TEENA TALOSAGA MALO FA’ASAGA MATAUPU A JERMAINE MAYBIR

Na teena e le fa’amasinoga maualuga i le vaiaso na te’a nei se talosaga na fa’aulu e le loia a le malo o Tiffany Oldfield, mo se avanoa e tu’u fa’atasi ai e le fa’amasinoga le mataupu fou lea na fa’atoa faila fa’asaga i le ali’i o Jermaine Maybir, ma le mataupu tuai na latou failaina i le masina o Aokuso na te’a nei.

Na fa’ailoa e le ali’i fa’amasino ia John Ward II i le itu a le malo e fa’apea, talu ai o le mataupu fou fa’asaga ia Maybir o lo o i luma o le fa’amasinoga fa’aitumalo, e na o le tasi le moliaga mama o lo o tu’uaia ai o ia, ae o le mataupu muamua lea o lo o i luma nei o le fa’amasinoga maualuga e tolu moliaga mamafa o lo o tu’uaia ai o ia, ua manatu ai le fa’amasinoga e le tatau ona tu’ufa’atasia mataupu ia e lua, aua e le feaiaa’i galuega a fa’amasinoga e lua.

Na fautua Ward ia Oldfield ina ia fa’agasolo pea taualumaga o le mataupu fou lea ua faila fa’asaga ia Maybir i luma o le fa’amasinoga fa’aitumalo, ma, afai loa e talia e le fa’amasinoga le tali ioe a le ua molia i le moliaga mama e tasi o lo o tu’uaia ai o ia, ona fa’atali loa lea o le fa’amasinoga i se talosaga a le malo e solofua ai le mataupu o lo o i luma o le fa’amasinoga maualuga.

O lo o tu’uaia Maybir i lona faia o uiga mataga i se teineititi e 15 tausaga le matua, ma faila ai loa e le malo na o moliaga mamafa e tolu fa’asaga ia te ia i le masina o Aokuso, lea e aofia ai le moliaga o le faiaiga ma se teineititi e laititi i lalo o le tulafono, tagofia o itutinosa o se teineititi, atoa ai ma lona faia o gaioiga fa’afeusuaiga i se teineititi.

I le lua vaiaso talu ai, na taumafai ai le malo e faia sa latou maliliega ma le ua molia e fa’amuta ai lenei mataupu, ma latou faila ai loa le moliaga mama fa’asaga i le ali’i ua molia i le vaiaso na te’a nei, o lona faia lea o ni gaioiga e ono lamatia ai le saogalemu o se teineititi laititi, o le moliaga fo’i lea ua manatu le malo e tali ioe ai le ua molia, ae solofua isi moliaga mamafa o lo o totoe ai i le pepa o tagi sa latou fa’aulu.

O le aso 9 Ianuari 2015 lea ua tolopo i ai le mataupu a Maybir i luma o le fa’amasinoga maualuga, ae o le aso 30 Tesema ua fa’atulaga e toe tula’i ai i luma o le fa’amasinoga fa’aitumalo, ma o lo o taofia pea o ia i le toese i Tafuna i le taimi nei e fa’atali ai taimi ma aso o ana iloiloga i luma o le fa’amasinoga.

TAUAAO FELISE TOILOLO SE OFA MAI LE MALO

O le ali’i lea sa galue i le falema’i o le LBJ i Fagaalu i se taimi ua tuana’i atu, lea o lo o tu’uaia i lona ave fa’agaoi o se vaega tupe a le falema’i e tusa ma le $3,800, ua ia tauaaoina se ofa mai le itu a le malo ma le fa’amoemoe, o le a fa’amuta ai loa taualumaga o lenei mataupu i luma o le fa’amasinoga.

Ina ua valaau le isi iloiloga fa’apitoa a Felise Toilolo i le vaiaso na te’a nei, na fa’ailoa ai e lana loia fautua ia Fiti Sunia i luma o le fa’amasinoga e fa’apea, ua mae’a ona ia tauaaoina le ofa mai le malo, ae manaomia sina taimi la te talanoa ma fetufaa’i ai ma Toilolo e uiga i tu’utu’uga uma o le maliliega.

Na talia e le fa’amasinoga le talosaga a le itu tete’e, ma toe fa’atulaga ai loa le isi iloiloga o lenei mataupu i totonu o le isi lua vaiaso, ma le fa’amoemoe e fofoga aloaia ai loa le maliliega lea ua sauni itu e lua e tu’uina atu i luma o le fa’amasioga.

O le masina o Fepuari 2015 lea o lo o fa’atulaga e faia ai le fa’amasinoga autu a Toilolo, ae afai e talia e le fa’amasinoga le maliliega ua latou faia ma le malo, lona uiga o le a le fa’ataunu’uina lana fa’amasinoga autu lea.

O lo o tu’uaia fa’atasi Toilolo ma le isi tama’ita’i sa galue fo’i i le LBJ ia Jennifer Tofaeono, lea ua mae’a ona ta’usala o ia i le moliaga o lona fesoasoani lea i se isi tagata e fa’atino le solitulafono o le gaoi.