O le ali’i e 56 tausaga le matua lea na tu’uaia i lona faia o uiga mataga fa’asotoma i se teineititi e 12 tausaga le matua i le tausaga na te’a nei i Poloa, ua ia ta’utino i luma o le fa’amasinoga maualuga i le taeao ananafi, e fa’amaonia tu’uaiga sa faia fa’asaga ia te ia, i lalo o se maliliega sa latou sainia ma le malo ma ua talia fo’i e le fa’amasinoga.

O le susuga a Ati Fa’alavelave na ulua’i tu’uaia e le malo i moliaga mamafa e tolu e aofia ai le moliaga pito mamafa o lona faia o ni uiga mataga i se teineititi e i lalo o le 12 tausaga le matua, faia o amioga mataga fa’asotoma, ma lona tagofia o itutinosa o se teineititi laititi, ae i lalo o le maliliega na sainia e le ua molia ma le malo ma ua talia fo’i e le fa’amasinoga, ua ia tali ioe ai i le moliaga lona lua o lona faia o ni uiga mataga fa’asotoma fa’asaga i se teineititi.

I le talia ai e le fa’amasinoga o le tali ioe a le ua molia, na toe talosaga ai loa le malo ina ia solofua isi moliaga o lo o totoe ai i le pepa o tagi sa latou fa’aulu, lea fo’i sa talia e le fa’amasinoga.

I le tali ioe ai o Fa’alavelave i le moliaga e pei ona ta’usala ai o ia, sa ia ta’utino ai e fa’apea, i se taimi o le afiafi o le aso 9 Oketopa 2015, sa ia tagofia ai le itutinosa o le teineititi laititi na a’afia, ma o lea gaioiga sa ia faia sa le tusa lea ma ala o le tulafono.

Ina ua fesiligia e ali’i fa’amasino ia Fa’alavelave e fa’amatala lana gaioiga sa faia, na taua ai e le ua molia e fa’apea, i le afiafi e pei ona taua, sa matua ova ai lava lona tagofia o le ‘ava malosi, sa ova fo’i lona ‘ona.

A o savali atu e aga’i i le fale, sa la fetaui ai ma le teineititi na a’afia o lo o savali mai i luga o le auala, o lea na ia tago ai loa ua toso mai o ia ma fusi mai i lona tino, sosoo ai loa ma lona tagofia o lona itutinosa.

E tusa ai ma fa’amaumauga a le fa’amasinoga e uiga i le mataupu lenei, o le teineititi na a’afia na tuli e lona tina i se feau i le fale a ona grandparents, ae tula’i mai ai loa le fa’alavelave i luga o le auala ina ua toe fo’i e alu i lo latou fale i le afiafi o le aso e pe ona taua.

O le teineititi na a’afia sa savali ane i le isi itu o le auala, ae o Fa’alavelave sa savali ane i le isi itu, ae ina ua felata’i i laua, na taumafai ai loa le ua molia e ui aga’i i le itu o le auala o lo o savali mai ai le teineititi na a’afia, ma ia taumafai ai loa e toso o ia aga’i i se pupu vao i tafatafa lava o le auala ma fai ai uiga mataga ia te ia, ao ia taumafai pea e una’i ese o ia, ma, ina ua mae’a ona faia e le ua molia uiga mataga i le teineititi na a’afia, sa ia tago loa ua na’i ese o ia.

E pei ona manino i fa’amaumauga a le fa’amasinoga, na fa’amatala e le teineititi na a’afia lona taumafai e maua sina ea e manava ai, peita’i sa fa’a faigata ona o lo o taofi e le ua molia o ia i lalo ao ia faia uiga mataga ia te ia.

O le moliaga lea ua ta’usala ai Fa’alavelave e le fa’amasinoga maualuga, e mafai ona fa’asala ai o ia i le toese mo se umi e amata atu i le 5 tausaga ae le silia i le 15 tausaga.

O lo o taofia pea le ua molia i le toese i Tafuna e fa’atali ai le aso 6 Aperila lea ua fa’atulaga e lau ai lana fa’asalaga.

O le ali’i loia ia Russell Smith na tula’i mo le itu a le malo i lenei mataupu, ae o le ali’i loia fautua ia Michael White na tula’i mo Fa’alavelave.

O le afioga i le ali’i fa’amasino sili lagolago ia Lyle L. Richmond na fa’atautaia le iloiloina o lenei mataupu, fa’atasi ai ma le lagolagosua a ana fa’amasino lagolago ia Mamea Sala Jr ma Tunupopo Faleafaga.