Na tau le mautali sui o le Komiti Faapitoa o le Tamaoaiga a le Kovana (Revenue Task Force) i le taimi na tu’i fesili ai e ni isi o afioga i Faipule, i le mafua’aga o le lafoga lea ua fuafua le malo e fa’aee lafoga o oloa, e aofia ai ma suiga ua faia i pasene o lafoga e totogi mo ni isi o oloa mai fafo e aofia ai le ‘ava malosi.

O le iloiloga a le Komiti o le Sailiga o le Tamaoaiga a le maota o sui ananafi, i lalo o le ta’ita’iga a le Ta’ita’i Komiti ia Fatulegae’e P. Mauga, sa fesiligia ai le pili e aiaia ai se lafoga fou mo meainu suamalie e le ‘aava, o lo o fa’aulufale mai i totonu o le atunu’u, ma fa’asolosolo atu ai ona soloia le lafoga oloa e 5%.

O isi mataupu sa tele i ai fesili a faipule o le mafuaaga ua sui ai le lafoga mo le ‘ava malosi, e pei ona aveese ai le 190% ae sui i le 0.35sene e totogi mo le pusa o oloa (container) o loo aumai ai ia ituaiga oloa mai fafo.

Na fa’amanino e le Teutupe a le malo ia Ueligitone Tonumaipe’a, o le isi lea molimau a le malo i le taimi o le iloiloga e fa’apea, e fa’atolu ona fono le latou Komiti ma le Asosi a le Aufai Pisinisi a le atunu’u e uiga i lafoga fou ua fuafua le malo e fa’ae’e, lea sa lagolagoina e se vaega o le aufai pisinisi, ae fa’atuiese ai se vaega to’atele o le aufai pisinisi, i le fuafuaga e aveese le lafoga o oloa e 5% ae faaee le lafoga o oloa e 7% (sales tax).

Sa ia taua fo’i le lava o le taimi na faia ai sailiiliga a le Komiti i tulaga uma lava e uiga i lafoga nei, a o le i tuuina mai a latou pili tupe i luma o le Fono Faitulafono.

Na faamanino e le sui o le Komiti a le malo ia Keith Gebauer e fa’apea, o le suiga ua faia i le lafoga o le ‘ava malosi, sa fuafua i le auala e tasi uma ai le lafoga e totogi e le aufai oloa uma lava o lo o aumaia le ‘ava malosi i le atunu’u.

Na fesiligia e faipule ia sui o le Komiti a le malo, pe fia se tupe fa’asili o le a mafai e le malo ona maua mai i suiga o le lafoga e pei ona fuafuaina, ae na saunoa Gebauer, e leai se tupe fa’asili a le malo e maua mai ai, pau le agaga ia tasi le auala e totogi uma ai e le aufai oloa o loo aumaia le ‘ava malosi le lafoga i le atunu’u.

Sa fautuaina e Faipule molimau a le malo, e le tatau ona latou faia ni fa’aiuga ona o se taumafaiga ia aafia ai se pisinisi se tasi poo se vaega fo’i o tagata faipisinisi, poo le taumafai fo’i e faia ina ia fesoasoani ai i se isi tagata faipisinisi, a ia faia faaiuga uma i auala e manuia ai pisinisi ma le atunu’u.

Saunoa le afioga i le ali’i faipule ia Veevalu M. Mageo e fa’apea, sa tatau ona ova atu i le fa’a 10 ona fono le Komiti ma le aufai pisinisi a le atunu’u, ina ia mafai ai ona aumai manatu o le aufai pisinisi e fa’atatau i itu lelei ma aafiaga o nei mau lafoga.

“E i ai lo’u talitonuga e le i lava le taimi na tapena ai le malo aemaise la outou Komiti i le fuafuaina o lafoga nei,” o le saunoaga lea a Veevalu. “E le mafai ona tatou taunu’u i se taunuuga lelei pe afai fa’atopetope a tatou fa’aiuga e uiga i tulafono tupe nei.”

“Sa tatou ona outou silasila toto’a poo a a’afiaga o le atunu’u i le isi 5, 10, pe 15 fo’i tausaga o lo o lumana’i, pe afai ae tu’u atu lafoga o oloa nei i tagata lautele.”

Saunoa atili Veevalu e fa’apea, e sili atu ona pagatia tagata fa’atau i suiga o le tulafono lea ua fuafua le malo e fa’aee, ae o itu uma nei sa tatau i le malo ona vaavaai i ai.

Na taua e le afioga i le ali’i faipule ia Samuel Meleisea e fa’apea, o se tasi o atugaluga ua maua mai i le atunu’u, e faigata atu ona ao e le malo tupe e maua mai i le lafoga o oloa e 7%, nai lo le lafoga o oloa e 5%.

Saunoa le afioga i le ali’i faipule ia Fagaoatua D. Salave’a e fa’apea, e le faigofie i le atunu’u ona talia lafoga nei, ma o se tulaga fo’i e ono aafia ai atina’e tau pisinisi.

Na faamanino e le Teutupe e fa’apea, o se tasi o mafua’aga ua ala ai ona a’e se manatu e sui le lafoga o le pia, sa i ai se alii faipisinisi i le atunu’u o lo o ia fa’aulufaleina maia le pia i le atunu’u, sa masalomia lona faia o ni lisiti pepelo e fa’ailoa mai ai le atunu’u o lo o aumai ai lana sapalai o le pia, ae iloa mulimuli ane e ese le atunu’u sa aumai sa’o ai le uta atoa o le pia.

Na vave ona fesiligia e Faipule le Teutupe i lana molimau lea, pe i ai ni fa’amaoniga o nei tu’uaiga, peita’i na saunoa Tonumaipe’a, e leai ni fa’amaoniga, ae o ni isi ia o tulaga sa mafai ona masalomia i le taimi o a latou suesuega.

Ae na toe faamanino atili e Gebauer e fa’apea, o suesuega sa faia i oloa uma o lo o ulufale mai i le atunu’u, na iloa ai, e na o le pia lava lea e ese le auala lea o lo o fa’a lafoga ai uta o oloa mai fafo, ma mafua ai loa ona a’e se manatu e sili pe a sui le tulafono, ae totogi uma e le aufai pisinisi o loo aumaia le pia le lafoga 0.35 i le mamafa e 12 aunese, nai lo le eseese uma o ituaiga lafoga sa totogi i ituaiga pia eseese.

Saunoa le sui fofoga fetalai o le maota ia Fetui Fetu Jr e fa’apea, e le faigofie ona talia e le atunu’u lenei mataupu, ona o le to’atele o aiga ma tagata faigaluega e lima vaivai, latou te le gafatia fo’i suiga ua fuafua le malo e fa’a taoto.

“O loo manino mafua’aga o taumafaiga a le malo i lafoga nei, ina ia saili ni alaga tupe malolosi e fesoasoani ai i lona atina’e, ae tatau fo’i ona tatou vaavaai i auala e maua ai e le atunu’u le fiafia ma le saolotoga, nai lo le ola pologa ma avea ma avega mamafa nei mau lafoga,” o le saunoaga lea a Fetui Jr.