Se’i vagana ai se finagalo fa’aalia a le Peresetene o le Senate ia Gaoteote Palaie Tofau mo le siitia o totogi o sui faitulafono, e leai se senatoa po o se faipule na faia se fesili e faasaga i le Paketi fuafua a le Fono Faitulafono o mo le Tausaga Tupe 2014.

Na taua e Gaoteote e faapea, o le tofi senatoa ma le faipule, e le o se tofi e alu ma se isi i lona aiga, ae o le tofi e aga’i mai i ai tupulaga o le atunuu, lona uiga fo’i, e tatau ona fai ia lelei ina ia o o mai isi o lo o mulimuli mai o lo o lelei tulaga uma e faatino ai a latou galuega.

E pei ona masani ai sui o le komiti soofaatasi a le Fono i le tele o taimi latou te fesiligia ai paketi a ofisa ma matagaluega a le malo, e mafua ona umi iloiloga a le komiti ona o le tele o fesili i mataupu e fia malamalama ai senatoa ma faipule, ae ina ua talanoaina le paketi a le Fono, e leai ma se tasi na fesili.

O le afioga i le alii senatoa ia Magalei Logovii na muamua maua le avanoa e saunoa ai i le taimi o le iloiloga, lea na ia faapupula ai i luma o le komiti e faapea, e leai se mafuaaga e tau talanoa ai fua le komiti soofaatasi i le paketi a le fono, aua e leai ma se suiga o le paketi o le tausaga tupe lenei ma le paketi o le tausaga tupe fou 2014.

“O le paketi o le tausaga tupe lenei e $6.7 miliona, ae o le paketi o le tausaga tupe fou e $6.7 miliona fo’i, pau lava le talosaga i lua afioga i ta’ita’i fono o le komiti soofaatasi, a mafai ona faaopoopo ni nai vaega i alauni a le fono ua manaia tele,” o le saunoaga lea a Magalei ma ia faatuina ai le mau ina ia faamuta le iloiloina o le paketi a le fono, lea fo’i na faalua e sui o le komiti soofaatasi.

Na saunoa le sui peresetene ia Nuanuaolefeagaiga S. Nua ma ia faalua le finagalo o Magalei e faatatau i le paketi a le fono, ma ia toe lagolagoina ai le talosaga ina ia faaopoopo se tupe i alauni a le fono, ona e le gata ua taugata le tau o le soifuaga i le taimi nei ae ua tauau fo’i ina le lava totogi o senatoa ma faipule.

I le saunoaga umi a le peresetene o le senate ia Gaoteote, sa ia faamaninoina ai le tulaga o le paketi a le fono mo le tausaga tupe fou, o lo o fuafua e totogi ai na o tagata faigaluega a le fono, e aunoa ma se vaega tupe e faatino ai galuega a le fono.

Mo se faataitaiga o le saunoaga a Gaoteote, e le gata e leai se tupe o faatulaga mo mea e faatino ai galuega a le fono ‘supply’, ae leai fo’i se vaega tupe o fa’atulaga mo malaga ma le pili o le uila.

Na taua e Gaoteote i lana saunoaga e faapea, o tausaga uma lava e manaomia ai e le fono se $250,000 e totogi ai lana pili uila, ae i ai lava fo’i isi matafaioi a le fono e moomia ai se tupe e faatino ai, peitai e le taitai lava tupe o lo o avatu i lana paketi.

“O tausaga uma lava e talosaga ai e le fono le paketi e $7.1 miliona ona o le manatu e kava ai manaoga uma ma tiute faatino a le fono, ae tatou te le o talosagaina se $6.2 miliona po o se $6.7 miliona fo’i e pei ona tuuina mai e le malo,” o le saunoaga lea a Gaoteote.

Saunoa fo’i Gaoteote e faapea, o se tasi o itu ua ia maitauina, e pei e mumusu sui o le fono e fai ni suiga lelei pe a talanoaina i le paketi a le fono, ae o le latou fatuaiga tausi lea e tatau ona fai.

“I lo’u talitonuga ua o o i le taimi ua tatau ai ona sii totogi o senatoa ma faipule, aua o nofoa ia tatou te nonofo ai, e le o ni nofoa tatou te o ma ave i o tatou aiga, ae o nofoa o lo o faasolo mai ai a tatou fanau i le lumana’i,” o le isi lea saunoaga a Gaoteote.

Na faamanino e Gaoteote i luma o le komiti soofaatasi e faapea, e tatau ona latou malamalama i le va feagai o le fono ma le faigamalo, aua o le fono o le isi lea vaega maoti o le malo, ma ua o o i le taimi ua tatau ai ona fai lava e le fono lana ia paketi.

Na taumafai le alii faipule ia Fetui Fetu Jr mo se avanoa e fai ai lana fesili, ae na taofi mai e le taitaifono o le komiti soofaatasi ia Laolagi Fonoti Savali Vaeao, ona o lea ua taoto le saunoaga a le alii peresetene.

Saunoa Fetu e faapea, a tau lona mafaufau i le Ali’i, ona oso lea o se manatu ia te ia, pe fesili e saili le faamaoni po o le nofo ai lava faapea ma le tagi.

E lei i ai se isi na toe saunoa e faatatau i le paketi a le fono, ina ua tuuina mai e Laolagi le finagalo faaiu, e taoto atu fautuaga ma o le a talanoa i ai le komiti ma le Teutupe a le fono, ona faia ai loa lea o suiga faaiu a le fono mo le paketi a le malo i le taeao nei.