Pago Pago - AMERIKA SAMOA

O le afiafi o le aso 10 o Fepuari, 2024, e tusa ai ma faamaumauga a le Ofisa a Leoleo, na ave ai e leoleo ia le susuga ia Sone Wilson, ona o moliaga i lona faatupu vevesi i lo latou aiga i Puapua, ma lona fa’afefeina o lona tama fai (stepfather).

Sa faamaonia i suesuega a leoleo le taumafai o Wilson e ulufale faamalosi  i totonu o le latou fale, ae loka mai e lona ‘stepfather’ le faitoto’a.  Ma o lo o ta’ua foi i suesuega a leoleo, le faafefeina e Wilson o lona ‘stepfather’, ma ia tosoina i lalo ni uaea eletise mai i se pou uila a le ASTCA, lea o lo o i luma o le fale.

Ina ua taunuu leoleo i le nofoaga na tupu ai le faalavelave, sa o latou vaaia le ua molia, o savali atu agai i le fale.   Na taofia o ia e leoleo ma lokaina o ia ma ave atu loa i le ofisa a leoleo.

Sa faapea foi ona suesueina e leoleo ia le ‘stepfather’ a Wilson ma sa ia faamatalaina i leoleo, ua fiu e tuli ese ia Wilson mai i lo latou fale.  Ae o le po lena, na toe alu atu ai Wilson ma amata ona tu’i le latou faitoto’a ma fai atu e tatala le faitoto’a.  Ma na ta’ua e le ‘stepfather’, a’o tu i tafatafa o le faitoto’a sa ia faalogoina le lauina o ia e Wilson ma faafefe o ia, i le oti.  Ma na ta’ua foi e le ‘stepfather’ le tatosoina i lalo e Wilson, o uaea moli mai i le pou moli la e i luma o le latou fale.

Ina ua fa’atalanoaina e leoleo ia le faletua a le ‘stepfather’ sa ia faamatalaina le lu’iina e le ua molia, ia lona toalua, i se fusuaga.  Ma na ta’ua foi e lea tina le leva ona o latou tuli’esea o Wilson mai i lo latou fale, ae na faate’ia i latou ina ua toe fo’i atu i lea po ma faapisa lo latou aiga.

Ae sa faamatala e Wilson, lona toe fo’i atu i lona aiga, e aumai ona lavalava, ae na tuli o ia e lona ‘stepfather’.  Ma sa ia fai atu i lona ‘stepfather’ e tu’u le taumafai e pulea mea uma o lona aiga, ona ua na’o ia o se faiava.  Sa ta’ua foi e Wilson, na fia alu atu e vaai lona tina matua, ae na taofi foi o ia e lona ‘stepfather’..

Ua molia nei Wilson i moliaga e lua;

Faitauga 1:  Faatupu Vevesi i totonu o le aiga – o se vasega ‘C’ o solitulafono mama, e mafai ona faafalepuipui ai se tasi i le o’o atu i aso e sefulu lima (15), po o se sala tupe e $300; po o fa’asalaga uma e lua.

Faitauga e 2:  Faaleagaina o mea totino i lona tikeri e 2 – o se vasega ‘A’ o solitulafono mama, lea e mafai ona faafalepuipui ai se tasi, i le o’o atu i le tausaga e tasi (1), po o se sala tupe e $1,000; po o faasalaga uma e lua.

E $1,000 le tinoitupe ua faatulagaina e mafai ona tatalaina ai le ua molia, mai i le falepuipui, e faatali ai lona faasalaga.