Ua fa’aalia e ni isi o faiaoga o lo o fitaituga i le a’oa’oina o alo ma fanau a Amerika Samoa se fautuaga ua fa’ataoto atu e le afioga i le ali’i Kovana ia Lolo Matalasi Moliga, i le Fa’atonusili o le Matagaluega o Aoga ia Vaitinasa Dr. Salu Hunkin-Finau, ina ia amata loa ona fa’atulaga gaioiga e fuafua ai totogi talafeagai mo faiaoga.

Na taua e le tama’ita’i faiaoga ia Mrs Laloata ua 16 tausaga o galue fa’a faiaoga i aoga a le malo, o se fuafuaga manaia ua fa’ataoto e le alii kovana mo totogi o faiaoga, e lu’itau ai fo’i faiaoga ina ia faia le mea sili i le a’oa’oina o fanau a le atunu’u.

“Ua leva na tatau ona sii totogi o faiaoga, aua e le faigofie le galuega o lo o latou fa’atinoina i aso ta’itasi, i le a’oa’oina lea o fanau a le atunuu,” o le saunoaga lea a Mrs. Laloata.

E to’alua isi tama’ita’i faiaoga fa’atoa ta’i 9 tausaga talu ona galulue fa’a faiaoga sa laua fa’aalia lo la lagolagoina o lenei fuafuaga a le alii kovana, faatasi ai ma le la tatalo, “talosia ae vave oo mai se taimi e tupu ai lea siitaga o totogi.”

E ui e le i finagalo i laua nei e fa’ailoa o la suafa, peita’i sa la taua e fa’apea, a fa’atusatusa totogi o tagata faigaluega a le malo o lo o galulue i isi matagaluega o lo o umia fa’ailoga o le ‘BA ma le MA’, ma totogi o faiaoga o lo o latou umia fa’ailoga nei, e matua eseese mamao lava, e tetele atu totogi o tagata faigaluega nei nai lo faiaoga.

Ae i le silia ai ma le 30 tausaga o galue o se faiaoga i aoga a le malo ma aoga tua i totonu o le atunuu, na taua ai e le susuga ia Afolau Maugalei o Tafuna e fa’apea, o le taua o le fuafuaga a le kovana e siitia totogi o faiaoga ua umia faailoga maualuluga, e unaia ai faiaoga uma ina ia tofu ma le fa’ailoga BA pe sili atu fo’i, ina ia mautinoa ai e maualuga le tulaga a’oa’oina o faiaoga o lo o gafa ma le a’oa’oina o fanau a le atunuu.

O le aso 31 Mati, 2014 na tuuina atu ai e le afioga i le alii kovana sana tusi ia Vaitinasa, e fa’amanatu i ai fuafuaga mo le fa’atulagaina o totogi mo faiaoga, fuafua i le maualuga o le fa’ailoga ua ausia e le faiaoga.

Na taua e Lolo ia Vaitinasa i lana tusi e fa’apea, a’o le i malaga ese atu ma le atunuu, sa ia faatonuina le Fa’atonusili o le Matagaluega o Tagata Faigaluega a le malo ia Sonny Thompson, la te galulue fa’atasi mo le fa’atulagaina o totogi o faiaoga o lo o umia fa’ailoga, ina ia faatulaga faiaoga o lo o umia faailoga BA i le totogi e $23,000, ae o faiaoga o lo o umia faailoga MA i le totogi e $27,000.

Saunoa Lolo e fa’apea, o le Fonotaga a le Matagaluega o Aoga na fa’atoa mae’a atu nei (Educational Summit), sa faamautuina mai ai faanaunauga o faiaoga ina ia faia se siitaga i o latou totogi.

Na taua e Lolo ia Vaitinasa e fa’apea, “o le itu taua o le fuafuaga atoa o lo o taumafai atu i ai mo le iloiloina o totogi o faiaoga, ina ia momoli atu ai se feau malosi i faiaoga uma o le atunuu, e amanaia e le malo la latou galuega taua o lo o faia i aso ta’itasi, i le a’oa’oina o fanau atoa ai ma le siitia o auala e fa’atino ai la latou pito laau fa’a faiaoga.”

Na faamanino atili e Lolo ia Vaitinasa e faapea, o lana tusi lenei e faailoa atu ai le tatau lea ona la galulue faatasi ma le Matagaluega o Tagata Faigaluega, mo le fa’atulagaina o fesuiaiga mo faiaoga e le o mulimulita’i i ta’iala o fa’amanuiaga tau tupe e tatau ona maua.

O fesuiaiga e pei ona faamalosia e le alii kovana i lana tusi e aofia ai le iloiloina o tausaga sa galue fa’a faiaoga ai le tagata, i latou e mafai ona faatumuina manaoga o le galuega, o i latou ua mae’a lelei suega e moomia mo le galuega, atoa ai ma le lelei o auala o lo o latou faatinoina ai le galuega.

O fesuiaiga o totogi e pei ona fautuaina e le alii kovana, e tatau ona mae’a a’o le i tuuina atu le paketi o le tausaga tupe 2015 i luma o le Fono, ina ia mafai ona fa’atulaga lelei ma saili vaega tupe e fa’atupe mai ai siitaga e pei ona fuafuaina.

Sa taua fo’i e Lolo ia Vaitinasa e faapea, o le ata faataoto mo totogi sa ia tuuina atu mo le faamaoniaina, o lo o atagia mai ai le le o gatasi o gaioiga a tagata faigaluega ma fuafuaga e pei ona fuafuaina.

Na fautuaina fo’i e le alii kovana le tatau ona taofia le faiga o lo o maitauina o lo o tupu pea, o le fesuia’i o tagata mai isi tulaga e aga’i atu i isi tulaga i totonu o le matagaluega.