Ua avea le faigata ona tau ao e le falema’i o le LBJ o tupe o lo o aitalafu ai ni isi o le atunu’u i le falema’i, ma itu ua fautuaina ai e le afioga i le ali’i faipule ia Atualevao Gafatasi Afalava sui o le falema’i na molimau i se iloiloga sa faia i le aso Tofi na te’a nei, ina ia fau se tulafono e mafai ai e le pulega a le falema’i ona tulituli tagata ua taua o “non residents” po o latou “sponsor” fo’i, e totogi atu tupe o lo o latou aitalafu ai i le falema’i.

O le fautuaga a Atualevao na fa’avae mai lea i le saunoaga a le afioga i le ali’i faipule ia Vailoata Eteuati Amituana’i na tu’u atu i sui e to’alua o le LBJ sa molimau, afai ua avea ma fa’afitauli i le falema’i le taumafai e ao mai tupe o lo o aitalafu ai tagata i le falema’i, e manaia ae latou galulue fa’atasi ma le Ofisa o le Loia Sili, ina ia tulituli “sponsor” a tagata mai fafo e totogi atu tupe o lo o aitalafu ai tagata nei i le falema’i, “ae a le mafai, aua loa ne’i toe fa’afouina ID o tagata nei”.

O tagata o lo o i ai a latou aitalafu i le falema’i e pei ona fa’ailoa e le Teutupe fou a le LBJ o Pauline Gebauer i luma o le Fono, o lo o aofia ai tagatanuu o Tutuila ma Manu’a fa’apea ai ma tagata mai fafo ua nonofo mau (residents) ma i latou e le i nofo mau (non residents).

Ae o le saunoaga a le ali’i faipule sa tu’uina atu i luma o le iloiloga a le Komiti o le Soifua Maloloina a le maota o sui sa faia, sa fa’apitoa mo na o tagata ua taua o “non residents”, e ui o lo o i ai fo’i tagatanuu o Amerika Samoa o lo o nofo aitalafu i le falema’i.

Na taua e Atualevao lona lagolagoina o le finagalo o Vailoata, ina ia fau se tulafono e mautinoa ai le mafai ona latou toe maua mai o tupe o lo o aitalafu ai tagata i le falema’i.

“E le faigofie la outou galuega o lo o fai nei, o le tau aoina mai lea o aitalafu a tagata nei”, o le saunoaga lea a Vailoata.

“O le mea moni, e le mafai ona outou aveina tagata nei i le falepuipui, e o o fo’i i lo outou taumafai e tulituli a latou sponsor ina ia totogi tupe o lo o aitalafu ai tagata nei, ua le fa’amaoni fo’i sponsor latou ia, ae ua ou manatu, fai se tulafono, se tulafono e matua malosi lava, ina ia aua ai ne’i toe fa’afouina ID sei vagana ua totogi a latou aitalafu”, o le saunoaga lea a Atualevao i luma o le komiti.

“O le i si mea ia aofia i totonu o le tulafono lea, ia aofia ai ma ‘credit’ a sponsor ma ‘non residents’, so o se auala lava tou te silafia e mafai ona toe totogi mai ai tupe nei, e pei fo’i o le taimi e o atu ai e fa’afou a latou ID ia faia uma, atonu o isi na auala e mafai ai ona toe maua mai tupe o lo o aitalafu ai i le falema’i, aua afai e le faia se mea fa’apena, e toe afio mai lava Iesu o tatou fa’apenei lava”, o le saunoaga lea a Atualevao na tali e ai ni isi o faipule.

“ ....o le isi mea e fai pe afai e le mafai ona faatino isi auala, vaai po o fea e faigaluega ai le sponsor po o ‘non residents’, tipi ese mai a latou siaki e totogi ai aitalafu ia, aveese mai tupe mai latou totogi, e o o i le sponsor, pigi aku ai ma le sponsor lakou ia”, o le isi lea saunoaga Atualevao na toe tali e ai foi ni isi o faipule, ma toe fa’ai’u ai loa lana saunoaga i lona fa’apea atu ma lona si’u fofoga tau le lagona i sui o le falema’i, “ae aua tou te fai i ai na fai atu ai Afalava”.

Na taua e Pauline i luma o le senate ina ua fesiligia ai fo’i le mataupu lenei, o lo o taumafai le falema’i e fai se auala ina ia mafai ai ona totogi atu e tagata uma o lo o nofo aitalafu i le falemai sina vaega tupe o a latou aitalafu, i se auala e le pagatia ai le tagata.