Ads by Google Ads by Google

Tala otooto mai le Fa’amasinoga

ausage@samoanews.com

LUATUA FILISOUAIGA TA’AFUA

 

O le aso 23 Iulai lea ua toe tolopo i ai le mataupu a le sa avea ma Pule o le Ofisa o le Litaea a le malo, susuga Luatua Filisouaiga Ta’afua, i le mae’a ai lea ona fa’afofoga o le fa’amasinoga maualuga i folasaga a loia mai itu e lua o lenei mataupu i le vaiaso na te’a nei.

 

O le ali’i loia ia Robert Morris o lo o tula’i mo le malo, ae o le tama’ita’i loia ia Gwen Tauiliili-Langkilde o lo o tula’i mo le ua molia.

 

Na taua e Tauiliili-Langkilde i lana folasaga i le vaiaso na te’a nei e fa’apea, i le masina o Novema o le tausaga na te’a nei, sa ia talosagaina ai le fa’amasinoga ina ia fa’atonu le malo e faamatu’u atu fa’amaumauga uma e uiga i le latou tagi fa’asaga ia Luatua, ina ia mafai ai ona amata tapena le la itu mo le fa’amasinoga autu o lenei mataupu.

 

E oo mai lava i le taimi nei e pei ona taua e Tauiliili-Langkilde, e le i tuuina atu lava e le malo fa’amatalaga auiliili e fa’atatau i le latou tagi fa’asaga ia Luatua. Taua e le tama’ita’i loia le taua tele o fa’amaumauga o loo ia talosagaina, e fesoasoani ai i tapenaga mo le puipuia o aia tatau a le o lo o ia tauaveina.

 

Ina ua fesiligia e le fa’amasinoga le itu a le malo, na taua ai e le ali’i loia ia Morris le mae’a lea ona ia talonoa i Leoleo o lo o gafa ma le suesueina o lenei mataupu, ma ua mae’a fo’i ona latou fa’ailoa atu ia te ia le mafua’aga o le tuai ona tuuina atu o fa’amaumauga o loo talosagaina e le itu tete’e.

 

Na taua e Morris e fa’apea, e oo lava foi’ ia te ia e lei tuuina atu ai e Leoleo fa’amatalaga e uiga i le tagi fa’asaga ia Luatua, o le mafua’aga fo’i lena e faigata ai ona ia tali atu i le talosaga a le itu tete’e.

 

O ni isi o mafua’aga na taua e Morris o lo o mafua ai ona tuai le tuuina mai o fa’amaumauga o loo fesiligia e le itu tete’e, ona e le o ma’ea suesuega a Leoleo e uiga i lenei mataupu, o lo o i ai fo’i ni isi o molimau o lo o manatu Leoleo e tatau ona fesiligia, ao lei fa’ai’uina a latou sailiiliga e uiga i lenei mataupu.

 

I le mae’a ai ona fa’afofoga o le fa’amasinoga i folasaga a itu a lua, na tuuina mai ai loa e le afioga i le ali’i fa’amasino ia Elvis Patea le fa’aiuga, ina ia toe tolopo le iloiloga o le mataupu a Luatua se’ia aulia le masina o Iulai, atonu e oo atu i ai ua mae’a suesuega a Leoleo e uiga i lenei mataupu, ma tauaao atu ai loa ma fa’amaumauga o loo manaomia e le itu tete’e.

 

TIMATA NAEA

 

O le masina o Aperila o le tausaga nei lea ua fa’atulaga e toe valaau ai le mataupu a le alii o Timata Naea i luma o le fa’amasinoga maualuga, i le mae’a ai lea ona ia teena o le moliaga e tasi ua tuuaia ai o ia e le malo i le vaiaso nei.

 

O le vaiaso nei lea na faila ai e le malo le moliaga mamafa e tasi o le sola ese mai le toese fa’asaga ia Naea, e mafua mai i le faalavelave lea na latou sosola ai ma isi pagota e to’a 3 i le masina o Ianuari na te’a nei, a o taofia ai i latou i le toese i Tafuna.

 

E ese mai i le moliaga fou e tasi lea ua molia ai e le malo Naea, o lo o tuuaia foi o ia i moliaga o le gaoi ma le talepe fale, e mafua mai i le fa’alavelave lea o loo tuuaia e le malo na tula’i mai i le tausaga na te’a nei, lea na ia osofaia ai ni fale o ni aiga se to’alua i Tafuna ae ave faagaoi meatotino sa i totonu.