O se tasi o mataupu na fesiligia i le taimi na iloilo ai le tupe fa’asoasoa a le Matagaluega o le Soifua Maloloina i le vaiaso na te’a nei, o le fesiligia lea o le mafua’aga ua to’alima ai sui fa’atonusili o lo o taua i totonu o le latou tupe fa’asoasoa mo le tausaga tupe fou 2015.

O le afioga i le alii faipule ia Vaamua Henry Sesepasara na ia fesiligia lenei mataupu, i lona fia malamalama i le mafua’aga ua to’alima ai sui faatonusili a le matagaluega, peita’i na fa’amanino e le faatonusili o le matagaluega ia Motusa T. Nua e fa’apea, e ui e to’alima sui fa’atonusili o lo o taua i totonu o le paketi, o le mea moni lava e na o le to’atasi lava le tagata o lo o avea ma sui fa’atonusili o le matagaluega i le taimi nei.

Na taua e Motusa e fa’apea, o le tagata lea sa avea muamua ma sui faatonusili mo le matagaluega i tausaga ua mavae, o lo o tumau pea lava lona igoa i le lisi o tagata faigaluega e ui na te le o toe faatinoina tiute o le sui faatonusili.

Saunoa atili Motusa e faapea, o le tagata faigaluega lea ua tofia e galue i le lala o le Soifua Maloloina i Tafuna, ma o lo o tumau pea lona totogi sa galue mai ai i le tele o tausaga, o se tulaga faigata foi le faia o se suiga i lona totogi, ona o ia o se tagata faigaluega tumau a le malo.

O isi avanoa sui faatonu o lo o i totonu o le tusi paketi a le matagaluega e pei ona saunoa Motusa, ua leva na tatau ona sui peitai e le i faia lava i ai se galuega a le Ofisa o Tagata Faigaluega a le malo.

Sa ia faailoa foi i luma o le fono, e eseese uma lava totogi o tagata ia e taua o sui faatonusili, ae o le itu e tatau ona silafia e le fono, e na o le tasi lava le sui faatonusili a le matagaluega.

Saunoa le fofoga fetalai ia Savali Talavou Ale e fa’apea, o le isi faafitauli o lo o maitauina i le tele o taimi, e foliga mai e alu atu lava le faatonusili ma avatu lana sui faatonusili, ae o lo o i ai pea lava le tagata ua uma ona tofia e avea ma sui faatonusili, ona tula’i mai ai loa lea iina o le fa’afitauli.

Na fautua Savali i le alii faatonusili, ina ia silasila toto’a i tulaga faapea, ina nei avea ma itu e tulai mai ai ni isi faafitauli i totonu o le matagaluega ma lana paketi i le lumana’i.

Saunoa Vaamua e faapea, e le tatau ona i ai i luga o le paketi a le matagaluega faamaumauga faapenei, e taitai sese ai le fono i faamaumauga nei, ua tatau foi ona fesootai le matagaluega o le Soifua Maloloina ma le matagaluega o Tagata Faigaluega a le malo, mo le fa’asa’oina o tulaga faaletonu e pei ona taua.

E ese mai i le mataupu e faatatau i sui faatonusili a le matagaluega, o se tasi o itu na faalauiloa e le faatonusili i lana saunoaga, o le tatalaina lea o le tautua a le matagaluega mo le motu o Manu’a, i lalo o se polokalame o lo o unaia e le alii kovana.

Saunoa Motusa e fa’apea, o tautua uma lava o lo o maua e tagata o Tutuila, ua faamoemoe e tatala i Manu’a i se taimi e le o toe mamao.