Ua fa’aalia e le Loia Sili a le malo i luma o le Senate i le vaiaso nei, o le au ‘overstayer’ uma lava e le i lesitalaina o latou suafa i le polokalame a le ‘Amnesty’ lea sa tapena e le kovana ma le faigamalo, ae o lo o fa’aauau pea ona lalafi solo, ua i ai le fuafuaga a le Ofisa o Femalagaaiga o le a saili fa’atapito uma i latou ma toe fa’afo’i i o latou atunu’u, pe afai ae mae’a le isi laasaga o le polokalame o le ‘Amnesty’ a le kovana o lo o sosoo ai.

Na taua e ni isi o afioga i senatoa o le komiti o Mataupu Tau Tulafono a le Senate lo latou fa’anoanoa tele, ina ua manino i le molimau a le Loia Sili, e le i mae’a ona lesitala tagata overstayer i le polokalame o le ‘Amnesty’.

Na fesili le afioga i le alii senatoa mai Manu’a ia Nuanuaolefeagaiga S. Nua ia Talauega Eleasalo Ale po o anafea na amata mai ai ona nonofo faasolitulafono tagata mai fafo i le teritori, ae na tali le loia sili, o se vaitaimi i le 1996-1997 ina ua mae’a le isi ‘Amnesty’ na faia e le malo ma talia e le Fono Faitulafono, na toe amata mai ai loa iina ona toe aga’i mai tagata mai fafo ma nonofo faasolitulafono i le teritori, ao lea fo’i ua avatu le fesoasoani a le malo e ala i le ‘Amnesty’ e fa’aleleia ai a latou pepa nofomau, ae foliga mai e to’atele lava o lo o mumusu e lesitala o latou suafa.

Na toe fesili Nuanuaolefeagaia ia Talauega pe to’afia tagata ‘overstayer’ e le i lesitalaina o latou igoa, ae na tali le loia sili, “e le iloa pe to’afia”.

“Pau le gaioiga lea ua sauni le matou ofisa e fai, o tagata uma lava mai fafo e le o i ai o latou igoa i le lisi lea ua mae’a ona lesitala, o le a toe fa’afo’i loa i o latou atunu’u”, o le saunoaga lea a le loia sili na lagolagoina e ni isi o afioga i Senatoa.

Saunoa le afioga i le alii senatoa ia Tuiasina Esera e fa’apea, e tatau ona tofia ni tagata faigaluega a le Ofisa o Femalagaaiga e mataituina tagata e ulufale mai i le teritori, ina ia mautinoa e toe fo’i i le taimi e mae’a ai le aoga o pemita na malaga mai ai.

Saunoa le loia sili e fa’apea, o le fa’afitauli numera tasi na mafua ai ona to’atele tagata mai fafo ua nonofo faasolitulafono i le teritori, e le i lelei ona faamalosi tulafono tau femalagaaiga i tausaga ua mavae.

Na fesili le afioga i le alii senatoa ia LeAtualevao Sosese Asifoa i le loia sili po o i ai se faaiuga faasaga i sponsor na latou aumaia tagata mai fafo, ae na tali le loia sili, e leai se fuafuaga faasaga i sponsor, o lo o manino le tulafono, afai e ova aso e nofo ai le tagata i le teritori, e tatau ona toe fa’afo’i i le atunu’u na malaga mai ai.