O le vevesi lea na tula’i mai i le fa’aiuga o le vaiaso na te’a nei i Malaeimi, ina ua osofa’i e taifau a se aiga ni ali’i se to’alua na o e saili mai le to’alua o le isi ali’i na a’afia, na fa’ai’u i le taofia ai e leoleo le ulugali’i e ana ta’ifau fa’atasi ai ma le isi ali’i e to’atasi na a’afia, e mafua mai ina ua osofa’i e ta’ifau ali’i na a’afia ma tula’i mai ai loa se fusuaga i lo latou va’a.

O le taeao ananafi na tutula’i uma ai i latou e to’atolu na a’afia, e aofia ai le ulugali’i ua molia nei o Sionesipa Faoliu ma lona to’alua Tuasivi Faoliu, ona o tuuaiga i lo la fa’ao’olima lea i ali’i na a’afia, ma le isi ali’i na a’afia o Sanele Tavea ua toe tatala i tua ina ua leai ni moliaga e faila fa’asaga ia te ia.

Na teena e le ulugali’i ua molia moliaga mama o le fa’atupu vevesi i nofoaga faitele i le taeao ananafi, ma ua toe taofia nei i le toese e fa’atali ai suesuega o lo o fa’aauau a le malo.

E tusa ai ma fa’amaumauga a le fa’amasinoga o lo o taua ai e fa’apea, o le vaveao o le aso 22 Mati na te’a nei, na logo ai e ni molimau le ofisa o leoleo mo se fesoasoani, e fa’atatau i ni alii se to’alua na maitauina o lo o manunu’a, e mafua mai ina ua fa’ao’olima i ai le ulugali’i ua taofia nei e leoleo.

Na taunu’u leoleo ma iloa ai alii e to’alua o lo o manunu’a, o le isi o lo o manu’a mitimiti ona foliga, ae o le isi ali’i o lo o i ai se manu’a tuga i lona ulu, ma auina atu ai loa i laua i le falemai mo togafitiga, mulimuli ane toe auina atu i le ofisa o leoleo e fa’atalatalanoa atili ai le mataupu.

Na taua e le isi ali’i na a’afia i leoleo e fa’apea, o laua na o ma lana uo i le fale o le ulugali’i ua molia, e aami lona to’alua o lo o taalo pele ai, peita’i na fa’ateia i laua ina ua osofa’i laua e ta’ifau a le ulugali’i.

Na avea le le fiafia o le au ali’i na a’afia ma itu na la taunu’u atu ai loa i totonu o le fale o le ulugali’i, fa’a pa ai loa ma le la le fiafia i ai, pe aisea na le oso atu ai se isi o i laua e taofi a la ta’ifau.

Na avea le fesiligia e i laua na a’afia o le ulugali’i ma itu na ita ai le tamaloa, ma sau ai loa i fafo ma fai a laua fa’afinauga ma le isi o le to’alua na a’afia, soso’o ai loa ma lona tu’uiina o le ali’i lea, ma avau ai loa la fusuaga, ae fa’ateia ai loa le alii na a’afia ina ua tui e le tamaloa o Faoliu lona ulu i se naifi ma manu’a tigaina ai.

Ae na taua e le isi ali’i e to’alua i ai ali’i na a’afia i leoleo e fa’apea, ina ua fufusu le tamaloa ua molia ma lana uo sa la to’alua, sa oso atu loa e vaovao le la fusuaga, peita’i na fa’ateia o ia ina ua ta e le fafine lona ulu i se fagu pia ma manu’a ai ona foliga.

Na mae’a lea, ona oso atu lea o le fafine ua fela’u lona papatua, peita’i ao taumafai e oso ese, na oso atu le to’alua o le fafine ma tui lona tauau i le naifi ma manu’a ai.

Ina ua fesiligia e leoleo le ulugalii ua molia nei i le taimi muamua, sa laua teena tu’uaiga fa’asaga ia te ia, e aofia ai le la teena lea o le fa’aaogaina o se tama’i naifi e faaoo ai manu’a i alii na a’afia, peita’i ina ua saili e leoleo le la fale, sa maua i ai se tama’i naifi fai meaai o lo o pisia uma i le toto.

O manua sa aafia ai i laua e to’alua na manunu’a i lenei fa’alavelave, na manaomia ai filo e 3 e tapuni ai le manu’a sa a’afia ai le ulu o le isi alii’, ae o le isi ali’i se mana’omia fo’i filo e tolu e tapuni ai le manu’a sa a’afia ai lona tauau, ma o ia fo’i manu’a e pei ona taua i le ripoti a leoleo, e le o ni manu’a e ono lamatia ai se soifua o se isi o i laua.

O lo o taofia pea le ulugali’i o lo o tu’uaia i le falepuipui i Tafuna e aunoa ma se tupe ua fa’atulaga e tatala ai i laua i tua, e fa’atali ai su’esu’ega o lo o fa’aauaua fa’asaga i lenei mataupu, ma iloa ai pe i ai ni moliaga faaopoopo e ono faila fa’asaga ia te i laua.

Na taua e le loia a le malo, o moliaga fa’aopoopo o lo o va’ava’ai i ai le malo e aofia ai le moliaga o le fa’ao’olima, e mafua mai i le fa’aaogaina o a’upega e fa’ao’o ai manu’a i ali’i e to’alua sa a’afia, e pei ona taua i fa’amaumauga a leoleo.