Na mataina taumafaiga a le Au Volipolo a tama’ita’i i a latou ulua’i ta’aloga e lua i le amataga o le ta’amilosaga Volipolo i Papua Niu Kini, ina ua latou fa’ato’ilalo ‘au malolosi e lua o loo i ai i le ta’amilosaga, e aofia ai Fiti i lana ta’aloga muamua, ma le au mai Tahiti, lea o loo umia pine auro e lua i taaloga e lua a le Pasefika ua mavae atu, le taaloga i Niu Kaletonia i le 2011 ma Samoa i le 2007.

AMERIKA SAMOA VS FIJI

Na faateia le ‘au a Fiti ina ua latou faiaina ia Amerika Samoa i le latou ulua’i ta’aloga i le fale taaalo o le Taurama Aquatics Center i se ta’aloga mataina ma le finau.

E le’i fa’avaivai Fiti i ana osofaiga i le ulua’i seti o le ta’aloga, peita’i na matou vaaia le lelei o tu’i a le ‘au a Amerika Samoa, atoa ai ma le latou poloka i le tele o taimi, ma vaaia ai le faigata ia Fiti ona fai ni a latou gaioiga e maua ai ni a latou ‘ai.

AMERIKA SAMOA VS TAHITI

Na matua ofo le to’atele o tagata sa molimauina le ta’aloga i le va o Amerika Ssamoa ma Tahiti, i le mata’utia o le tulaga lelei ma le malosi o le au a tama’ita’i o le atunu’u, ina ua latou fa’atoilaloina Tahiti i seti sosoo e tolu i ‘ai e 25-18, 25-18 ma le 25-21.

Na matua mataina gaioiga a le ‘au a tama’ita’i i le taimi atoa o le ta’aloga, e le gata i le mataalia i osofa’iga, ae o le taimi fo’i latou te puipui ai mai osofaiga a Tahiti.

E ui i nai fa’aletonu laiti i fa’aiuga a Laufali ma Tafu’a, peita’i e le’i avea lea ma itu na taofia ai le ‘au a tama’ita’i mai lo latou fa’atinoina o gaioiga e faailoa atu ai le tulaga lelei o loo i ai le latou ‘au.

O le ‘au a Tahiti e le’i faiaina lava i Taaloga a le Pasefika i le 2011 i Niu Kaletonia i se seti mai ana ta’aloga uma sa fa’agasolo, ma o iina na fa’amaonia ai le malosi ma le lelei o le latou ‘au.

E 9 atunuu o loo tausinio i taaloga volipolo i Papua Niu Kini i le taimi nei, ma o ia atunuu e aofia ai Amerika Samoa, Fiti, Guam, Kiripati, Nauru, Niu Kaletonia, Papua, Tuvalu ma Wallis ma Futuna.

O Amerika Samoa o loo i ai i le pool A fa’atasi ai ma Fiti, Tahiti Wallis ma Futuna, ma o lea ua manumalo i ana ulua’i ta’aloga e lua, toe o Wallis ma Futuna lea na sauni atu Amerika Samoa la te ta’aalo i le taeao ananafi.

AU VOLIPOLO A ALII

Ua lua ta’aloga a le ‘au volipolo a ali’i ua maea, ua lua fo’i a latou faiaina sosoo. O le ulua’i ta’aloga a le au a ali’i na ta’aalo ai ma Tahiti, lea na manumalo ai Tahiti i seti sosoo e (3-0), sosoo ai loa lea ma le latou ta’aloga lona lua ma Fiti, lea fo’i na faiaina ai i seti e (3-1).

O le fa’afitauli o loo tula’i mai i le ‘au a alii i le taimi nei, o le tele o a latou mea sese e fa’atino i totonu o le ta’aloga, aemaise lava i ‘serve’ e le ova.

I le ta’aloga lona lua ma Fiti i le aso ananafi, e 8 ‘serve’ e le’i ova a Amerika Samoa i le seti muamua, ae ta’i 5 i le seti lona 3 ma le 4, o seti uma fo’i ia sa manumalo ai Fiti.

O le seti lona lua lea na lelei ai le puipui ma le osofa’i a Amerika Samoa, e tasi fo’i le latou ‘serve’ na faaletonu, o le seti lea sa latou manumalo ai.

Ua alo atu nei le ‘au a alii i le latou ta’aloga lona tolu ma Nauru i le taeao nei.

O loo i ai le faamoemoe o le aso 18 Iulai e faia ai sailiga pine mo ta’aloga volipolo, o le aso mulimuli fo’i lea o ta’aloga o loo fa’agasolo i Papua ma tapunia aloaia ai loa i se sauniga faapitoa i le afiafi i le itula e 7:00.