I le fa’aautu ai o le aso o Tupulaga Talavou i le vaiaso na te’a nei i le manatu, o i latou o le lumana’i o aiga ma le atunu’u, na va’aia le felanulanua’i o le malae o le Su’iga’ula a le Atuvasa i Utulei i le taeao o le aso Faraile na te’a nei, Iulai 4, 2014, i teuga ma toniga mai le silia i le afe tupulaga talavou na lolofi atu e molimauina lo latou aso fa’apitoa, lea fo’i na tutu fa’atasi ta’ita’i o le atunu’u, ekalesia, matua ma aiga e sapaia ma lagolago lea fa’amoemoe taua.

O se aso na vaaia ai le naunau atu o tupulaga talavou faapea ai fanau e fai so latou sao mo le fa’amanatuina o le latou aso, e ala i toniga eseese, o pesega ae maise ai o fa’afiafiaga sa mafai ona fa’ataunu’uina i lalo o le fa’atautaiga a le Matagaluega o Tupulaga Talavou, Tina ma Tama’ita’i na fa’auluulu i ai le polokalame.

O le te’a o le itula e 7:00 i le taeao na amata mai ai le solo tele a autalavou, faalapotopotoga faapea ai au faafiafia sa lautogia mo le polokalame, lea na taitaia mai e le afioga i le Lutena Kovana ia Lemanu Peleti Mauga ma le faletua, lea fo’i na maua ai le avanoa e molimauina ai ta’avale teuteuina mai ni isi o autalavou sa lautogia, atoa ai ma savali mai ni isi o fa’alapotopotoga mai ni isi o atunu’u e pei o Filipaina, Fiti, Tonga, Tuvalu ma Initia.

E tolu tootoo faapitoa o le aso na tofu sao e ala i a latou saunoaga faalaeiau, e faataua ai le aso mo Tupulaga Talavou i lenei tausaga, i le mae’a ai o se sauniga lotu puupuu na saunoa e le susuga a Rev. Faatauva’a Talamoni, o le faifeau mai le Ekalesia EFKAS i Pago Pago.

Na fa’afetaia e Lemanu i latou uma sa mafai ona tofu sao mo le fa’atauaina o le aso mo Tupulaga Talavou.

“O le saunoaga a le alii kovana ia Lolo Matalasi Moliga, po o fea lava e te malaga mai ai, po o oe o se Saina, Filiapina, Fiti po o fea lava le atunuu, o tatou uma lava o Samoa, aua o lea ua tatou nonofo i le atunu’u e tasi o Amerika Samoa, ma tatou tautua fa’atasi ai”, o le saunoaga lea a Lemanu na tau fai pati pati ai le mamalu o le auvalaaulia.

Sa ia taua fo’i e fa’apea, ina ua pale mai le tofa i le tootoo ia Lolo i le taitaiina o le faigamalo, sa moomoo lona finagalo mo se aso faapitoa mo tupulaga talavou, ina ia mafai ai ona faamanatu e le malo le taua o le sao o tupulaga talavou i le atunuu.

“O le tatou faamanatuina ai o lo outou aso faapitoa i lenei aso, ua faailoa mai ai le manatu o le malo ma ona taitai, e taua outou tupulaga, aua o outou o le lumana’i o aiga ma le atunu’u i le lumana’i”, o le isi lea saunoaga a Lemanu.

Sa ia taua fo’i e fa’apea, afai e i ai se matua e le o mamafa i lona manatu le lumana’i mo tupulaga talavou, e tatau i lea matua ona toe to manatu i le taua o tupulaga talavou.

I le saunoaga a le Fa’atonusili o le Matagaluega o Tupulaga Talavou, Tina ma Tama’ita’i ia Jonathan Fanene, sa ia toe faamanatu ai i tupulaga talavou le taua o siitaga mai le tusi a le poto o Solomona i le Tusi Paia, e fa’atatau i le taua lea o le olaga talavou o le tagata, e ala i le fa’aaoga tatau o lona taimi.

Saunoa Fanene e fa’apea, afai e faaaoga tatau e le talavou lona taimi, a o o ina matua e avea o ia ma taitai iloga o le atunuu, aiga ma le ekalesia.

“Tupulaga talavou a Amerika Samoa, ia faataua lou talavou manu o maua le avanoa”, o le saunoaga lea a Fanene.

I le fai ai o le susuga a Dan Aga ma sui o le polokalame a le Kolisi Tuufaatasi o le ‘4-H’ e saunoa ai i le aso faapitoa mo tupulaga, sa ia faafetaia ai le susuga Fanene ona o le avanoa ua mafai ai ona tuu faatasi le polokalame a le 4-H i le faamanatuina o le aso o tupulaga talavou i lenei tausaga.

Na faaiu le polokalame i taaloga ma faafiafiaga i le aso, ae o isi foi faafiafiaga ma ‘firework’ i le po e taualuga ai le aso o tupulaga i lenei tausaga.