E tele naua fautuaga na fa’aleo e afioga i Senatoa mo le fa’amoemoe e fa’aleleia atili ai le auaunaga a le Matagaluega o Aoga a le malo, i le taimi na iloilo ai e le Komiti o Aoga a le maota maualuga tofiga a le afioga i le ali’i kovana mo Dr. Ruth Matagi-Tofiga, e avea ai o ia ma Fa’atonusili o le Matagaluega o Aoga mo le isi 4 tausaga o loo lunana’i nei.

O le iloiloga sa fa’afoeina lea e le afioga i le ali’i senatoa ia Fai’ivae A. Godinet, lea fo’i sa maua uma ai e afioga i senatoa le avanoa latou te fesiligia ai le molimau i ona agava’a, aemaise ai ana fuafuaga ua fa’ataoto mo le manuia o le Matagaluega.

Ina ua fesiligia e le afioga i le ali’i senatoa ia Paepae Fai’ai le molimau i lana asiasiga lea sa fa’agasolo i aoga uma i le atunu’u, na taua ai e le tama’ita’i faiaoga tulaga manuia sa ia maitauina i lana asiasiga, e le gata i tulaga lelei i Fale’ai a aoga uma lava e amata mai i Sisifo e oo atu i Sasa’e, ae o le tulaga galulue fa’atasi fo’i o Puleaoga ma Faiaoga i le fa’atinoina o le galuega.

“Pau nai fa’afitauli laiti sa ou maitauina i la’u ulua’i asiasiga, o le tulaga to’atele o fanau aoga i totonu o potu aoga i ni isi o aoga i le itumalo o Tualauta, ae o loo matou taumafai pea ina ia fa’atino se auala e foia ai nei fa’afitauli”, o le saunoaga lea a le tama’ita’i Fa’atonusili o Aoga.

O ni isi o tulaga sa fautuaina e le afioga a Paepae, o se tulaga matagofie le toe fa’aauau o polokalame sa fa’atino e aoga i tausaga ua mavae, o le sisi o le fu’a i le taeao aemaise ai le amata o aso aoga i se tatalo.

Na fa’afetaia e le afioga Magalei Logovi’i tofiga a le kovana, lea ua mafai ai ona toe filifilia Dr. Matagi-Tofiga e galue i le Matagaluega o Aoga, e pei ona ia tautua ai i tausaga ua mavae.

Na fesili Magalei i le tama’ita’i fa’atonu pe na te lagolagoina le polokalame lea ua fa’aaoga ai le gagana Samoa e fesoasoani i le a’oa’oina o fanau aoga, ae na tali le tama’ita’i Fa’atonusili e fa’apea, talu ai o lea fa’atoa 2 tausaga talu ona amata mai lenei polokalame, e tatau ona toe vaavaai poo aoga mo fanau aoga, aua afai o loo iai se aoga e tatau la ona fa’aauau, ae afai e le o i ai se suiga, ona toe vaavaai lea i ai.

Ae na saunoa le afioga Magalei e fa’apea, e tumau pea lona le lagolagoina o le polokalame lea ua fa’aaoga ai le gagana Samoa e lua i ai gagana e a’oa’o ai fanau aoga, ona e i ai lona talitonuga, e le fa’aaogaina le gagana Samoa e su’e ai suega a fanau aoga pe afai e ulufale atu i aoga i fafo.

“O la’u fautuaga, e le mafai ona alu i luma tulaga o aoaoga a fanau aoga pe afai tatou te fa’aauau pea ona fa’aaoga le gagana Samoa, ou te le talitonu fo’i i le fa’aupuga lea e fai mai e vave atu ona vave le tautala fa’aperetania o fanau aoga pe afai e malamalama i le gagana Samoa, sa ou ola mai fo’i a’u ia i aiga e tautala fa’a Samoa i le olaga atoa, ae na fa’amuamua lava le gagana fa’aperetania i tulaga o aoaoga”, o le fautuaga lea a Magalei.

Na fautuaina e le afioga i le ali’i senatoa ia Faamausili Mau Jr le tatau lea ona fa’aauau pea le polokalame o le “Drug Free” lea sa masani ona fa’asolo i totonu o aoga a le atunu’u, ina ia mafai ai ona fa’aitiitia fa’afitauli o le tagofia e fanau aoga ma ni isi o faiaoga o fualaau fa’asaina.

“O le taua tele o le toe fa’aauau pea o le polokalame lea, e mafai ai e tamaititi aoga ona ta’u sa’o i le Leoleo le igoa o le tagata o loo ia tagofia fualaau faasaina e pei o le mariuana, na te fa’ailoa le igoa o le faiaoga o loo ia ulaina le mariuana, na te fa’ailoa fo’i i Leoleo gaioiga a lona Tama o loo fai i le fale i le totoina lea o le laau mariuana, pe afai e fa’aali i ai e Leoleo foliga ma ata o le laau, o le aoga lena o le polokalame lenei i lo’u taofi”, o le saunoaga lea a Fa’amausili.

Na fautuaina e le afioga i le alii peresetene ia Gaoteote Palaie Tofau le tama’ita’i fa’atonusili ina ia silasila i totogi o faiaoga e le o tulaga lelei.

I lona talitonuga, o le isi lea mafua’aga e ala ai ona fa’aletonu le fa’atinoina o le galuega a le faiaoga, ona e le o lelei lona totogi.

O se tasi o mataupu sa fesiligia e ni isi o Senatoa, o le tulaga i faiaoga mai Samoa lea sa aumai e fa’a faigaluega i le ofisa o aoga i tausaga ua mavae. Saunoa le tama’ita’i fa’atonusili e fa’apea, o loo i ai lava ni isi o faiaoga o loo fa’asea i le aumai o faiaoga mai Samoa e galulue iinei, ao lea ua to’atele fanau aoga ua ausia agava’a ma le tomai sa mana’omia mo le a’oa’oina o fanau aoga.

I tulaga o totogi o faiaoga mai Samoa ma faiaoga a le atunu’u, o loo tutusa lava tulaga o totogi, se’i vagana ai lava penefiti e pei o le totogiia o fale e nonofo ai faiaoga mai Samoa o loo tula’i mai ai se eseesega, lea e mafua ai ona maualuga laititi totogi o faiaoga mai Samoa.