o lo’o tula’i mai i totonu o o tatou aiga, ona o mea fa’apea, sa mafua ona fa’amatu’u atu, ua na o se matupalapala, ae uma ane, ua manana’o fo’i lea itu, e fao malo i ‘ele’ele ma fanua o nisi tagata i auala pi’opi’o ma auala le sa’osa’o. Afai o i ai nisi o le atunu’u o lo’o maua i lea ituaiga uiga leaga, ia tu’u loa, aua e alu aso sau aso, o si mea lava ma si ona taui, aua e le o le finagalo lea o le Atua.

O measina a aiga, o ona suafa matai ma ona lau’ele’ele, afai loa e lepeti e si tasi ia fa’asinomaga ia, o i’ina loa ua o’o ai i nisi tulaga le manuia, ae o le tagata e moni lona alofa i lona aiga, na te puipui ma fa’apalepale ma fa’amalumalu i mea sina ia a lona aiga. O nisi, ua fa’atau i tupe mea uma, ae o le Atua e lei fa’atauina i ni tupe lau’ele’ele na tu’u mai mo i tatou tatou te nonofo ai. Ae ia o tatou mataala pea ma tatou tapenapena, aua o le Atua lava e pule i mea uma lava i luga i le lagi ma le lalolagi.

A’o faia talatalanoaga a le aiga i le fale o Salamasina, o le taimi lea, ua fai le malologa a Petelo ma Misi. Manatua fo’i, e le i alu Petelo i le fa’amasinoga, ona sa fai i ai le fa’atonuga a lona tama, ia nofo e fai le umu e ave ai se meatausami a le Fa’afeagaiga ma lona Faletua. O lea la fa’atoa malolo mai Petelo ma Misi ina ua ma’ea le umu ma ua uma fo’i ona momoli i le fale o le Fa’afeagaiga.

E faia pea ...