MICHAEL SENE

O le taeao ananafi na faila ai e le malo moliaga mamafa fa’aopoopo fa’asaga i le ali’i  mai Aoloau, lea o lo o tu’uaia i lona ulufale fa’amalosi i totonu o le fale a se aiga o le latou afioaga i le vaiaso na te’a nei a o ‘ona, ma ia taumafai ai e tagofia itutinasa o se tamaitai a o moe i luga o lona moega.

O moliaga mamafa fa’aopoopo fa’asaga ia Michael Sene e aofia ai le talepe fale i le tulaga muamua faapea ai ma lona tagofia o itutinosa o se tama’ita’i e le fa’aipoipo i ai. O lo o molia fo’i o ia i moliaga mama e lua o le fa’aleaga meatotino atoa ai ma lona tagofia o le ‘ava malosi ae le i atoa lona 21 tausaga le matua.

O tu’uaiga fa’asaga ia Sene na alia’e mai ina ua maua o ia i totonu o le fale a se aiga Aoloau i le po o le aso 26 Iuni na te’a nei, pe tusa o le te’a o le itula e 12:00 i le leva o le po, ina ua ia ulufale fa’amalosi i totonu o le fale, ma alu ai i totonu o le potu moe a le tamaitai na a’afia, ma ia taumafai ai e tagofia ona itutinosa, ae na avea lea ma itu na te’i ai le tamaitai na a’afia ma e e i luga, ma laga uma atu ai lo latou aiga i le fia iloa o le mea ua tupu, ae o le taimi fo’i lea na oso ai i le fa’amalama Sene ma alu i le atoa i fafo.

Na taua e le tama’ita’i na a’afia i leoleo e fa’apea, e le i faia lava se la mafutaga fa’aleuo ma Sene, ae na te le iloa pe aisea na alu atu ai i totonu o le potu moe, peita’i na taua e Sene i leoleo, sa ia maua se telefoni mai le tama’ita’i na a’afia ina ia alu atu i lo latou fale.

O lo o taofia pea i le toese i Tafuna le ua molia e aunoa ma se vaega tupe ua fa’atulaga e le fa’amasinoga e tatala ai o ia i tua.

TAUMALOTO VILI

O le vaiaso na te’a nei na faila ai e le malo le moliaga mamafa o le ave ta’avale ‘ona fa’asaga ia Taumaloto Vili, e mafua mai i le fa’alavelave lea na maua ai o ia e leoleo o lo o ia fa’afoeina se ta’avale i le masina o Iuni na te’a nei, ae o lo o se’i e le fa’amasinoga lana laisene ave ta’avale mo le umi e 6 masina.

O le moliaga o le ave ta’avale ao se’i le laisene a fa’amaonia e le fa’ amasinoga, e fa’amalosia le tuli e le tagata molia o le umi e 90 aso i le falepuipui, e pei ona mana’omia mai e le tulafono.

Na taua i faamaumauga a le faamasinoga e fa’apea, na fa’ateia leoleo ao tiute i le faaiuga o le isi vaiaso i Tafuna i le masina na te’a nei, ina ua latou vaaia se ta’avale o alu atu saoasaoa mai le itu i Sasa’e e aga’i atu i Sisifo o le motu nei.

Na vave ona toe alu le mu le ta’avale a le ua molia ina ua ia vaaia le ta’avale a leoleo o lo o paka mai i le autafa o le aualatele, ae o le taimi lea ua uma ona lesitala i lalo o masini a leoleo le aofa’i o maila na alu atu ai le ta’avale a le ua molia.

Ina ua fesiligia e leoleo Vili i lana laisene, na ia ta’utino ai i leoleo, o lana laisene o lo o se’i e le fa’amasinoga mo le 6 masina, ina ua ta’usala o ia e le fa’amasinoga i le moliaga o le ave ta’avale ‘ona i le amataga o le tausaga nei.

O le vaiaso fou lea ua faatulaga e toe valaau ai le mataupu a Vili i luma o le fa’amasinoga fa’aitumalo.

TUUAIA SE TAMAITITI TALAVOU FAIA UIGA MATAGA

E 15 tausaga le matua o se ali’i talavou o lo o tuuaia i lona faia o ni amioga mataga i se tama’ita’i papalagi sa auau i le sami i Nu’uuli i le fa’aiuga o le vaiaso, e ala i lona fa’aali lea i ai o lona totoga sa.

Na taua e le tina papalagi na a’afia i leoleo e fa’apea, a o auau na o ia i le sami i le aso To’ona’i na te’a nei, sa ia vaaia ai le ua molia o auau atu i le isi pito o le sami, ma e foliga mai e tau mulimuli atu ia te ia.

Sa faaauau pea ona auau le fafine i le sami, ae na fa’ateia o ia ina ua fa’asaga atu i le isi taimi, o lo o nofo mai le ua molia i luga o se papa ma fa’aaliali atu lona totoga sa ia te ia ma ata e foliga mai e ula.

Na logo e le fafine na a’afia le ofisa o leoleo mo se fesoasoani, ma aga’i atu ai loa leoleo ma fesiligia le tama’ititi na a’afia e tusa ai o lenei mataupu.

SAM SCHUSTER

E 32 tausaga o se ali’i mai Tafuna na taofia e leoleo i le vaiaso na te’a nei, ona o tu’uaiga i lona faia lea o ni gaioiga e save’u ai le filemu, atoa ai ma lona fa’aleagaina o meatotino a le isi aiga latou te tuaoi, o le latou pa uaea e si’omia ai le fanua.

Na taua i fa’amaumauga a le fa’amasinoga e fa’apea, o le vevesi na tula’i mai ina ua ita le ua molia i le sili atu o le pa uaea a le aiga na aafia i le latou fanau, o lea na alu ai loa ua inupia ma fo’i ane ai ma fa’aleaga le pa e ala i lona sasa o le isi pito o le pa i se u’amea.

Na aga’i atu le tamaloa e ana le pa ae fa’asaga ane le ua molia ma velo i le u’amea, peita’i sa misi lana togi ae tau i le faitoto’a o le fale ma leaga ai le pito o le faitoto’a.

Ua poloaina e le fa’amasinoga le ali’i o Sam Schuster e aua ne’i ona toe tagofia le ava malosi, pe toe taumafai fo’i e tu i le fanua o le aiga o lo o latou vevesi, po o lona taumafai fo’i e faia ni gaioiga e faafefe pe fa’amata’u ai se isi o le aiga.