Ua teena e le afioga i le ali’i Fa’amasino ia Fiti Sunia le talosaga na tu’uina atu e loia o lo o fautuania Vincent Toeava ma Jane Vasa, mo se avanoa e fa’aitiitia ai tupe o lo o taofia ai i laua i le Falepuipui i Tafuna.

E $450,000 le tupe ua faatulaga e tatala ai i tua Toeava ae $10,000 mo Vasa. O le ali’i faipisinisi Asia ia Liren Zhang poo Kevin e pei ona iloa ai e le to’atele, e $450,000 fo’i le tupe ua fa’atulaga e tatala ai o ia i tua.

JANE VASA

Na teena e le Faamasingoa le talosaga na faaulu e le loia a Vasa ia Ryan Anderson, mo se avanoa e fa’aitiitia ai le tupe e tatala ai i tua le ua molia mai le $10,000 i le $2,000. Na taua e Anderson e faapea, e na o le tasi lava le moliaga o lo o tuuaia ai e le malo ia Vasa, ma o lea moliaga, e talafeagai ai le faatulaga o le $2,000 e tatala ai o ia i tua.

O lo o tuuaia e le malo ia Vasa i lona tuuina atu o le pusa o lo o i ai pepa ‘ai a le Food Stamp ia Toeava, ma mafua ai loa ona alia’e mai le mataupu e pei ona faaaoga faagaoi ai le silia i le $700,000 o tupe mai le polokalame a le Food Stamp. E $4,000 le tupe na ave e Toeava ia Vasa e tusa ai o lana gaioiga sa faia.

Na taua e Sunia e fa’apea, e talitonu le fa’amasinoga, o lo o talafeagai le tupe lea ua maea ona faatulaga e tatala ai Vasa i tua, pe a fuafua i le moliaga mamafa e tasi lea ua molia ai o ia e le malo, lea e mafai ona faasala ai o ia i le toese mo le umi e le silia i le 7 tausaga, pe faasala foi i le salatupe e le silia i le $5,000.

O lo o taofia pea Vasa i le toese i Tafuna e faatali ai le aso 2 o Fepuari lea ua faatulaga e toe valaau ai lana mataupu.

VINCENT TOEAVA

Na finau le loia a Toeava ia David Vargas i le fa’amasinoga mo se avanoa e faaitiitia ai le tupe e tatala ai i tua Toeava, mai le $450,000 o lo o i ai i le $50,000. Na taua e Vargas e fa’apea, e le o molia Toeava i se fasioti tagata poo se isi lava ituaiga moliaga e ono oo atu ai se faasalaga i le solo atoa i le falepuipui.

Sa ia faatepa e fa’apea, o tuuaiga uma ua mae’a ona faila e le malo fa’asaga ia Toeava, ua na o ni tu’uaiga lava, e le o fa’amaoniaina i le taimi nei. Sa ia taua fo’i le tatau lea i le fa’amasinoga ona silasila toto’a i le taua tele o le amanaia o aia tatau o le tagata molia, mo se avanoa e faia ai sana iloiloga faapitoa mo le faatulagaina o le tupe e tatala ai o ia i tua.

E 19 moliaga mamafa o lo o tuuaia ai e le malo ia Toeava, o ia moliaga e pei ona saunoa Sunia, e mafai ona faasala ai le ua molia i le toese mo le umi e oo atu i le 195 tausaga, poo le faasala i le salatupe e mafai ona oo atu i le $380,000. I le silasila a le fa’amasinoga, o lo o talafeagai le tupe lea ua faatulaga e tatala ai Toeava i tua, ma le siosiomaga o tuuaiga ua faila faasaga ia te ia.

Na finau malosi le loia a le malo ia Robert Morris ina ia teena le talosaga a Toeava, ona e fai lava si matuia o tuuaiga ua faia faasaga ia te ia. Na lagolagoina e le alii Faamasino le talosaga a le malo, ma ia faamanino ai e faapea, o le tupe lea ua faatulaga e tatala ai Toeava i tua mai le toese, e le o se faaiuga na faia e le malo, ae o le faaiuga na faia e le Fa’amasinoga.

I le faaiuga o le iloiloga, na teena ai e Sunia le talosaga ina ia faaitiitia le tupe e tatala ai Toeava i tua, ma ia poloaina ai le faatumau pea o le tupe i le aofaiga e $450,000 o lo o i ai nei. O lo o taofia pea Toeava i le toese i Tafuna e faatali ai le aso 7 Fepuari lea ua faatulaga e toe valaau ai lana mataupu.

LIREN ZHANG

Na talia e le Fa’amasinoga le talosaga na fa’aleo e le ali’i loia ia William R. Olson o lo o tula’i mo Kevin, mo se avanoa e tolopo ai le mataupu Kevin mo le isi 2 vaiaso, ina ia maua ai se taimi e fa’agasolo ai su’esu’ega i fa’amatalaga e uiga i lenei mataupu.

E le i finau William mo se avanoa e fa’aitiitia ai le tupe e tatala ai i tua Kevin, se’i vagana ai lona naunau e tu’u atu se isi taimi faaopoopo e fa’aauau ai lana suesuega e tusa ai o tu’uaiga fa’asaga ia Kevin.

E 17 moliaga mamafa o lo o tu’uaia ai e le malo ia Kevin, e mafua mai i le mataupu e pei ona tu’uaia ai o ia ma tagata faigaluega e to’alua a le DHSS, i le fa’aaoga fa’agaoi o pepa ‘ai mai le polokalame o le Food Stamp.

O lo o taofia pea Kevin i le toese i Tafuna e faatali ai le aso 9 Fepuari lea ua faatulaga e toe valaau ai lana mataupu i luma o le Fa’amasinoga Faaitumalo.