Na faafetaia e le afioga i le alii peresetene o le Senate ia Gaoteote Palaie Tofau le faigamalo a le malo tutoatasi a Samoa, tauala atu i le afioga i le alii Palemia ia Tuilaepa Lupesoliai Sa’ilele Malielegaoi, ona o le faaauau pea lea o le galulue soosoo tauau o atunuu e lua mo le manuia o la faigamalo.

I le taimi o lana saunoaga faapitoa i le sauniga o le fu’a na se i mavae atu nei, na saunoa ai Gaoteote e fa’ape, o le galulue faatasi o Samoa e lua, e le o se mea na faatoa tupu i se taimi lata mai, ae o le faataotoga lava lea na afua mai e tuaa mai anamua.

“Samoa, e ui e eseese ta faigamalo, ae tasi lava taua, fa’afetai tele i lou lagolago mai i le tamaoaiga o le faigamalo a Tutuila ma Manu’a, tauala mai i ou tagatanuu o lo o galulue i kamupani i’a i totonu o Amerika Samoa,” o le saunoaga lea a Gaoteote ia Tuilaepa.

“Samoa e, o oe lava o le uso moni, e te le teena lava so o se mea ou te tagi atu ai, o aga na o le uso moni, e tali mai i so o se taimi e manaomia ai lana fesoasoani,” o le isi lea vaega o le saunoaga a Gaoteote.

O le faamanatuina o le fu’a a Amerika Samoa i tausaga taitasi e pei ona saunoa Gaoteote, o se aso lea e toe manatua ai e Amerika Samoa le feagaiga na osia mai e tuaa ua tofafa mai Tiasa, lea ua mafua ai ona manuia le atunuu i le taimi nei.

O manuia na ua mafua ai ona lolofi mai tagata eseese mai itu e fia o le lalolagi, e nonofo ma aumau i Amerika Samoa, ma e ui i le faatauvaa o Amerika Samoa ae ua iloga ona tulaga manuia, e pei ona taua e Gaoteote i lana saunoaga.

Na faafetaia e Gaoteote le tautua faaauau pea o lo o faia e tagata Upolu ma Savaii o lo o galulue i totonu o le kamupani a le StarKist Samoa, lea o lo o mafua ai tulaga fesoasoani i le tamaoaiga mo le malo.

Na faaiu le saunoaga a Gaoteote i lona faafetaia o fitafita tuai uma sa tautua i vaega au a le malo tele o Amerika, faapea ai ma Toa o Samoa o lo o tautua i vaega au eseese a le malo tele i le taimi nei.

Saunoa Gaoteote, o le tautua toto sa ofo atu e fitafita tuai, faapea ai ma le tautua totoo o lo o ofoina atu e Toa a Samoa i le taimi nei, ua fai ma sao o Amerika Samoa i totonu o le faigamalo a Amerika.