Na teena e le Pulesili le Tumau o le Ofisa o Femalagaaiga ia Fagamalama Fualaau le molimau a le Pule o le Vaega a le IT a le Ofisa o le Loia Sili ia Ken Dalle sa tu’u atu i luma o le fa’amasinoga, e faapea ua fa’asa o ia ona toe alu i le Ofisa o Femalagaaiga e galue ai.

Ina ua fesiligia e le Fa’amasino Sili ia Michael Kruse ia Fualaau i le aso Tofi na te’a nei, pe faamaonia ua fa’asa Dalle ona toe ulufale i le Ofisa o Femalagaaiga, na tali Fualaau, “e le sa’o lena molimau.”

E fa’alua ona taua e Dalle i luma o le fa’amasinoga le fa’asa lea o ia ona toe ulufale i totonu o le Ofisa o Femalagaaiga, e le ali’i Pulesili o le Ofisa ia Tamasa Dennis Lutu.

O le ulua’i iloiloga o le mataupu lenei i le masina o Iuni na te’a nei, na taua ai e Dalle le tulaga lea i luma o le fa’amasinoga, ina ua fesiligia o ia e le fa’amasino sili, pe i ai se isi auala e mafai ona ia fesoasoani ai i le tau foiaina o le fa’afitauli lea o loo taumafai le fa’amasinoga e saili ona fofo, o le fai e tagata faigaluega a le Ofisa o Femalagaaiga o suiga i luga o le “Look Out List”, ma mafai ai loa ona ulufale mai tagata e pei o Maiava i le teritori, ae ua mae’a ona poloa’i e le fa’amasinoga le fa’asa lea ona toe ulufale mai

I le isi iloiloga o lenei mataupu i le aso Tofi na te’a nei, na toe taua ai fo’i e Dalle i lana molimau le tulaga lava lea e tasi, i le le toe talia lea o ia ona toe galue i le Ofisa o Femalagaaiga, e ui o ia o le Pule o le Vaega a le IT mo le Ofisa o le Loia Sili, atoa ai ma le Ofisa o Femalagaaiga.

Na taua e Dalle i lana molimau e faapea, sa i ai le taimi na imeli atu ai le ali’i lea o lo o vaaia le Vaega a le “IT Division” a le Ofisa o Femalagaaiga ia Lawrence Apo ia te ia, e talosagaina ai lana fesoasoani e uiga i lenei mataupu, ae sa ia fa’ailoa i ai, e fa’atali se’i mae’a lelei taualumaga o le mataupu o loo fa’agasolo, ona la toe feso’ota’i lea.

Na taua atili e Dalle i lana molimau i le fa’amasinoga e fa’apea, o le isi fa’afitauli o loo tula’i mai, talu mai lava le 2013, e le o toe fa’atagaina lava e le Pule o le Ofisa o Femalagaaiga ona ia toe faia se galuega i totonu o lona Ofisa.

“Soo se taimi e vaai mai ai le ali’i Pule ua ou savali atu i totonu o le Ofisa, e tago ai tuli mai ana tagata faigaluega e fai ia te a’u ou te alu ese ma le Ofisa,” o le molimau lea a Dalle i luma o le fa’amasinoga.

“O ai na faia lena fa’atonuga,” o le fesili lea a Kruse ia Dalle, ae na tali le molimau, “O Dennis.”

Na fesili Kruse ia Dalle pe sa i ai se taimi na ia taumafai ai e fesootai ia Dennis e uiga i lona fa’asa o ia ona toe alu atu i le Ofisa, ae na tali le molimau, sa i ai le taimi na fai le latou fonotaga ma le Loia Sili, o ia, fa’apea ai Dennis ma lona fesoasoani ia Fagamalama Fualaau, ma fautuaina ai loa e le Loia Sili ia Dennis ina ia fa’ataga pea o ia ona alu atu i le Ofisa o Femalagaaiga e fa’atino ai ana galuega.

“Na talia la e Dennis le fa’atonuga a le Loia Sili,” o le fesili lea a Kruse, ae na tali le molimau, “E leai, ina ua mae’a le matou fonotaga lea, ae oo i le aso na sosoo ai ina ua ou alu atu i totonu o le Ofisa o Femalagaaiga, ae tago fo’i Dennisi tuli mai le isi ana tagata faigaluega e fai ia te a’u ou te alu i fafo ma le Ofisa.”

Na fa’asaga mai Kruse i le loia a le malo ia Mitzie Jessop-Ta’ase ma fesili i ai poo ai le Faatonusili o le Ofisa o Femalagaaiga, ae na tali le tama’ita’i loia, “O le Loia Sili,” ae na toe saunoa Kruse, ua mafua ona ia fesili i le tulaga lea, e foliga mai e ese foi le isi Fa’atonusili lea o loo taua mai i le molimau a Dalle.

Na fesili Kruse ia Dallle pe mafai ona ia faia se “backup system” mo le “Computer System” a le Ofisa o Femalagaaiga, ae na tali le molimau, “I le taimi a’o mafai ona ou fa’atinoina galuega mo le Ofisa o Femalagaaiga, sa i ai le “backup system”.