A o tau saili ai le tofa ma le faautaga a Kapeteni o Sa uma ua lautogia mo le tuuga fautasi o le fu’a o lenei tausaga, fa’apea ai ma se fautuaga mai le Komiti o le Tuuga Fautasi, ua tasi ai nei le finagalo autasi, o le a le aofia le Sa mai Samoa i ulua’i tuuga e saili ai Sa e tauva i le su’eina o le siamupini, ae fa’atoa aofia lava le Sa mai Samoa i le tuuga o le sailiga o le siamupini, lea ua fa’amoemoe e faia i le taeao o le aso Toona’i, Aperila 16, 2016.

E pei ona fa’ai’ugafonoina e le Komiti o le Tuuga Fautasi i le vaiaso nei e fa’apea, mai Sa e 14 ua lautogia mo faigamea o lenei tausaga, e na o le 12 Sa o le a tausinio mo le sailiina o le siamupini, ae o isi Sa e lua, o le Sa lea mai le Fono Faitulafono, fa’apea ai le Sa mai le Ofisa o le ali’i kovana ma le faigamalo, o le a fa’apitoa lava le la tuuga i le aoauli o le aso Lulu, Aperila 12 i le itula e 12:00, e avea ai o se tasi o fa’afiafiaga mo le vaiaso o le fu’a.

O le taeao o le aso Lua, Aperila 12 ua fa’amoemoe e fa’ataunu’uina ai ulua’i tuuga e lua o le sisiga fu’a, mo le sailia o Sa e 6 pito i luga e tausinio mo le sailiga siamupini, atoa ai ma Sa e 6 pito i lalo e saili mai ai le tulaga 7 e o o atu i le 12.

I le itula e 8:00 i le taeao le ulua’i tuuga, lea o le a tausinio ai Sa uma e 6 ua mae’a ona se’i mo le Group A, ae o le itula e 10:00 ua fa’atulaga mo le tuuga a le Group B.

O le itula e 8:00 i le taeao o le aso Faraile, Aperila 15 lea ua fa’atulaga e le Komiti e fa’ataunu’u ai le tuuga mo Sa e mauaina le tulaga 7 e o o atu i le 12, ae o le itula e 9:00 i le aso Toona’i e sosoo ai, Aperila 16 ua fa’atulaga e saili ai loa le siamupini o faigamea o le tai mo lenei tausaga, i le va o Sa e 5 e pito lelei o latou taimi mai Amerika Samoa nei, fa’apea ai ma le Sa e tasi mai Samoa, le Sa o le Telefoni o le Vainu’u mai le itumalo o le Aiga i le Tai i Manono.

O le aso Gafua o le vaiaso fou lea ua fa’atulaga e taunu’u mai ai i fanua le malaga fa’apitoa a le va’a o le Lady Naomi mai Samoa, mo le momoliina mai o le au malaga mai Samoa, fa’atasi ai ma le auina maia o le Sa mo le tuuga.

Ua i ai le fa’amoemoe o le Komiti o le Tuuga Fautasi, o le vaiaso fou e faia ai le fonotaga fa’ai’u ao lumana’i ai le tuuga o lenei tausaga, lea fo’i o le a auai ma le Kapeteni o le Sa mai Samoa, mo le fa’amautuina o ni isi o fuafuaga ao luma’i ai le Tuuga Fa’avaomalo o le nei tausaga.

Sa fautuaina fo’i e le afioga i le Maoputasi ia Mauga Tasi Asuega Kapeteni o Sa uma ua lautogia mo faigamea o le tai i lenei tausaga, ina ia tausisi i tulafono, aemaise ai lava le tausisi i le saogalemu o au va’a ta’itasi.

E pei ona ripotia e le Samoa News i se taimi ua te’a, o le finagalo o le ali’i kovana ia Lolo Matalasi Moliga, o le Sa a le Fono Faitulafono ma le Ofisa o le Kovana, e le auai i tuuga fa’apitoa o le fu’a, ae o le a fa’apitoa lava sa laua tuuga e fai ma o la sao i le fa’amanatuina o le fu’a a le atunu’u i lenei tausaga.

O le fa’atulagaina la lenei o Sa ua lautogia mo ulua’i tuuga i le aso Lua o le vaiaso fou, e pei ona fa’atulaga mai ai le laina 1 i le itu o lo o i ai le malae va’alele, ae o le laina 6 o lo o i le pito i Lauli’i.

Group A: (1) Fealofani Samoa II; (2) Tama o le Muaau mai Faleniu; (3) Aeto mai Pago Pago (4) Iseulaolemoana II; (5) Fetu o le Afiafi mai Fagaalu, (6) Taeao II mai Leone.

Group B: (1) Fuao mai Vatia; (2) Paepaeulupoo II mai Aua; (3) Matasaua mai Manu’atele; (4) Manulele Tausala II; (5) Manulele Tausala I.