Ads by Google Ads by Google

Aloaia e le malo aso faapitoa o tama ma tina matutua o le atunuu

LOLO: O le avea ma tagata matua o se meaalofa mai le Atua

 

Na tutu faatasi le afioga i le kovana sili ma lana kapeneta e lagolago le faamanatuina o le aso faapitoa mo tama ma tina matutua i le atunuu i lenei tausaga, e pei ona faataunuuina i le taeao ananafi i le malae o le Su’igaula o le Atuvasa i Utulei.

 

I le saunoaga autu o le aso na tulei saunoa i ai le afioga i le Kovana Sili ia Lolo Matalasi Moliga, sa ia taua ai e fa’apea, o le avea o se tasi ma tagata matua, o lona faataunuuina lea o le meaalofa na tuuina mai e le Atua i le tagata ina ia faafualoa lona soifua ma ola fiafia.

 

Na faatumulia le malae i le mamalu o tagata matutua mai Toomaga eseese na mafai ona lolofi atu e auai i lo latou aso faapitoa, faapea ai uo, aiga tainane le mamalu o le atunuu lautele na maua le avanoa latou te molimauina ai lenei aso taua.

 

Na tomua le polokalame i se solo tele a tagata matutua na amata mai i luma o le Fale Laumei i Utulei, lea na taitaia mai e le afioga i le Lute Kovana ma lona faletua, ma aga’i atu ai i le Fale Tele lea na faataunuuina ai le sauniga.

 

O le susuga a Rev. Ioane Evagelia o le Ekalesia EFKAS mai Utulei na taitaia le sauniga i se upu faamalosi, lea na autu ai lana saunoaga i fuaitau e faapea, “tusa lava poo a mea e tiga ai le soifuaga o le tagata, poo ma’i o le tino pe ona ua matua fo’i le soifua, aua ne’i avea tiga ma faafitauli na ma auala e mate ai lou faaamoemoe i le Atua.”

 

Na taua e le alii kovana i lana saunoaga e faapea, soo se mea na faia e le Atua i le amataga, sa faia ma le agaga ia ola fiafia ai le tagata soifua, ma o se itu taua foi lea mo le malo ina ua latou vaavaai atu o lo o soifua fiafia tama ma tina matutua i lo latou aso faapitoa.

 

“Tina ma Tama matutua, tatou fiafia i soo se mea ua aumai e le Atua mo tatou,” o le saunoaga lea a le alii kovana.

 

Saunoa Lolo e faapea, e le faapea seiloga e maua tupe ona fiafia lea, e pei o mea ua faia e le lalolagi i le taimi nei, i le taumafai lea e saili mea e faafiafia ai o latou loto, ae o lana fautuaga i tagata matutua, “ia outou soifua fiafia ma faaaoga fiafia meaalofa a le Atua na avatu ia te outou, o le avea ma tagata matua i lenei olaga.”

 

FAAILOGA TAUALOA

 

E tolu faailoga faapitoa sa mafai ona tauaaoina atu e Faalapotopotoga Tumaoti mo tama ma tina matutua ua ausia tausaga matutua o latou soifua, aemaise ai i latou ua loa le tautua i totonu o aiga, atunuu aemaise ai le malo.

 

O le faailoga muamua mai le Vaega a le Rotary na maua lea e le susuga a Tuilaepa Tumama, 90 tausaga.

 

Na taua e Tuilaepa i le Samoa News e faapea, o le tausaga e 1923 na ulufale mai ai i Amerika Samoa nei, ma amata galue ai i konekarate faufale mo le tele o tausaga, ma faai’u atu ai loa i le Ofisa o Tagata Matutua i Pago Pago seia oo mai i le taimi nei.

 

O le faailoga lona lua na tauaaoina atu e le Kalapu a le Liona mo le tama poo le tina ua loa lana tautua i totonu o le malo, aiga ma le atunuu, lea sa tuuina atu i le afioga a Aumoeualogo Te’o J. Fuavai.

 

O le afioga a Aumoeualogo na amata tautua i le Ofisa o Tiute i le 1956, sosoo ai ma le avea ma faipule, tofia e avea ma Sui Fofoga Fetalai mulimuli ane ai avea ma Fofoga Fetalai. 1966 na avea ma matai o lona aiga i le suafa Te’o, ma faasolo mai ai lana tautua seia oo avea ma Komesina o Leoleo i le taimi o Kovana Lutali, toe avea ai ma Komesina i le taimi o Kovana Tauese Sunia.

 

Sa avea o ia ma Senatoa, sosoo ai ma le avea ma Faatonusili o le Ofisa o Paka ma Malae Taalo, sa avea fo’i o ia ma Faatonusili o le Matagaluega o Galuega a le malo, Faatonusili o Pulega o Uafu ma Taulaga, ma e ova ma le 50 tausaga le umi o lana tautua i le malo, aiga ma le atunuu.

 

O le faailoga lona tonu na saunoa e le Ofisa o le afioga i le alii Faipule mai Uosigitone ia Faleomavaega Eni Hunkin, mo le tagata pito matua lona soifua i le polokalame a tagata matutua, lea na tauaaoina atu i le tina matua ia Fiatagata Tuisamatatele, 97 tausaga o lona soifua.

 

Na faafetaia e le tina ia Fiatagata le avanoa ua mafai ai ona ia maua lenei faailoga taualoa mai le Ofisa a Faleomavaega, atoa ai ma lana faafetai i le malo ona o le aloaiaina o le aso o tagata matutua i lenei tausaga.

 

O le maea ai o le malu taeao na sosoo ai loa lea ma faafiafiaga mai Toomaga e tolu na lautogia mo faafiafiaga o le aso, e i ai le Toomaga a Manu’a i Tafuna; Toomaga a Tina matutua mai le Falema’i i Tafuna; ae faai’u ai loa i le faafiafiaga mai Tama ma Tina matutua o lo o i totonu o le polokalame o le “Toe Afua Mai Matua - TAMM,” ma le “American Samoa Organization of Aging - ASOA”.

 

Na fefiloi faafiafiaga faa Samoa na mafai ona tapenaina e tama ma tina matutua, lea fo’i na matua tali e ai le au maimoa i le matagofie o faaupuga o pese aemaise ai o le onomea o tina matutua i taga eseese o siva faa Samoa.

 

Sa i ai meaalofa na tauaao atu e tama ma tina matutua mo ni isi o taitai o le atunuu e aofia ai le afioga i le kovana sili ma lana masiofo, o le lutena kovana ma lona faletua, ma faai’u ai loa le aso faapitoa o tagata matutua i le asiasiga na aga’i i luma o le maota o le alii kovana i luga o le Mauga o Alii, faatasi ai ma se taumafataga faapitoa na tapenaina e le tina o le atunuu, le masiofo ia Cynthia Moliga.