Ads by Google Ads by Google

Tele lesona aoga ua a’oa’oina mai Ofisa Vaai tau i le ‘afa o Gita

ausage@samoanews.com

E ui i le tele o fa’asea mai ni isi o le atunu’u fa’asaga i le auaunaga a le Ofisa Vaai Tau i le taimi na alia’e mai ai le matagi malosi o Gita lea na afatia ai le atunu’u i le amataga o le masina lenei o Fepuari, peita’i na taua e le Tama’ita’i o Elinor Lutu-McMoore o loo faauluulu i ai le Ofisa Vaai Tau i Tafuna e fa’apea, e tele naua lesona taua na mafai ona aoaoina mai e lana aufaigaluega i le taimi o le matagi o Gita, ma ua avea ia lesona aoga e fesoasoani ai i le faaleleia atili o le latou auaunaga i le atunu’u.

 

O se tasi o lesona taua na taua e Lutu-McMoore na mafai ona latou aoaoina mai i lenei fa’alavelave, o auala e fesoasoani ai i le faaleleia atili o le latou tautua e ala i le latou afi faaleoleo.

 

Na taua e le Tama’ita’i Pule e fa’apea, o se tasi o itu na matua to’atele ai le mamalu o le atunuu na faasea, o le taimi na motusia ai le eletise a le ASPA, sosoo ai ma le motusia o fesootaiga i laina telefoni, ma le mafai ai ona maua ni ripoti e faatatau i tala o le tau mai le latou Ofisa.

 

“Ou te iloa lelei finagalo o le atunuu e tusa ai o le faaletonu sa tula’i mai, e le gata na motusia le eletise a le ASPA, ae na motusia fo’i le eletise sa maua mai i le afi faaleoleo a le Ofisa Vaai Tau ina ua tula’i mai ni tulaga faaletonu i totoga o le afi. E ui o lea, ua avea ia faaletonu o ni itu lelei matou te aoaoina ai ni lesona taua mo le lumana’i”, o le saunoaga lea a Lutu-McMoore i se faatalatalanoaga ma le Samoa News i le vaiaso na te’a nei.

 

Saunoa le Tamaitai Pule e fa’apea, e aoga faasea ma fautuaga mai le atunuu e fesoasoani ai i le fa’aleleia o le latou tautua.

 

“Matou te taliaina uma faasea ma fautuaga mai le atunuu e tusa ai o faaletonu na tutupu i le matou auaunaga i le taimi o le matagi malosi o Gita, e fesoasoani ai mo le fa’aleleia atili o la matou auaunaga i le lumana’i”.

 

“O faaletonu na tutupu i le taimi o Gita, o ni faaletonu e tatau ona matou toe vaavaai toto’a i ai. Ina ua motusia le eletise ma laina o fesootaiga i lo tatou atunuu, na faasalalau mai ai loa i le Ofisa Vaai Tau i Honolulu ripoti e fa’atatau i le matagi, lea fo’i na mafai ai ona fesoasoani i si o tatou atunu’u atoa”.

 

Na faafetaia e Lutu-McMoore le fesoasoani a le tele o Ofisa a le malo, lea na mafai ai ona toe vave lelei a latou fesootaiga, ma toe faaauau ai le tuuina atu o tala o le tau i le atunu’u.

 

O le vaiaso na te’a nei na foa’i ai e le Matagaluega o le Puipuiga o le Saogalemu Lotoifale le afi faaleoleo mo le Ofisa Vaai Tau, e fesoasoani i le latou auaunaga pe afai e toe tula’i mai isi matagi ma motusia ai le eletise i le atunu’u.