Vaega: 83      

Malo le onosa’i i faiva ma tiute o lo’o feagai ai ma le mamalu o le atunu’u, e i ai pea le fa’amoemoe maualuga o lo’o fa’apena ona maua pea e i tatou uma le filemu ma le manuia i le tausiga alofa a lo tatou Matai i le lagi. E ao ai ona o tatou fa’afo’i le vi’iga ma sunu’i lapalapa o malo i le Atua Soifua, ona o Ana fa’amanuiaga o lo’o tatou ‘oa’oa ai pea i faleseu ma o tatou sa’a ai i ma’a o malie i aso uma o le soifuaga.

Ae alo maia, o le a toe fa’aauau atu la tatou tala fa’asolo e pei ona masani ai. Na muta mai la tatou tala ina ua ma talanoa nei ma si o’u tama e pele i lo’u loto. A’o le feau na ia alu ane e fai mo a’u, o se tala ua sili na o’ona, ua sili ona tiga ia te a’u, ma ua mou ‘ese ai fa’alogona filemu ma le fiafia sa i a te a’u. O o’u manatu fo’i sa i ai, o le a ou taumafai lava ina ia ‘aua ne i maua se mea matou te fetaui ai ma lo’u tina o Makerita ma lo’u tuagane o Peteru.

Ua leai se isi ma te talatalanoa, ona ua amata nei a’oa’oga a si o’u tuagane la’ititi o Ioane, o ana a’oa’oga o mea tau pisinisi, ma o mataupu ia sa ou mana’o e ave e lo’u tuagane, ona o lea o lo’o fa’atautaia pisinisi a lo ma tama.

O upu ua lafo mai nei e lo’u tama ia te a’u, ua le mafai ona ou tatali lo’u ita i lea taimi ma o le ala lea na ou tali ai, a’o a’u, e le mafai ona ou talia se upu a lo’u tama i lo’u olaga atoa.

“Papa, o lona uiga ua pulea e Makerita le aiga lenei, o lona uiga ua fai e Makerita tonu ma fa’aiuga o le aiga lenei, Papa, ua ou le lava lava onosa’i, ua ou le lava tiga i nei faiga e fai mai ia te a’u. E foliga mai o a’u o se tagata ‘ese i totonu o le aiga lenei, a’o le a ea la’u agasala ia Makerita ua fai ai a’u fa’apea Papa.”

O a’u upu ia na le mafai ai ona taofiofi le maligi ifo o o’u loimata, ou te talitonu o loimata o le tiga lea ua tafe ifo i o’u loimata, ae ua le o ni loimata o le fiafia. Na ou toe liliu atu nei i si o’u tama, ma e ui lava ina ou lagona le mafatia o lo’u loto, ae ua ou le lava tatali mea uma, ae a tonu fo’i o le taimi lenei, o fa’ailoa ai mea uma i lo’u tama, ina ia iloa ai le mea o lo’o tupu i totonu o lo matou aiga.

“Papa, va’ai oe, sa ou toe vala’au mai lava ia Makerita ma Peteru ina ia o’o atu i lo’u fa’au’uga, ae ina ua ou vala’au mai, na tapuni atu e Makerita le telefoni ia te a’u. Na ou fa’ailoa fo’i ia Ioane mea uma, atonu ua na o le pau lea o le tagata e tu mai mo a’u.”

“Papa, ua lelei, o le a ou usita’i ia te oe, ma o lo’u alofa fo’i ia te oe, ma lo’u naunau ina ia ‘aua nei i ai se pisapisao i lo tatou aiga, o lea o le a ou alu ‘ese ai, ua sili fo’i lea, ua ou le lava tiga i mea uma o lo’o fai mai ia te a’u. Ae sau se taimi ou te alu ai e su’e lo’u tina i Amerika, atonu fo’i o iina e atoatoa ai lo’u fiafia ma maua ai le filemu o lo’u loto ma lo’u mafaufau Papa.”

Na fai lava a’u tala ia ma ou liliu ane i o’u lavalava, ma amata loa ona tapena ‘ese a’u mea uma. Na ou toe tilotilo ane nei i si o’u tama e pele i lo’u loto. “Papa, ‘aua e te popole ia te a’u, ae fa’apenei, ae ou te le i tula’i ‘ese mai le fale lenei, ou te mana’o ia ma talatalanoa ma Makerita ona ou alu ‘ese ai lea.”

“Papa, ou te mana’o ia Makerita e ta’u mai ia te a’u po’o le a sau mea ua fai ua agaleaga ai fa’apea ia te a’u, ou te mana’o fo’i, ia ta’u mai e Makerita ia te a’u, pe ai sea lava ua suia ai fa’apea ona uiga ia te a’u, ae e tasi lava le mafua’aga o mea uma Papa, e loto leaga Makerita ia te a’u, pau lava lea, ae ta’inoino e, o ai ia, ai e fa’apea o lona aiga e maua mea, ai ona o lona fa’apea, o ia e pule i mea uma, a’o lea o le a fai atu la’u tala lea Papa, e o’o mai lo’u oti, ou te le toe fia pupula i lena tagata, e o’o mai lo’u oti, ou te le fa’amagalo i lea tagata, leaga ua fai fua a’u, e leai sa’u agasala.”

“Papa, e saua lava i o’u taliga fa’amatalaga a Makerita e fai ia te a’u, fai mai o a’u e ulu ‘ela’ela, e le iloa po’o ai so’u tina. O ni upu ia e lafo e se tina alofa, o ni upu ia e mafai ona lafo e se tina e lelei atoatoa lona loto, o ni upu ia e mafai ona lafo e se tina agamalu, e leai, na o le tina leaga ma le le alofa e mafai ona lafo ia upu, ae ua lelei Papa, o le a ou alu ‘ese ona o lo’u alofa ia te oe, ma e le mafai lava e se tasi ona ave’ese lo’u alofa mai ia te oe lo’u tama e pele ia te a’u.”

E faia pea