O suiga fou lea ua faia e le Ofisa o Femalagaaiga, e le gata e sailia ai tagata mai fafo o lo o nonofo faasolitulafono i le atunuu, ae o se taumafaiga fo’i ina ia aua ai nei toe i ai ni tagata mai fafo e malaga mai ma nonofo faasolitulafono i le teritori.

O suiga e pei ona taua i se iloiloga sa faia i luma o le Komiti o Mataupu Tau Tulafono a le maota o sui i le vaiaso nei, o le tofia lea o tagata faigaluega a le Ofisa o Femalagaaiga latou te mata’ituina tagata uma e ulufale mai i le teritori i pemita 30 aso ma le 14 aso, ina ia mautinoa, e toe fo’i i latou i le taimi tonu e tatau ona toe fo’i ai.

E ese mai i le auala lea, o lo o fesoasoani malosi fo’i sui o aiga, nuu ma itumalo i le fa’ailoa lea o tagata ua ova aso i le teritori, e ala i lo latou logo o le Ofisa o Femalagaaiga.

O molimau a le malo mo lenei iloiloga e aofia ai le loia sili lagolago ia Mitzie Jessop ma Faga Fualaau, se sui sinia mai le Ofisa o Femalagaaiga.

Saunoa le sui fofoga fetalai ia Talia Faafetai Iaulualo, o le faafitauli lea ua maitauina i le taimi nei i le teritori, ua to’atele naua tagata mai Asia.

Na fesili Talia i molimau pe toafia se aofai o tagata ‘overstayer’ o lo o totoe i le atunuu e lei lesitalaina i le polokalame o le Amnesty a le kovana, ae na tali molimau, “e le o mafai ona manino lea numera, ae o lo o galulue pea le ofisa e toe fa’afoi tagata overstayer e le i lesitala i le polokalame”.

O popolega e pei ona saunoa le afioga Vui Florence Saulo, ina nei mae’a atu le Amnesty o lenei tausaga, ae toe alia’e fo’i se isi Amnesty i le lumana’i mo ni isi tagata ‘overstayer’ e toe maua i le atunuu, ae na taua e Jessop, o le a taumafai pea le ofisa e faia auala uma e taofia ai le toe tula’i mai o lenei fa’afitauli i le lumana’i.

Ina ua fesiligia e Faimealelei Anthony F. Allen ia molimau, pe mafai ona taofi le toe i ai o ni isi tagata overstayer i le atunuu, ae na tali Jessop, e faigata tele ona faamautu lea tulaga, ona e faigofie ona afea e tagata mai atunuu e pei o Samoa laufanua o Amerika Samoa e pei o va’a e malaga i le sami, e ono avea lea ma auala e ofi mai ai tagata mai fafo ma nonofo faasolitulafono i le atunuu.

I le faaiuga o le iloiloga o lenei mataupu, ua manino ai le galulue malosi o le pulega fou a le Ofisa o Femalagaiga i le taimi nei, e saili tagata uma e le i lesitalaina i le polokalame o le Amnesty ina ia toe fa’afo’i i o latou atunuu.