E le i atoa se 2 vaiaso talu ona tuana’i atu le ulua’i mataupu e pei ona tu’uaia ai se ali’i Leoleo Sinia mai le Matagaluega o Leoleo a le malo, i lona faia o uiga mataga i se tama’ita’i Leoleo, ae o lea fo’i ua alia’e mai le isi mataupu fa’asaga i se isi fo’i ali’i Leoleo Sinia, i lona faia lea o uiga mataga i se tama’ita’i leoleo sa i lalo o lana vaavaaiga.

O lenei mataupu na alia’e mai i le masina o Iuni o le tausaga na te’a nei i le Ofisa o Leoleo i Fagaitua, ae o lea fa’atoa taunu’u mai le ripoti i le Samoa News i le vaiaso nei.

E le i maua mai se finagalo o le afioga i le ali’i Komesina ia Le’i Sonny Thompson e uiga i lenei mataupu, ina ua taumafai le Samoa News e fa’afesoota’i o ia mo sona finagalo.

Ae tusa ai o le ripoti o le tagi sa faila i le Ofisa o Leoleo ua maua e le Samoa News, o lo o taua ai e fa’apea, o le fa’alavelave lenei na tula’i mai i le masina o Iuni o le tausaga na te’a nei, a o malaga le tama’ita’i leoleo na a’afia, o lana Ta’ita’i Leoleo o lo o tu’uaia, atoa ai ma le isi ali’i Leoleo i totonu o se ta’avale leoleo.

A o alu le ta’avale, sa faia talanoaga masani i le va o leoleo e tusa ai o le pisi o galuega o le aso.

I le ogatotonu o nei talanoaga, na fa’afuase’i ai loa ona fai atu se tala a le Taitai Leoleo e fa’atatau i se la mafutaga fa’alilolilo ma le tama’ita’i Leoleo. Na avea lea tala ma itu na le fiafia ai le tama’ita’i leoleo ma ia fai atu ai loa i lona Ta’ita’i, e le tatau ona ia faia se tala fa’apea.

Na aapa atu le Ta’ita’i Leoleo ma tago atu i le tau’au a le tama’ita’i leoleo na a’afia, ma fa’asolo ifo ai lava lona lima i lona susu agavale (tulou).

Na taua i le ripoti le le fiafia o le tama’ita’i leoleo i amioga sa fai atu e lona ta’ita’i ia te ia. Ina ua taunu’u le ta’avale i le Ofisa o Leoleo i Fagaitua, sa toe lafo atu fo’i e le Ta’ita’i leoleo ni isi tala mataga i le tama’ita’i leoleo na a’afia, e aofia ai tulaga o feusuaiga i lo la va.

Na taua e le tama’ita’i leoleo i lana tagi lona ita tele ma ia tali atu ai fo’i i tala le manuia a lana ta’ita’i leoleo.

I se taimi o le aso lava lea, na alu atu ai le Ta’ita’i Leoleo i totonu o le ofisa ma vaaia ai le tama’ita’i leoleo o lo o saofa’i i luga o le nofoa o lo o fa’atino ana galuega. Sa ia taumafai e kisi atu ia te ia peita’i sa taumafai le tama’ita’i leoleo e tete’e o ia, ae sa taumafai pea le Ta’ita’i Leoleo e pa’i atu i le auvae o le tama’ita’i leoleo ma taumafai e fa’a fa’asaga atu o ia i ona foliga, ma i’u i lona kisi atu ai lona alafau.

Ina ua fesiligia e le Samoa News le Ta’ita’i Leoleo o lo o tu’uaia e uiga i lenei mataupu, na matua fa’aalia e lenei ali’i le fa’ateia o ia ina ua toe alia’e mai lenei mataupu, ae ua mae’a ona teuteu i le va o ia ma le Komesina o Leoleo, atoa ai ma le tama’ita’i leoleo na a’afia.

Na taua e le Ta’ita’i Leoleo i le Samoa News e fa’apea, ua uma ona ia faatoese i le tama’ita’i leoleo na a’afia, o ona matua, atoa ai fo’i ma le Komesina e tusa ai o le mataupu na tula’i mai, ma ua latou taliaina fo’i lana fa’toesega.

Ina ua fesiligia o ia pe moni sa ia tagofia itutinosa o le tama’ita’i leoleo, na tali le Ta’ita’i Leoleo, sa ia pa’i atu i le tauau ae le o mea sa mafaufauina. Sa ia taua atili fo’i e fa’apea, sa ia taalo lava i le tama’ita’i leoleo e pei lava o tulaga masani i galuega.

Sa ia ta’utino e fa’apea, ua lagona lona popole ina ne’i alia’e lenei mataupu ona ta’uvalea ai lea o lona to’alua ma lana fanau.

Na taua e ni isi o Leoleo sinia i le Samoa News e fa’apea, ua tatau i le Koemesina ona faia sana fa’aiuga atamai e tusa ai o mataupu ua alia’e mai i le matagaluega i lalo o lana ta’ita’iga.