Vaega: 72

Fa’atalofa atu i le mamalu o le atunu’u, i le alafa’i mai i le manuia i lenei taeao fou, ona o le tausiga alofa a lo tatou Matai oi le lagi, e ao ai ona o tatou fa’apea ifo, “Le Ali’i e, ia e alofa ma foa’i mai le loto maualalo i a i matou i lenei aso, ina ia mafai ai ona o matou talia mea tiga e o’o mai, ia mafai fo’i ona o matou tali atu i e e fa’atiga mai, ae o le vi’iga ma le fa’amanu matou te fa’afo’i atu i Lau Afio e fa’avavau, fa’avavau lava, Amene.”

Ae alo maia, o le a toe fa’aauau atu la tatou tala mo lenei aso, ia manuia faiva ma tiute o le a feagai ai, ae o le vaega lona fitusefulu lenei a la tatou tala fa’asolo, “Lupe o le Filifili.”

Na muta mai la tatou tala, ina ua savavali Paulo, Eseta, Samuelu ma le Fa’afeagaiga o Sila i le maketi e fa’atali ai a latou pasi. Fai mai e savali lava le toeaina o Paulo, ae ua le mafai lava ona tatali lona alofa i lona tuafafine, na i’u lava ina a’apa ane i ai le lima o lona atali’i o Samuelu. “Tama, aua e te fa’apena, a tonu e i ai fo’i se aso lata mai tatou te toe feiloa’i ai ma Salamasina ma Larry, ae ‘aua e te tagi tagi fa’apena.”

Fai mai ua iloa lelei e Salamasina le fa’aeaea a ona tuagane i a te ia mai lava i lo latou laiti, aua o le a’oa’iga lea e pese ai lava o latou matua a’o soifua mai. ia outou puipui i lo outou tuafafine, ia outou fa’aaloalo i lo outou tuafafine, e sa sa se tasi o outou ona pa’i le lima i le tou tuafafine, e sa sa lava. Afai fo’i e alu aso sau aso, fai ni o outou ta’ito’alua, e le sili ifo lava a outou ava na i lo Salamasina, o le tou tuafafine e to’atasi lava ia. O Salamasina lava ia o le se’e talaluma, e mu tou mata e tautua ai le tou tuafafine.

‘Aua, ‘aua lava ne i o ma pupula atu o fa’amuamua mai e se tasi o outou a outou ava, e sa, e o’o mai ai mala i a te outou, aua o upu moni lava, a loto lava le fafine e alu ae ti’ai oe, e alu lava e le toe kea mai, a’o le tou tuafafine, e le mafai ona muta lona alofa i a te outou. O manuia fo’i, e ala mai i le tou tausi fa’amaoni i lo outou tuafafine, a’o a outou ava, e leai. O la ma a’oa’iga le na i a te outou. Ua fa’apea lava ona fai, e moni lava la na fa’atino e tuagane o Sala, ae o le tama ulumatua o Paulo, e pele i a te ia lona toafafine i mea uma, ma ua iloa ma ua mautinoa lelei e Salamasina uiga ia o lona tuagane matua, mai lava o laiti lea ua o’o lava ina matutua o lo’o tausi pea e Paulo le a’oa’iga a o latou matua.

“Talofa e, i si o’u tuafafine ua nofonofo fo’i na o ia, e leai se isi la te to’alua i le fale, aua e fa’atoa manava le galuega a lona to’alua i le afiafi, ae o le a nofo lava na o ia, talofa e, i si o’u tuafafine.” Na toe a’apa ifo nei le toeaina ma toe to a’e i luga lona solosolo ma soloi ai ona mata. Fai mai na i’u lava ina tu le Faifeau e fa’atalitali le taunu’u ane o le solo a Paulo, Eseta ma Samuelu.

“Paulo, ‘aua e te popole e fai aso le Ali’i, atonu fo’i tatou te feiloa’i i le vaiaso oi luma ma Salamasina, ae a tatou taunu’u i le maketi, ona tatou fa’amave ai fo’i lea, e puipui lava tatou e le Ali’i i o tatou ala uma, aua e leai se mea e faigata i le Atua, pau le mea e sili ona taua, ia tatou manatua pea nai o tatou aiga i a tatou talosaga i aso ta’itasi.”

E faia pea…