Ads by Google Ads by Google

FAGOGO: ALOFA E OO I LE OTI

E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na fa’atonu ai e le olomatua ia Kome e alu ese loa ma le fale.

 

Na mou fa’afuase’i ese atu lagona fiafia o le Aso Sa i totonu o le aiga ina ua te’i le olomatua i le vaaiga sa ia vaai i ai, ma ua tuu fesili ai loa lona mafaufau, e foliga mai e i ai se mea o lo o tupu i le ulugali’i a Tania ma Veli. Na tuli mata’i e le olomatua le alu ese atu o le ta’avale a le alii o Kome, le tagata ua tele tausaga o fai ma ave ta’avale a le latou aiga e ala i le fa’aaoga soo e le aiga o le taxi a le alii e ti’eti’e ai i le aoga, galuega, lotu poo taimi fo’i o fa’atauga. Ua toe mafaufau le olomatua i le tele o taimi e talanoa atu ai Kome ia te ia e fa’atatau ia Tania, i taimi ao galue Tania o se teine tausima’i i Motootua, peita’i na muta fa’afuase’i ia talanoaga ina ua sosola Tania ma Veli i Savaii ma nonofo ai i le aiga o Veli mo le 5 tausaga, lea la fa’atoa toe fo’i mai le tama’ita’i i lona aiga i Palisi, ma ua toe maua ai fo’i le avanoa o Kome e toe feiloa’i ai i le tama’ita’i sa faananau i ai lona loto.

 

“Aga iloa lava ou ke kali fa’alelei i le kamaloa i la aso iga ua kalagoa mai ia Kagia, akogu e le kupu legei mea makaga ua ou vaai ai i le aso legei”, o mafaufau ia na tautalatala to’atasi ai le olomatua ao tu i totonu o lona potu ma vaavaai i le alu ese atu o le ta’avale a Kome mai le latou fale ma aga’i atu ai lava i le auala. Na ona lilo atu lava o le ta’avale i le vaai a le olomatua, liliu loa ma toe savali i tua i le umukuka ma ia vaaia ai lana fanau o lo o tau fai nonofo mai lava i luga o nofoa e leai ma se isi o ai. “Soia kou ke maka fa’agoagoa ae laulau mai loa le kakou meaai o le a maalili le umu ga pisi ai si kamaloa o Veli”, e fai lava tala a le olomatua ma savali atu ua la’u mai ipu sa i luga o le sink ma tuu i luga o le laulau, ona amata loa lea ona laulau le meaai, ona tau fai tutu uma atu foi lea o tamaiti ma fesoasoani i le olomatua, e lei umi ae maea tapenaga o le aso, ona punonou ai loa lea mo le tatalo faamanuia mo meaai, ma o iina na faatoa iloa ai e le olomatua o lo o i ai se avega mamafa i le loto o Tania, ina ua tau le mafai e Tania ona fai le tatalo o meaai i lona tagi tele.

 

“Siaula Kagia, e i ai se mea ua kupu i le lua aiga ma Veli?”, o le fesili muamua lea a le olomatua ina ua uma le tatalo o meaai, peita’i sa leai lava se tali a Tania, ona toe fesili lea o le olomatua, “Ao fea o i ai Veli ua le vaaia ai i le kaimi o le kakou kooga’i?”. E fetaui lava le uma o le toona’i a le aiga ae sesee atu loa ma le tuagane laititi o Tania fa’atoa sau mai le toona’i a le aulotu sa fai i le fale o le faifeau, ma ia fa’ailoa i le olomatua, sa ia vaaia Veli o ti’eti’e atu i le loli la’u oloa a le tamaloa Saina lea e masani ona kiliva ana oloa i Savaii.