O le vaiaso ua te’a na taofia ai e leoleo i le toese i Tafuna se tama’ita’i e 36 tausaga le matua, ona o tu’uaiga i lona faia lea o uiga mataga i se ali’i e 16 tausaga le matua.

O moliaga ua tu’uaia ai e le malo Carmen Galumalemana Hunkin e aofia ai moliaga mamafa e fa o le faiaiga ma se tamaititi e laititi i lalo o le tulafono, faia o uiga faasotoma, tagofia o itutinosa o se ali’i e le fa’aipoipo i ai, faia o uiga mataga fa’afeusuaiga, ma le moliaga mama e tasi o lona faia o ni gaioiga e ono lamatia ai le saogalemu o fanau laiti.

Taua e le ofisa o le loia sili, o le taimi muamua lea ua moliga ai se tama’ita’i i tuuaiga o le faiaiga i se ali’i i lalo ifo o le 18 tausaga o le matua.

O le mataupu lenei na tofu atu i le Ofisa o Leoleo, ina ua talosagaina e se tama’ita’i se fesoasoani mo lona tuagane e 16 tausaga o lo o a’afia i lenei mataupu, ina ua ia vaaia ni suiga i lona olaga, atoa ai ma le masalomia o se la mafutaga fa’aleulugali’i ma le ua molia.

Na taua e le molimau i leoleo e fa’apea, e ese le atamai o lona tuagane i le aoga, sa masani ona ‘A’ uma ana mataupu i taimi ua tuana’i, peita’i o suiga ua vaaia ia te ia, e le gata ua maua ‘D’ ma ‘F’ i ana mataupu i le aoga, ae ua amata fo’i ona pepelo ma sola ese ma le latou aiga.

Na taua e ni isi o molimau lo latou vaaia o Hunkin ma le ali’i o lo o a’afia o ‘J.A’ i totonu o le ta’avale a Hunkin, o isi fo’i taimi e vaaia le la o fa’atasi e fa’atau.

Na taua e le isi molimau e 16 tausaga le matua i leoleo, o ia lea o ‘TRO’, o le tausoga o le ali’i o lo o a’afia, lona vaaia o Hunkin ma ‘J.A’ o feusuai’ i totonu o le potu i le isi aso, atoa ai ma le la faia o isi lava amioga mataga, sa fai fo’i atu fo’i ‘J.A’ ia te ia, o lo o mana’o ina ia ma’itaga Hunkin ia te ia.

O le isi molimau na fesiligia e leoleo, o le ali’i o ‘G.A’, o le uo lea a le ali’i o lo o a’afia, lea na ia fai i leoleo, sa fa’amatala uma atu e ‘J.A’ ia te ia le la mafutaga ma Hunkin, e aofia ai le la mafutaga feusuaiga.

O molimau mulimuli e to’alua na fesiligia e leoleo e pei ona taua i faamaumauga a le fa’amasinoga, o le tuagane laititi a Hunkin ma lana uo teine, lea sa ia fa’amatala i leoleo, sa latou nonofo fa’atasi uma ma Hunkin, o ‘J.A’ i le fale o lana uo teine i se taimi o le masina o Novema 2013, ae na te le’i fa’amatala i ai feusuaiga sa faia i le va o Hunkin ma le ali’i na a’afia.

Ae ina ua fa’amatala uma e le uo teine a le tuagane a Hunkin i leoleo lona vaaia o Hunkin o feusua’i ma J.A i le tele o taimi i totonu o se potu i lona fale, na ta’utino ai loa fo’i le tuagane a Hunkin i leoleo, e fa’amaonia uma tala e fa’atatau i le mafutaga a lona tuafafine ma J.A, ae na mafua ona musu e fa’amatala i le taimi muamua, sa popole ina ne’i a’afia atu ai lona tuafafine.

Na taua e le tuagane a Hunkin i leoleo lona vaaia o lona tuafafine o lo o feusua’i ma J.A, e le gata i se taimi o Setema ma Oketopa 2013, ae faapea fo’i i le aso 20 Iulai 2014 i le latou fale.

Ina ua fesiligia e leoleo ia Hunkin, sa ia ioeina ai le i ai o se mafutaga fa’aleulugali’i i le va o ia ma J.A, e ui sa ia iloaia e na o le 16 tausaga o J.A, e fa’atele ona la momoe ma J.A, lea na amata mai ia Oketopa 2013, ae mae’a i le aso 20 Iulai 2014.

Sa ia taua i leoleo le malamalama lelei o J.A i tulaga fa’aletonu ua oo i ai le la ulugali’i ma lona to’alua, sa ia taumafai fo’i e fa’amuta le la mafutaga ma J.A ae sa fai atu le ali’i na a’afia, o le a pule i lona ola pe afai e uma le la mafutaga.

O lo o taofia pea Hunkin i le toese i Tafuna ina ua le mafai ona ia totogi le $20,000 ua fa’atulaga e le fa’amasinoga e tatala ai o ia i tua.