Ads by Google Ads by Google

Tala o le Vavau: TAUA O LE AEA I SASA’E MA SISIFO

O se tasi lenei o vavau e mata’utia foi lona tulaga taua i le tala tuu a Samoa, aua o iinei na mafua ai se tasi o muagagana faa faleupolu, ina ua faia le taua ua faaigoaina o le “Taua o le Aea i Sasae ma le Aea i Sisifo”, lea na taitaia e le tamaitai o Nafanua le Tuputafa’ifa o Samoa faapea ai ma le ulugalii lea na o latou fetaui i luga o le matafaga, o Matuna ma Matuna.

 

O le pa lenei e taua o le Pa i Fualaga, o loo taoto i le nuu o Faiaai. I aso uma mavae, sa maualuga lava foliga o le pa lenei aua o le pa e tuaoi ai nuu, peitai o le taimi nei pe a toe asia, ua toe lava o ni maa o loo paepae solo ai, ae o loo iloga lava foliga i le vaega tonu sa taoto ai le pa.

 

Fai mai le tala ua taupule le taua e le tamaitai o Nafanua ma le ulugalii o Matuna ma Matuna, ma ua i ai foi ‘ai o le taua e pei ona faatonuina ai e le tamaitai le ulugalii e ao ona la usitaia.

 

O le a ui ane le tamaitai i le isi itu ala ae o le a ui atu le ulugalii i le isi itu ala mo le faaumatiaina o le fili, o tagata uma o loo i ai i le ituala a le tamaitai e sulu agai atu i le ituala a le ulugalii, o le a le tuliloaina e le tamaitai, ae tuu ai pea o le a fasioti e le  ulugalii, o tagata uma foi o le itu au a le fili mai le ituala a le ulugalii o le a sulu atu i le ituala a le tamaitai o Nafanua, o le a le tuliloloaina e le ulugalii ae o le a taatia ai pea e faaumatia e le tamaitai o Nafanua.

 

A’o lei alu le taua, sa poloa’i Nafanua i le ulugalii e faapea, “A lua pa’ia le pa i fualaga, sua le tuli aua le Alii o Aiga.” O lona uiga o lea faaupuga, afai ae taunuu atu le taua i le Pa i Fualaga, ona ola loa lea o le taua mo le Alii o Aiga, ma o le Alii o Aiga o loo agai i ai le tala a le tamaitai o Nafanua, o Sealiitu lea o loo afio i le itulagi tonu lea o loo agai atu i ai le taua.

 

Ua amata le taua ma e uiga ese le malosi ma le atamai o le tamaitai i le tauina o lenei taua, sa toatele foi ituau a le fili na fafasi e le tamaitai, e faapena foi i le ituau a le ulugalii o Matuna ma Matuna, peitai o le mea ua tupu, ua le usitaia e le ulugalii tuutuuga sa latou faia ma le tamaitai e tusa ai o le tauina o le taua, ona o tagata uma lava mai le ituala a le ulugalii na sulu agai i le ituala a le tamaitai o Nafanua.

 

Ae na tuliloa e le ulugalii ona o le la naunau ia faaumatia a la tagata, peitai na avea lea ma itu na toe fasiotia ai i laua i le laau a Nafanua, ma o iinei na maua ai le isi alagaupu faamuagagana a faleupolu e faapea, “ua ola i le fale le laau a Nafanua,” e faamanatu ai le taimi lea na ia toe fasiotia ai lana itu taua.

 

Ona faaauau ai lava lea e Nafanua le taua seia oo lava ina taunuu i le isi vaega eleele lea o lo’o ta’ua, na lelea ai le tiputa o le tamaita’i o Nafanua, ma faatoa iloa ai loa e tagata o ia o le tamaitai, ma faaigoa ai loa lea vaega eleele, o le “Malae o le Ma”.  Fai mai ua lagona le maasiasi o le isi itu taua ina ua faatoa latou iloa o le tamaitai lea na o latou tau, ae ua toatele tagata ua fasiotia e le tamaitai. E anoanoa’i isi vavau o loo taoto i totonu o le tala e faatatau ia Nafanua, ma o le a mafai lava ona faasolosolo atu pe a oo atu i ai la tatou polokalame, i nisi o vavau o loo i totonu o nuu ma afioaga eseese i le atunuu.