Ads by Google Ads by Google

Fagogo: Alofa, se ia tiga

Vaega: 64

 

Malo le soifua, malo fo’i le onosa’i i faiva ma tiute o lo’o feagai ai ma le mamalu o le atunu’u i lenei taeao fou. Atonu o lo’o fa’apena ona tausi tutusa pea i tatou e le Atua i lona alofa ma lona agalelei, ae maise o le soifua manuia o lo’o o tatou o’ao’a ai pea i faleseu ma o tatou sa’a ai i ma’a o malie i ana fa’amanuiaga. Ae alo maia, o le a toe fa’auaau atu la tatou tala fa’asolo e pei ona masani ai, Alofa, se ia tiga.

 

Ua alu nei la matou ti’eti’ega ma agai atu i le a’ai tele lava i totonu o Peretania, ma o se fale’aiga fo’i ua a’ave ona tala i le matagofie ma le manaia o mea uma. O le fale’aiga lenei na ma o i ai ma si a’u uo o Tino, ma o le taimi muamua fo’i lea ua ou o’o ai i totonu o lenei falea’iga, ua foliga mai o se fale’aiga o lo’o tu i le va o le lagi ma le lalolagi.

 

Ua tau nei ou mafaufauga i si a’u uo o Tino, ona ou fa’apea lea ma’imau pe ana fa’apea o lea matou te o fa’atasi, ae peita’i, e le o le taimi lenei e tatau ai ona matou o ma Tino, ona o lo’o i ai pea le manatu ia te a’u, e le tatau ona iloa fua e Tino mea o lo’o tutupu i totonu o lo’u aiga.

 

Ua alu pea la matou ta’avale i lea taimi, a’o lo’u loto o lo’o fa’aluafesasai pea i lea taimi, ona o mea uma ua tutupu mai, a’o lea o le a o’o mai le aso o lo’u fa’au’uga. Na ou toe mafaufau nei, pe tatau ea ona ou vala’au i lo’u tina o Makerita ma lo’u tuagane o Peteru, a le o lena fo’i pe mafai ona alu i ai ioane e logo la’ua, ae ia te a’u lava ia ma o’u manatu fai to’atasi, e sili lava pe a ou vala’au i ai.

 

Na avea ia manatu ma ala ua mama ai mea uma i lo’u mafaufau ma ua matou talatalanoa nei i le tele o ‘ese’esega o totonu o le a’ai o Peretania ma isi a’ai la’iti lea o lo’o matou nonofo ai nei. O le isi fo’i itu, ua matou talatalanoa i le matagofie o mea uma lava ua le gata i le soifuaga o lo’o ola ai tagata ae fa’apea fo’i le matagofie o maota ma laoa o lo’o nonofo ai.

 

Na alu alu lava le matou ta’avale, o’u fa’alogo atu o fa’apea le tala a Ana ia ioane, “Ioane, atonu o le a e va’ai i se tama’ita’i e tau ai lou loto pe a tatou taunu’u i le falea’iga, a ea Averia.?” Ua ata si o’u tuagane ma lulu ane lona ulu i si o’u tina tausi, “Ana, o mea na e iloa ai le ala o tama tane i tama’ita’i, ae e le fa’apena le faiga o se mea, e matua’i sili lava i le ulu le ma ma le ma’asiasi, ae alu i tulivae.”

 

Ua alu nei le matou talie, ua lagona lava le fiafia o lo’u loto, e ui lava ina i ai le tele o mea o lo’o pogatia ai lo’u mafaufau, peita’i, ua amata lava ona ou lagona le filemu o lo’u loto ma lo’u mafaufau.

 

Ua toe tali atu Ana ia ioane, “Ia ae a o mea lelei mea na, afai loa ua mana’o i ai le loto, alu loa fa’asolo atoa, ae le o le mana’o o le loto ae vaivai le tino, ona le aoga lava lea o mea uma, e sa’o ai la le upu a le Kolea, e tele mea manava, ae le mafai tautala.”

 

Na ou iloa nei, o lo’o taumafai lava si o’u tina tausi ina ia maua le fiafia o ioane, ae maise fo’i o a’u, ma o lo’o o’u uliina pea la matou ta’avale i lea taimi, ma ou ‘ata i tala nei ua fai e ioane ma Ana.

 

E moni lava le upu, o le fiafia ma le ‘ata, e fa’amama avega i le tele o taimi o le olaga, afai e lutia i tatou i faigata ma puapuaga o le soifuaga nei, ia o tatou maua pea le fiafia o le loto ma le mafaufau, e mama ai fo’i mea uma o lo’o fai a le tagata.

 

Ua matou taunu’u nei i luma tonu lava o le fale’aiga lea sa ou mana’o lava ia matou a’ai ai ma Ioane ma Ana, ona o lo’u manatu e le i o’o lava i ai si o’u tuagane ma si o’u tina tausi, ma o la’u meaalofa fo’i lea mo la’ua i lea aso.

 

Ua matou feosoi nei i fafo, ma ua na o le tu o lo’u tuagane ma va’ai atu i le matagofie o le falea’iga, a’o si o’u tina tausi, ua soso mai i ou talane ma u’u lo’u lima, “Averia, oka ta’i matagofie lenei fale ua tatou o mai i ai, se va’ai tatou i se i se isi mea, ae fa’apea a oe o le fale’aiga lenei, oka ta’i manaia lenei fale.”

 

E le o iloa mai e Ioane ma Ana le mea ua alu i ai lo’u mafaufau i lea taimi, ua ou toe mafaufau nei i si a’u uo o Tino, i le po na ia au mai ai a’u i totonu o le fale’aiga lenei, na tau pa’ilima ai ma le isi tama, ona o le fua o le loto o Tino.

 

O le mea na tupu, o lea lava ou te savali a’u i totonu o le fale’aiga, ae o lo’o mata’i uma e Tino mata o tagata o lo’o tilotilo mai ia te a’u. E i ai la le isi laulau na o tama lava e to’a fa sa i ai, ua le ave’esea mata, ua na o le tilotilo mai nei ia te a’u, ia o mea sasa’o lava ia e le o ni mea pi’o, ou  te le i ano lava i ai, a’o Tino ua avea ma ala ua tiga ai fua lona loto. Na i’u lava ina tatagi le fa’amapumapu a le isi ali’i ma tilotilo mai ia te a’u, ua tu’u nei le ma laulau ae la’a i ai Tino, ia ae na i’u lava i le fiafia le ma tafa’oga i lea po.

 

O lea la ua matou savavali atu nei i totonu o le fale’aiga, ae ua mata’i mai uma la matou solo e tagata. O tama’ita’i sa i le isi itu, ua na o le tilotilo mai nei i le savali atu i totonu a lo’u tuagane.

 

Ua ‘eu mai nei a’u e Ana ma fa’asino mai le au tama’ita’i lenei, na i’u lava ina fa’apea mai lo’u tina tausi ia te a’u, “Averia, pei lava o le a fiki se tatou laki i lenei po.”

 

E faia pea