Ads by Google Ads by Google

Tumau pea le leai o se finagalo fa’aalia o le Komesina o Leoleo

ausage@samoanews.com

E ui o lo o tumau pea le leai o se finagalo fa’aaliga o le afioga i le ali’i Komesina o Leoleo i mataupu e pei ona tu’uaia ai ni ali’i Leoleo Sinia i le faia o amioga mataga fa’afeusuaiga fa’asaga i ni tama’ita’i Leoleo se to’alua, peita’i o le tulaga manino e pei ona maua e le Samoa News, o lo o fa’agasolo pea lava i luma iloiloga o nei mataupu.

 

E tusa ai o fa’amatalaga maumaututu ua maua e le Samoa News, ua taua ai le tuu atu e le Loia Sili o le suesueina o lenei mataupu i loia o lo o latou taulimaina mataupu tau solitulafono.

 

E talitonu le Samoa News e tusa ai o ripoti ua tauaaoina, o ni nai vaiaso ua tuana’i atu na amata aloaia ai suesuega a le vaega o Leoleo suesue a le malo i le sailiina o mau fa’amaonia e uiga i nei mataupu, ma e i ai le talitonuga e le o toe umi se taimi ae faila loa moliaga fa’asaga i ali’i Leoleo Sinia e to’alua o lo o tu’uaia i lenei mataupu.

 

E ui i le tele o fesili ua mae’a ona tuuina atu i le tofa Le’i Sonny Thompson e uiga i lenei mataupu, ae o le tulaga mautinoa e pei ona molimauina e le Samoa News, o lo o fa’aauau pea ona le finagalo o ia e tuuina mai sana saunoaga e tusa ai o nei mau fesili.

 

Ui o lea, e tele naua fa’amatalaga eseese ua mafai ona maua mai e le Samoa News mai ni isi o Leoleo i totonu o le Matagaluega o le Puipuiga o le Saogalemu Lautele, e fesoasoani ai i le tau tu’u fa’atasia o lenei ripoti mo le fa’afofoga a le atunu’u.

 

Na taumafai le Samoa News e fesiligia le tama’ita’i Leoleo o lo o tu’uaia na a’afia i le mataupu mulimuli lea na fa’atoa alia’e mai i ni nai vaiaso talu ai, e ui o lea mataupu na tula’i mai i le masina o Iuni o le tausaga na te’a nei, peita’i e le i finagalo o ia e fa’aalia sona finagalo e uiga i lenei mataupu.

 

Ae tusa ai o fa’amatalaga mai molimau e uiga i lenei mataupu, o le mataupu lenei na ulua’i ripotia i se tasi o Tama’ita’i Leoleo Sinia i totonu o le Matagaluega o Leoleo, peita’i nai lo le taumafai e fa’amalosia le tulafono ina ia sailia ai le mea moni, na taua le fa’atonu e le tama’ita’i leoleo sinia o le tama’ita’i leoleo na a’afia, e alu e ave i tua lana tagi ua fa’aulu fa’asaga i le Leoleo Sinia.

 

Na folafola foi e le tama’ita’i leoleo sinia ina ia ave i tua le tagi, ae o le a taoto atu le mataupu e suesue i le lotoifale lava o le Ofisa o Leoleo ma lana folafolaga, a mae’a suesuega i le lotoifale ae fa’amaonia, o le a fa’amalolo le Leoleo Sinia mai lana galuega.

 

I le tuana’i ai o nai masina e leai lava se gaioiga ua faia i lenei mataupu, na toe aga’i atu ai loa le tama’ita’i leoleo na a’afia ma toe talosaga i se leoleo suesue mai le Vaega o Leoleo Suesue ina ia toe fa’aauau lana tagi e pei ona tuuina atu muamua.

 

E pei ona taua e molimau i le Samoa News e faapea, ina ua fa’afofoga le Komesina ua toe fa’aulu e le tama’ita’i leoleo lana tagi fa’asaga i le Leoleo Sinia, sa ia taloina ai loa se fonotaga ma le tama’ita’i leoleo. Sa auai fo’i se tasi o ana sui komesina leoleo i lea fonotaga.

 

O le fonotaga lona lua lea ua valaauina e le Komesina talu ona tula’i mai lenei mataupu. O le fonotaga muamua na valaauina i le aso na tula’i mai ai le mataupu ia Iuni o le tausaga na te’a nei.

 

I le fonotaga lona lua lea ua valaauina e pei ona taua e se molimau, na fa’aalia ai e Le’i lona le fiafia i le tama’ita’i leoleo na a’afia, i lona naunau pea e fa’aauau lana tagi fa’asaga i le leoleo sinia.

 

Na taua e le Komesina ma lana sui komesina i le tama’ita’i leoleo i le fonotaga lea, e le mafai ona molia le leoleo sinia e tusa ai o lenei mataupu, ona e atagia mai ai le le amanaiaina o ona ‘aia tatau i lalo o le tulafono.

 

Na taua fo’i e le molimau le fautuina e le Komesina o le tama’ita’i leoleo, ina ia toe ave i tua lana tagi ua fa’aulu.

 

Ua mae’a nei ona fesootai atu le tama’ita’i leoleo na a’afia i ni isi o loia tua mo le tauaveina o le isi vaega o lana mataupu.