O le pasia ai e le Senate i le vaiaso nei o le pili tau fa’aofi lea na talosagaina e le kovana, e fa’atulaga ma aiaia ai le malosi o vailaau e tatau ona maua i luga o fualaau’aina i le atunu’u, na saunoa ai le afioga i le ali’i Senatoa ia LeAtualevao Asifoa e fa’apea, e le gata ua pasia e le senate le pili e puipuia ai fa’atoaga, ae o le a mafai ai fo’i ona puipuia le soifua maloloina o tagata o le atunu’u.

E 15-0 le palota na pasia ai e le maota maualuga lenei tulafono, ma ua taoto atu nei i le maota o sui mo sa latou fa’aiuga.

O le fa’aiuga a le senate e pasia le pili na faia lea ina ua mae’a se iloiloga sa faia ma sui o ni isi o Ofisa a le malo o lo o galulue i le fa’amalosia o tulaga tau fa’atoaga e aofia ai le Ofisa o Fa’atoaga, EPA ma le Vaega o Laufanua Fa’asao (Land Grant) i le Kolisi Tu’ufa’atasi.

O le tulafono lea ua pasia e le Senate, o le a fa’atulaga ai loa le malosi o le vailaau e mafai ona fana ai togalaau’aina, ina ia aua ne’i ova atu ma le malosi o vailaau o lo o fa’atulaga mai i tulafono a le feterale mo le aufai fa’atoaga.

Pau le fa’afitauli o lo o tula’i mai i le taimi nei e pei ona saunoa LeAtualevao, e le o i ai se masini e mafai ai ona su’e le malosi o le vailaau o lo o i luga o fualaau’aina, ae na folafola e le Fa’atonusili o le EPA i luma o le komiti i le taimi o le iloiloga ia Ameko Pato, ia tu’u atu aso e 90 e galulue ai lona Ofisa ma le Ofisa o Fa’atoaga mo le sailia o se vaega tupe e fa’atau mai ai le masini o lo o mana’omia.

O le agaga autu na mafua ai ona talosagaina e le kovana ma le faigamalo lenei tulafono, na fa’avae mai lea i lalo o ni fautuaga mai le Ofisa o Fa’atoaga, i le mae’a ai lea ona molimauina o le malosi o vailaau o lo o fa’aaoga e ni isi o le aufai fa’atoaga Asia e teu ma tausi ai a latou fa’atoaga laau’aina.

E le i toe utuva le tele o fa’asea mai ni isi o le atunu’u, i le masalomia lea o le malosi o vailaau o lo o fa’aaoga e ni isi o le aufai fa’atoaga e tausi ai a latou fa’atoaga, aemaise lava i fa’atoaga o lo o fa’atau atu i le polokalame o Taumafa a le Fanau Aoga i le Ofisa o Aoga, atoa ai ma fa’atoaga o lo o fa’atau atu i le maketi a le atunu’u.

Na taua e le sui fa’atonusili o le Ofisa o Fa’atoaga ia Peter Gurr i luma o le komiti a le Senate i le vaiaso na te’a nei, o fa’atoaga uma lava o lo o fa’atautaia e tagata Asia sa fa’amaonia ia latou suesuega le tele o le vailaau o lo o fa’aaoga ai, ua uma ona latou tapunia ona o le manatu ia puipui le saogalemu o le atunu’u aemaise fanau aoga.

Talu ai le taua o lenei tulafono, o le a taualoa ai i totonu o le 60 aso, talu mai le taimi na pasia ai e le Fono Faitulafono ma fa’amaonia e le ali’i kovana.