O le aso ananafi na fa’atautaia ai toe sauniga o le tina pele o Rosa Leota Seumanu, lea sa ia tu’ua le mafutaga mafana ma lona aiga ia Aukuso 30, 2014. O ona toe sauniga sa fa’atautaia uma lea i le Malaeimi Ward ma sa amatalia mai le itula e 8:00 i le taeao se’ia o’o i lona toe sauniga i le itula e 11:00 ma molimoli atu ai o ia i lona oliolisaga tumau.

O Rosa Seumanu o se tina sa avea ma faia’oga mai lona olaga tautua ma sa mua’i avea ma faia’oga i le Matatula Elementary a’o alaala lona aiga i lea afio’aga.

O lana fanau e to’a 12 sa latou laulaututu ma molimau e tusa o lona soifua faigaluega o se faia’oga, ae maise o lona soifua tausi aiga mai le laiti o i latou uma se’ia o’o lava ina le toe gafatia ona faia’oga, ma ua litaea mai ai lana galuega.

“O se tina e na’o ia sa tau’avea mai le tausiga o le matou aiga, e le fa’alogo i se leo, ae ala po i le taeao, tapena se matou mea’ai mo le aso atoa, a’o le’i savali e fa’atino tiute i le falea’oga i aso ta’itasi.” O se tala tagi lea a sea tasi o le fanau teine, “ma e faia nei mea uma ona o le alofa ia i matou le fanau.”

E le gata ina faia’oga o ia i a’oga fa’aonaponei, ae o ia fo’i o le faia’oga o a’oga a le Ekalesia a Iesu Keriso o le Au Pa’ia o Aso e Gata Ai, ma o se tasi tiute e le misia o ia ona fa’atino. “O lona soifua fa’atuatua, e le mavae, aua e tima’i ia i matou ina ia lolotu ma le mata’u i le Atua.”

O le umi o le auaunaga a lea tina i lona tofi faia’oga e silia ma le 30 tausaga, ma sa toe si’itia mai i le Manulele Tausala Elementary ma faia’oga ai.

“O ana galuega ua fua mai i alo o le atunu’u, o nisi ua avea ma foma’i, o nisi ua iloga ona tulaga lelei i le Malo, ae o matua fo’i o le fanau, e le o i ai se tasi o falolo, o le ala lea o le faafetai i le Atua mo lenei tina sa ia fa’auia mo i matou uma e to’atele.”

O matua o Rosa Seumanu o Moeva Leota ma Leute Amiatu mai Gautavai, Savaii Samoa. Na fa’aipoipo o ia ia Leota Tua Seumanu mai Salelologa Savaii, e to’a lima ona tuagane ae to’a fitu ona uso. O lana fanau e to’a 19, to’a 52 fanau a ana fanau, ae to’afa fanau a fanau a lana fanau.

Fa’amaise lenei nusipepa i fanau ma aiga loto fa’avauvau!