O se tausaga ese lenei mo le tama’ita’i o Orepa Talo ma lona aiga, aemaise ai o le Asosi Si’isi’i U’amea mamafa a Amerika Samoa, ina ua ia fa’atula’i se matati’a mo Amerika Samoa, i le avea ai o ia ma ulua’i tama’ita’i ua manumalo i se pine auro mo lona atunu’u i le ta’aloga si’isi’i u’amea mamafa fa’avaomalo.

“O se lagona fiafia tele lea mo maua o matua fa’apea le aiga atoa, ina ua ausia e Orepa lenei matati’a maualuga, ma ou te lagona o se fiafiaga fo’i lea mo tagata uma o le atunu’u, ina ua ausia e se tasi o ana tama fanau lenei tulaga maualuga,” o lagona fiafia ia o le faletua o Valelia Anna Talo, o le tina o Orepa i se talanoaga ma le Samoa News i le taeao ananafi.

E 8 pine na maua e le Ausi’isi’i u’amea mamafa a Amerika Samoa, mai le ta’amilosaga a le Pasefika i Saute lea sa talimalo ai le atunu’u o Niu Kaletonia i le fa’aiuga o le masina o Me na te’a nei.

O ia pine e 8 e aofia ai pine auro e 3, pine siliva e 3, ma pine apamemea e 2. O pine auro e 3 mo Amerika Samoa e aofia ai pine auro e lua na manumalo ai Orepa, ma le pine e tasi na manumalo ai le susuga ia Malaki Antonio Sitagata Jr.

Na fa’amaonia mai e le Faiaoga o le Ausi’isi’i a le atunu’u sa malaga atu i Niu Kaletonia, le susuga ia Lopesi Fa’agu, o se tasi fo’i o tama fanau a le atunu’u e tele taimi sa fai ai o ia ma sui o Amerika Samoa i ta’aloga si’isi’i u’amea mamafa, o pine auro e lua na maua e Orepa mai Niu Kaletonia, ua avea ai o ia ma ulua’i tama’ita’i Amerika Samoa ua manumalo i ni pine auro.

“O se matati’a maualuga tele lea ua ausia e Orepa mo Amerika Samoa, ina ua avea o ia o se ulua’i tama’ita’i ua manumalo i se pine auro mo le atunu’u i le ta’aloga si’isi’i, ae ua atili ai ona mata’utia lenei fa’aeaea, ona e lua ana pine auro ia sa maua,” o le saunoaga lea a Fa’agu.

E ui i le faigata o le tulaga sa i ai i latou na tausinio ma Orepa, peita’i na taua e Fa’agu le leai o se taimi na vaivai ai lona fa’amoemoe i le taumafaiga a Orepa.

“Talu mai le ulua’i taimi na fa’atoa ulufale mai ai Orepa e fia i ai i le au si’isi’i u’amea mamafa seia matou malaga atu i Niu Kaletonia, sa tumau pea lo’u fa’amoemoega sa i ai, o ia le isi pine auro mo Amerika Samoa i le lumana’i, ma o ia moemitiga sa i lo’u loto na mafai ona fa’amaonia e Orepa, ina ua ia manumalo i pine auro e lua i ta’aloga a le Pasefika i Saute”, o le saunoaga lea a Fa’agu.

O le ta’amilosaga lea sa faia i Niu Kaletonia, e le gata sa fa’atautaia ai le ta’amilosaga a le ‘Oceania Championship’, ae sa fa’atautaia ai fo’i le ta’amilosaga o le ‘South Pacific Championshpi’ ma le ‘Junior Olympic Qualification’.

O Orepa na pine auro i le ta’amilosaga a le ‘Oceania Championship’ toe pine auro i le ta’amilosaga a le ‘South Pacific Champioship’.

O Orepa, 15 tausaga le matua, e lona tolu i le fanau e to’a 4 a ona matua, le susuga i le Faifeau A’oa’o Fesoasoani ia Tualesolo Talo ma le faletua ia Valelia Anna, o le Ekalesia Katoliko i Lauli’i.

“O Orepa, o se tagata e ese le galue malosi i totonu o le matou aiga, e fiafia i soo se tagata, o ia fo’i o se tama’ita’i e tausa’afia ona uiga,” o ni isi ia o le molimau a si ona tina e fa’atatau ia Orepa.

O Orepa ma ona matua sa galulue i le Fatuaiga mo le tele o tausaga, peita’i o lea ua tofia i latou e galulue i le Matagaluega a Sagato Petelo ma Paulo o Lauli’i talu mai le masina o Mati 2014.