O le ali’i lea na tu’uaia e le malo i lona fa’ao’olima i lona tama, e ala i lona fa’aaoga o se agaese e ta ai lona ulu ma manu’a tigaina ai, ua solofua e le fa’amasinoga maualuga tu’uaiga sa faia fa’asaga ia te ia, ina ua talia e le fa’amasinoga se talosaga na fa’aulu e le malo e tusa ai o lenei mataupu.

Na tu’uaia e le malo ia Mark Mulipola i le moliaga mamafa o le fa’ao’olima i le tulaga muamua, o se fa’asalaga e mafai ona nofosala ai se tasi i le falepuipui mo le olaga atoa, po o le isi fa’asalaga o le tuli lea o le umi e le itiiti ifo i le 10 tausaga i le toese, ae le sili atu i le 30 tausaga.

O le masina o Iulai 2013 na tulai mai ai le fa’alavelave lenei i Malaeimi, ma amata taofia mai ai loa Mulipola i le toese i le taimi lea, ina ua le mafai ona ia totogiina le $150,000 sa fa’atulaga e le fa’amasinoga e tatala ai o ia i tua, a o lea ua fa’asa’olotoina nei o ia e le fa’amasinoga.

O le loia a le malo ia Russel Smith na fa’auluina le talosaga ina ia solofua tu’uaiga fa’asaga ia Mulipola, i se iloiloga pu’upu’u sa fa’ataunu’uina i luma o le afioga i le ali’i fa’amasino sili ia Michael Kruse.

Ina ua fesiligia e Kruse ia Smith i le mafua’aga o le talosaga e solofua tu’uaiga fa’asaga ia Mulipola, na taua ai e le ali’i loia e fa’apea, o lo o fa’avae le fa’aiuga a le malo i luga o mau fa’amaonia mai le foma’i sa ia faia se su’esu’ega fa’apitoa i le tulaga o lo o i ai le malosi o le mafaufau o Mulipola.

I lea su’esu’ega, ua fa’ai’uina ai e le foma’i, le a’afia o Mulipola i le gasegase o le mafaufau, e le i mafai fo’i e le malosi o lona mafaufau ona fai se fa’aiuga mautu i le taimi sa ia fa’atinoina ai le solitulafono.

A o le i tuuina atu e Kruse lana fa’aiuga e talia ai le talosaga a le malo, sa ia fa’ailoa i le loia a le malo e fa’apea, o le a fa’alogo le fa’amasinoga i lana fa’amatalaga ua tu’uina atu, aua o ia o le loia mo le malo.

E tusa ai ma fa’amaumauga a le fa’amasinoga o lo o taua ai e fa’apea, o le fa’alavelave na tula’i mai ina ua fa’atonu e le tama ia Mulipola e alu e ao mai se vai Samoa e fai ai le fofo, peita’i sa musu le ua molia e usita’i i le fa’atonuga a lona tama, o lea na fa’atonu ai loa e le tama lana fanau laiti e o e ao mai le vai mo le fofo ma fa’ataunu’u ai loa le fofo.

Ina ua mae’a le fofo, na savali mai ai lo le tama mai le latou fale pito i tua sa fai ai le fono e aga’i atu i le latou fale pito i luma, ae fa’afuase’i loa ona osofa’i o ia e le ua molia i le sapelu ma manu’a ai lona ulu, ae o le ta lona lua na manu’a ai lona lima, ina ua ia fa’aaoga lona lima e tali ai le ta lona lua.

E lata i le vaiaso o taofia le tama i le falema’i ae toe te’a i tua, e mafua mai i le tuga o manu’a na a’afia ai lona ulu ma lona lima.

O afioga i ali’i fa’amasino lagolago ia Fa’amausili Pomele ma Muasau Tasina Tofili na lagolagosua i le fa’amasino sili i le iloiloina o le fa’aiuga o lenei mataupu.