“Ua fai so’o lava le tuai ona taula i le uafu le Lady Naomi, ma ua atili fa’atigaina ai i matou o lo’o ua leva na niniva,  o nisi fo’i sa tetele mafatiaga i le ma’ivasa mai luga o le sami, ae tatali le o’o atu o lea va’a e fa’aofi mai matou i le Uafu La’ititi. O le fesili pe aisea lava?”, o le tagi talatala lea a se tasi o tina mai Vaitogi, e masani ona asiasi i lana fanau o a’o’oga i Samoa, ae le o se tagatanu’u Samoa i sisifo.

Ina ua fesiligia, saunoa le Harbor Master Ga’otelemeataga Silila Patane, “ua toe fa’amalosia mai e le US Coast Guard le alu atu o tatou va’a Pailate ia e fa’aofi mai va’a uma i totonu o le uafu. O le tele o taimi, ona o lo’o pisi i matou i le fa’aofiga mai ma le tapenaga o le uafu mo tulaga e tuta mai i ai va’a, ae o’o loa ina le pisi, e vave lava ona faia le tiute e tatau ona fa’ataunu’u.”

Peita’i, sa fa’ailoa mai e le tina fa’asea,  “O aso uma ou te sau ai i le va’a lea, e tatau lava ona fa’aopeopea mai matou i gatai o Fatumafuti ae le’i taina le 6:00 i le taeao, ua matou iloa e tatali lava i matou se’ia o’o ane le aufaigaluega a le malo, ae a o’o la ina ta le 10:00, ua fai lava si le mafaufau o lea ituaiga tuai, ae le o pisi fo’i le uafu i ni va’a.”

Tali mai ia Ga’otelemeataga e faapea, “Ona o aiaiga fou ua mae’a fa’atulaga e le US Coast Guard e le o gafatia i le taimi nei, ona pasia ai le ‘Lady Naomi,’ o lea ua toe faia ai le fa’aiuga a le Coast Guard e toe fa’aofi mai lea va’a e le pailate a le uafu tele.”

“Ua fa’ailoa mai, o le lisi o aiaiaga tamau e usita’ia e va’a e femalaga’i ai tagata ma la’u ai ma uta, e 11-13 ona aiaiga ua le o gafatia ona pasia ai le Lady Naomi, ae o lo’o tu’uina i ai le taimi atofa mo le usita’ia atoatoa o nei aiaiga uma o le tulafono o va’a femalaga’i ai tagata ma la’u ai uta!”

“Lona lua o le fa’atuai ona fa’aofi mai o le Lady Naomi i le vaiaso ua te’a, ona sa pisi le uafu laititi lava lea e fa’ae’e ese ai i’ina le maliu sa taumafai e fa’ao’o atu i Aunu’u, ae maualuluga uma uafu laiti, ae talafeagai lelei le maualuga o le uafu lea i Fagatogo,”  o e le tala lea  a Ga’otelemeataga

Na fa’afeso’ota’ia Frank Thompsen o le US Coast Guard ma iloa ai, “I le taimi nei, e le o toe taofia le Lady Naomi mai lona ulufale mai ona o nei mea e ao ina fa’aleleia mo le va’a, ua na o mea e le a’afia ai le femalaga’i o lea va’a ma la’u ana pasese fa’apea ma uta, o lo’o fa’atino lava suiga e le va’a i lona taimi atofa.”

“Pe ana fa’apea o ni mea e ono afaina ai le femalaga’i o le va’a lea, ua leva ona taofia e le toe ulufale mai ma le toe ulufafo atu mai le uafu se’ia vagana ua fa’aleleia. I le taimi nei, e mafai lava ona sau i totonu le Lady Naomi  e le tau fa’atalia le va’a pailate a le Matagaluega o Uafu ma Taulaga,” o lana tala lea.

Ua le gata i lea, e tuai o na taula le va’a ona “e le o manana’o le Samoa Shipping Company, latou te totogia ovataimi o tagata faigaluega a le tatou malo i luga o le Uafu, Ofisa o Femalaga’iga, le auva’a o le pailate, ma isi uma tulaga e ao ina latou totogia pe a manatu e sau loa tuta mai loa i le Uafu.”

O le mea lea faatoa taula ai le Lady Naomi pe a te’a le itula e 8a.m - tusa o le taimi lea e amata ai galuega a le malo.